يحكي ان جحا ضاعت منه ميداليه في الظلام ففضل يدور عليها كتييير فواحد عدى عليه حب يساعده وقاله "هي ميداليتك ضاعت منك فين ياجحا ؟" رد وقال "هناااااااااااك" فرد عليه "امال انت بدور هنا ليه!؟ " ، قال " اصل هنا في نور وهناك لأ !" ؛ ده بالظبط اللي بيتحفنا به "انصاف المثقفين " كل يوم من ساعه لما الثوره قامت - في روايه اخرى يتسموا " محللين استراتيجيين " ، عمنا جلال عامرالله يرحمه ويعذب اللي كانوا السبب في موته L قال انه كان حلمه انه يطلع محلل استراتيجي بس للاسف كمل تعليمه J - هؤلاء حللوا بقى مجتمعنا وطلعوا بنتيجه مزهلللله ان اي ازمه بتتعرض لها البلد هي اصلها "ازمه اخلاق" وان الثوره طلعت احسن مافينا واسوء مافينا برده! طب ده على اساس ان السنين اللي فاتت كلها كنا مخبيين اخلاقنا ورافعنها من الخدمه ! ماهو هو ده احنا بخيرنا وشرنا طبيعي يعني والدليل معدلات الجريمه والتحرش الجنسي ومزابح افران العيش وغيرها من البلاوي اللي حصلت في خلال السنييين اللي فاتت!! وبرده اعمال الخير اللي حصلت كنا بنساعد بعضنا بعيد عن الحكومات وده كان مريحهم ! يعني المحللين دول واتباعهم - من العاشقين الي نظريه قالوا له - سابوا جسم الجاموسه ومسكوا في الديل ! والمشكله اننا لو علقنا اي مشكله على انها ازمه اخلاق يبقى قول على بلدنا يارحمن يارحيم والعالم كله حيروح "فطيس"! لان الانسان اصلا اصلا همجي بطبيعته "وقوانين الدوله" هي اللي بتوقفه عند حده اما الاخلاق بقى فدي تربيه داخل فيها النشأه والتعليم والمستوي الثقافي ،وبرده الاخلاق الحلوه والوحشه حتفضل موجوده لحد يوم القيامه لان دي طبيعه هذا الكون ان يكون في خير وان يكون في شر! مش حنتفلسف ونقول اصلها ازمه اخلاق ونحمل نفسنا اكتر من طاقتنا وان اي مصيبه نجلد نفسنا ونعزيها ونبكيها ونقول احنا السبب فيها ! وليس خطأ سياسات النظام ! هذا المفهوم اللي زرعه نظام المخلوع في البلد علشان يجنب نفسه المسئوليه يعني لما كان يتسأل عن اي مشكله يرد ويقول " اعملكوا ايه ماانتوا اللي بتخلفوا كتير اجبلوكوا منيييييييين !! .
اذا فالسبب في "العته" السياسي والفوضى في البلد هو "غياب القانون" اللي مش بيطبق الا على الضعيف -على راي الساخر/ جلال عامر يطبق القانون على "المغضوب عليهم" لكنه يتغاضى عمن يقول "امين"- اما القوي فله سكته اللي بيخرج منها زي الشعره من العجين "قانون سكسونيا" زي ماسماه المبدع /وحيد حامد في "فيلم الغول" ، ثم يعلق القوي ويشيد بعداله القضاء المصري اللي هو " عادل ونزيه" - ولا زم يذكروا الاثنين مع بعض زي كده ريا وسكينه - فتعليق المشاكل على انها ازمه اخلاق هي حجه فاااارغه ونظر للدنيا من خرم ابره! والدليل على كده ان المصري باخلاقه وبسلاطاته وباباغنوجه لما بيروح بلاد بره - للعلم هي اتسمت بلاد بره لانها "باره" باولادها! - سواء امريكا ، الامارات ، او حتى السعوديه بيلتزم بالقانون وبيمشي عليه زي الالف ، بيحترم القانون هناك لانه بيطبق على الكبير والصغير ومفيش حد فوق القانون ولا تحته ، كلهم هناك "امام" القانون كأسنان المشط متساويين لان عليهم واجبات ولهم حقوق المواطنه ، اما هنا الامور" متشقلبه "!.
ووجود سياده القانون مش الاخلاق هي اللي يحتنظم العلاقه بين الشرطه والشعب والشرطه ترجع تاني في "خدمه" الشعب مش هما الاتنين في خدمه الوطن ! وان الشعب مش عبيد هما بني ادمين لهم كامل الاحترام يتم التعامل معهم وفق "القانون" بدون تجريح ولا شتيمه ولا ضرب على القفا ! ، القانون هو اللي يحنظم عمل الفضائيات اللي بقت اكتر من الهم على القلب بدل ماالكل بيفتي باللي يجي على باله ويزيد الطين بله! ، وزيد بقى فوق عبيد ! ، القانون هو اللي حيحاسب اي معتدي على حقوق الغير ، القانون هو اللي يحمي الاخوه المسيحين عند بناء الكنائس بدل ماكل كنيسه بتتبني في الخفاء وعند الاعلان على انها كنيسه تولع ! ؛ القانون والقانون والقانون كله بالقانون مش بالفهلوه ولا باي شئ اخر ، ولازم كلنا نفهم القانون ونعرف حقوقنا وواجباتنا لان القانون لايحمي "المغفلين"!
ليست هناك تعليقات:
إرسال تعليق