منذ ان جرب "اللا نظام" في مصر - اللي كان فاكرنا فئران تجارب لايهم اذا ماتت من اثر التجربه ! - حكومه رجال الاعمال في 2005 ومافعلته في البلد من خراب وفساد وافساد متعمد مع سبق الاصرار والترصد والنظر فقط الي "المصالح التجاريه" للوزير! الا وطلع شعارات تنادي ببطلان "جواز راس المال بالسياسه" ! ؛ دلوقتي الامر اتعدل والسياسه بقت على زمت راجل تاني في نفس الوقت وهو "مالا يجوز شرعا" يعني بقى " راس المال + الدين في السياسه "! ، اضف الي ذلك السعي للسيطره على البلد بكل مااوتي لهم من قوه ! البرلمان ، النقابات ، واخيرا التفكير بترشيح خيرت الشاطر رئيس للجمهوره - بعد نفيهم اكثر من مره عدم ترشيح اي احد منهم لرئاسه الجمهوريه - مره وقبل كده رئيس للحكومه! يعني" مفهوم" حكومه رجال الاعمال والسيطره هوهو ومتغيرش وكأنك يابو زيد ماحرست الغيبط ! ، اذا ياعزيزي فالمنتفعين الجدد لايختلفون عن زملائهم في طره خالص الا في حاجه واحده فبدلا من قولهم حننفخ الشعب بقت ان شاء الله تعالى باذن الرحمن حننفخ الشعب ! ولا عزاء للمنفوخين ! لاننا مازلنا في زمن "النفخ"!.
هؤلاء المتتفعين يستمدون شرعيتهم امام الشعب الغلبان - اللي مهما عملوا مش حيعرفوا يضحكوا عليه لان كان غيرهم اشطرJ - بدلا من اول ضربه "جويه" بقت اول ضربه "جسديه !" يعني كل لما حد يتكلم معاهم ويناقشهم يقولوا احنا اتعذبنا كتير واضطهدنا كتير ايام حكم النظام الفاسد ! ، زائد على كده انهم "فرحانين" ااوي بعددهم وبنفسهم ! - زي رجال طره في استعراض قوتهم انهم كانوا 3 مليون عضو ! - فرحه تصل الي حد "الغرور"! والاستعلاء وعدم الاهتمام براي الاخر مدعين انهم يملكون الحق الحصري " للحقيقه" وانهم عارفين الشعب المصري عايز ايه وكيفيه التعامل معه وانهم اقرب اليه من حبل الوريد ! - هو بعينه بغباءه ووشه العكر - ناقص بس خيرت الشاطر يطلع مكان احمد عز في اشهر فيديو له في مجلس الشعب بان "الشعب ينعم بالديمقراطيه ومتظبط اربعه وعشرين قيراط وانه لو حاسس انه مكبوت كان نزل الشارع !" ؛ بتلك الشرعيه "المزعومه" يتزعمون المشهد السياسي الان بلا اي مبرر منطقي - بعد اول لقاء لهم بالثوره في موقعه الجمل بعد ان وجدوا ان كفه الثوره ستميل ناحيه الشعب وبكده هم جم اصلا بالصدفه زي تعين احمد ذكي في فيلم "معالي الوزير" كوزير بالصدفه واقسم بينه وبين نفسه على ان يراعي مصالحه الشخصيه ويحافظ على الفرصه الذهبيه !- فيعقدون صفقتهم مع "رئيس الشركه الجديد" فاصبح الشكل هو "جلباب ببياده عسكريه !" فاصبح التفاوض على تسليم البلد تسليم كامل بتشطيب سوبر لوكس وعلى المفتاح كمان ! يعني نظام "شيلني واشيلك" يعني زواج عرفي بدون اي شهود ! زواج مصالح تسيبوا لنا البلد بالكامل واحنا نظبتكم ونخرجكّم زي "الشعره من العجينه" من الجرائم اللي ارتكبتوها اثناء الفتره الانتقاميه! يعني حيخرجوهم بما لايخالف شرع الله !.
وحتى الدستور اللي لابد ان يمثل كل طوائف الشعب - اللي لابد ان يصنعه كل طوائف الشعب وليست "الاغلبيه "-"اغتصبوه" واستفردوا به استفراد كامل يعني 50 % من المجلسين - اللي اغلبيتهم متربعه عليه - و 50% من بره المجلسين - من النقابات اللي هي خاضعه لهم - من على مزاجهم فطارحين اسماء لا نعرفها اصلا ولا لها علاقه اصلا بالدستور فقط هم من من "لايجادل ولا يناقش" ! ، لا والصياعه بقى ان الصياغه للدستور حتكون - كما جاء بالاعلان الدستوري العبقري اللي برعايه المستشار طارق البشري الجناح القانوني للاخوان المسلمين - بالتزامن مع الانتخابات الرئاسيه يعني لو جاء رئيس على مزاجهم حيحطوا له صلاحيات تخدمهم ولو جاء واحد مش على مزاجهم حيخلوه "خيال مأته" ! ، والصراحه العك ده في صناعه الدستور لا يختلف عن صناعه البلد - صنع في مصر - في جودتها وفكرها ! ولو حتقول لي ماهم جائوا بديمقراطيه ! حقولك الديمقراطيه احيانا تأتي بناس غير ديمقراطيين ! ، ومن اجل ذلك كله ومن اجل ان باعوا نفسهم بثمن بخس يبقى الافضل ان يكون اسم حزبهم "الحريه والنداله " وشعارهم " نحمل العار لمصر".
ليست هناك تعليقات:
إرسال تعليق