الفتنه الكبرى ! شهاده على يوم 5 ديسمبر – الاتحاديه

ححاول في التدوينه دي اكون موضوعي في الوقت اللي فيه لبن العصفور اسهل مائه مره من الموضوعيه ولكن الموضوعيه هنا بدافع انها شهاده امام ربنا .

مشيت من عند الكوربه في الشارع اللي فيه مكتبه الشروق وكافيه بينوس وكان الوضع هادي حتى وصلت لاخر الشارع في الملف اللي يؤدي الي شارع الاهرام وكانت السيارات بتعدي عادي والاسلاك مفتوحه عادي ، وصلت الي محيط قصر الاتحاديه من شارع الاهرام امام جروبي ووجدت مؤيدين ومعارضين يهتفون كل واحد في حاله المؤيدين اخذوا بعضهم واتجمعوا ومشيوا يهتفون لتأييد الرئيس ناحيه شارع الخليفه المأمون ونادي هليوبوليس ، والمعارضين واقفين زي ماهم بالقرب من الحريه مول يهتفون ضد مرسي وضد المرشد والاعلان الدستوري باااطل ، ثم جاءت جماعه من ناحيه روكسي تهتف بقوه "الشعب يريد قرار الرئيس " ثم اتجمعوا ووقفوا امام جروبي والاخرين في مقابلهم يهتفون ضد مرسي "يسقط يسقط حكم المرشد" كل واحد كان بيهتف لوحده وفي منافسه بعضهم البعض في علو الصوت ، العقلاء من الطرفين ماسكين ايد بعضهم علشان محدش يجي ناحيه التاني وتحصل اشتباكات ، الفاصل بينهم كان شارع بتعدي منه العربيات عادي وشويه جاءت مجموعه من خلف المعارضين تحمل شوم وتهتف تأيدا لمرسي وعملوا عليهم كماشه فالاخرين هاجوا عليهم بقوه وزحفوا ناحيتهم والقوا طوب وهتافهم " ثوار احرار حنكمل المشوار" وفضلوا يجروا وراهم بالطوب ولم يراعوا فيهم بنات او سيدات ، اصيب من اصيب وجري من جري حتى وصل المعارضين الي اوائل شارع الكوربه عند كافيه استار باكس واستمر الحال هكذا كر وفر وضرب بالطوب حتى تراجع المؤيدين الي مكانهم الاصلي امام القصر مره اخرى وسمع صوت طلقات نار بعد ذلك من ناحيتهم والمعارضين اصبحوا بيجمعوا نفسهم مره اخرى للذهاب مره اخرى .

 انتقلت انا بعد ذلك الي روكسي حيث كان العجب كان هناك مسيره جاءت من شارع الخليفه المأمون مكونه من سيدات وبنات وشباب ورجال يهتفون ضد مرسي شويه وطلع عليهم مجموعه من البشر فرقوا المسيره بالخرطوش والقنابل المسيله للدموع ! الناس تفرقت وجريت حتى وصلت الي محيط سينما روكسي وبدات الاشتباكات من رمي الحجاره والطوب من كلا الطرفين وكلما تجمع واقترب المعارضون ويجرون ناحيه الطرف الاخر فتلقى عليهم قنابل مسيله للدموع وخرطوش فيتراجعوا مره اخرى الي مكانهم ، شويه وعدت سياره امن مركزي من شارع ضيق بجانب محل الملابس عبودي الناس وقفوها وقالو لهم بعصبيه وحماس زائد "انزلوا احمونا "وحاولوا يفتحوا باب السياره ويخرجوا منها عسكري امن مركزي تدخل العقلاء ومنعهوم من ضربهم وحاولوا ان يمشوا العربيه في سهوله ويسر وبعد ان رحلت رجع الشباب مره اخرى يحمون انفسهم وجدت شاب منهم يمسك بالحجاره حولت امنعه بسزاجه ثوريه كالعاده انها سلميه ! فكاد ان يمسك في خناقي سبته وبعد ان زاد الضرب من الطرف الاخر جاء لي وقال لي " شايف اديك اللي كنت عايز ارمي الحجر وماضربهمش ! " الصراحه مقدرتش اقول له حاجه امام  العنف اللي شايفه فقلت له "انت صح " ورحل عني ، اشتد الضرب اكثر واكثر والمصابين في تزايد اما مصابين بالحجاره في الراس او القدم او مصابين بالرصاص واحدهم كان محمولا من زملائه وهو مضروب برصاصه في بطنه ، اقتربوا اكثر واكثر بفضل الخرطوش حتى وصلوا الي قرب سينما روكسي حيث وقوفنا ثم تراجعوا مره اخرى استمر الكر والفر بهذا الشكل حتى غادرت المكان .

جعلـــــــوه ملحـــــــدا !!

"انا ادعي على ابني واكره اللي يقول اااااامين" ده بالظبط منطق الشيوخ في بلدنا يعرفون ان بلدنا "متنيله بستين نيله" بسبب الفساد الاخلاقي والرشوه وفساد وظلم السلطه واستبدادها للعباد وبدلا من الاصلاح يلجأون الي شتيمه المجتمع ليل ونهار في السر والعلن ! ويكرهون ويلجأون الي السب في من يقول اااامين من مخالفيهم - (راجع الهجمه الشرسه من التيار الديني اللي تعرض لها د.البرادعي عندما وصف المجتمع المتحرش بانه مجتمع همجي )- وينعون الفساد الاخلاقي وكأن دورهم هو كمعلق مباره كره القدم ! فهذا ان دل فهو يدل على الحاجه الي "الانتخه" فهم لا يريدون أن يُعرضوا انفسهم لوجع القلب وقلبه الدماغ ومواجهه تحديات ومستجدات العصر ومحاوله ايجاد اجابات منطقيه تريح العقول عما توصلت اليه البشريه في العلوم في عصر العلم والمعرفه بل يكتفوا بالضحك على انفسهم وعلينا "اننا ميت فل واربعتاشر" وماهي الا شويه زوبعه ويالا اقفل الجرح على صديد وكله حيبقى تمام ! .

بهذا المنطق "التراجعي او المحافظ والثابت على الجهل " لم يجد الشباب خصوصا مع قله تواجد النماذج الخيريه من هؤلاء الدعاه والشيوخ اي شئ يدعوهم الي انهم يتمسكون بدين لايعرف شيوخه الا السب -( زي الطالب الخيبان في ثقته بنفسه اللي عايز يبين قوته برغم وجودها في انه يشكك في قدرات اللي حوليه علشان يفوز برضى حضره الناظر !)- ومعاملتهم كأطفال يريدون مزيد من التربيه ! دون احترام عقلهم حتى دعى ذلك الي انتشار الالحاد في بلدنا كالنار وسط حقول البرسيم فاصبح أكثر المواقع التى يدخل عليها الشباب بعد المواقع الإباحية هى المواقع التى تهاجم الدين وهذا طبيعي فكيف تريد ان تحارب قوه تاتي عليك من ذات اليمين وذات الشمال دون ان تكون جاهز وحامي نفسك كويس بل والحقيقه انك متغطرس بقوتك التي تبدوا وهميه عند البعض !؟ فطبيعي ان تقع من طولك بعد اول لطشه قلم من عدوك واحتمال نلاقي مياه مغرقه الارض نراها نحن وتحس انت بدفئها ! وعلشان لاتقول باننا كويسين وتأنتخ بقول ربنا باننا خير امه اخرجت للناس تعالى معى اخدك لشويه اسباب ادت الي انتشار الالحاد في بلدنا بس خليك معايا للاخر فكن من مَن يستمعون القول فيتبعون احسنه .

1- المعامله الابويه من السلطه الدينيه

عندما يلجأ احد الاشخاص الي احد الشيوخ ويعرض عليه قضيه عقليه وفكريه ايديولجية فاغلب الاحيان يفرد ظهره الي الخلف ويأخذ نفس عميق ويبتسم وهو يسبح على المسبحه "الصيني" ويطبطب عليه ثم تأتي اجابته بأيه من القرءان اوحديث غالبا بيكون ضعيف ليثبت له انه على خطأ أو يصعد على المنبر ويلجأ لخطاب عفا عليه الزمن الذي يتميز بارتفاع الصوت ااااااالحنجوري دون دراسه الفكر الاخر وفهمه جيدا ! ، او يلجأ الي الدعوه الي استخدام خاصيه المنع والتضييق ! ، فالشيخ يحاول ان يقنع هذا الشخص وغيره "بالادله الروحيه" اللي هو اصلا مش معترف بها ومتلاشيا "الادله العقليه " - (اللي الشيخ غالبا مايعرفش عنها حاجه )- النقديه التي تحاول ان تدفع الشخص الي اعاده النظر في تفكيره والي مزيد من البحث  خصوصا ولان اغلب الملحدين اصلا اصلا غير باحثين عما اعتنقوه وهم فقط يريدون ان يتخلصوا من السلطه الدينيه المتمثله في اهلهم والمقيده لحريتهم في الاشياء التي تشتاق اليها النفس ، مع ان  البحث والتروي والحكم الموضوعي هو الشرط الذي وضعه الكاتب جورج سمثعام 1979 ان الملحد القوي هو "الملحد نتيجة التحليل والبحث الموضوعي" ، ده الي جانب اصلا اصلا ان هؤلاء الشيوخ عند نقد الالحاد وابراز مساوئه لتلاميذهم يأخذون سير المفكرين الداعين الي الفكر والتنوير واعمال العقل -( على اساس بان كل اللي بيشغل عقله ملحد! )- ويجردوهم من اي صفه ايمانيه ويلتقطون منها مايحلو لهم ليثبتوا انهم على صواب والباقي خطّائين ولكن سيكونون توابون باذن الله ! شئ عبثي بيشبه مشهد من مسرحيه تخاريف "لما الست جرّت محمد صبحي وطلعته اوضتها وقلعته هدومه وفي الاخر قالت لابنها لو ماشربتش اللبن حتبقوا زي عمو ده "!

 2- التناقض عند النظر للغرب

في الوقت اللي الشيوخ في المساجد بيشتموا الغرب في الميكروفون اللي من صنعهم اثناء وقوفهم  على السجاده اللي برده من صنعهم ومع ذلك يوصفوه بانه كافر وعدو الله ... فيرى الملحد ان هذا العدو تخلى عن الدين وازال الهاله المقدسه منه فكان ذلك هو سبب تقدمهم في شتى المجالات العلميه والفنيه والثقافيه وفي نفس الوقت يروا بان هؤلاء المؤمنين ماهم الا عاله على الحضارات الانسانيه فهم زوائد على الحياه لانهم لم يزيدوا فيها اي شئ مستهلكين غير صانعين ! بل كل همهم وكلامهم عن فرضيه الحجاب ولا النقاب ! ، حرمانيه ترفيع الحواجب ولاتخنها ! ، العلاج ببول الابل ولا بول الماعز ! وفي نفس الوقت عندما يتعبون "بيجروا" على بلاد الكفره ليعالجوا باجهزتهم العلميه المتقدمه ! بل ومنطقهم بان على الغرب ان يتعب ويعمل ويجتهد وذلك بهدف اننا "نأنتخ" لان وجودهم في الدنيا ينحصر في كونهم "عبيد" يعملون فقط لراحتنا لاننا "خير امه اخرجت للناس" علشان ندخل الجنه في الاخره ! .

بعد التوضيح ده كله لو سيدتك شايف ان الكلام ده كله "هتش في هتش" وملوش تلاتين لزمه واننا كويسين وميت فل واربعتاشر وشعب متدين بطبعه ولايقبل مثل هذه الافكار الهدامه وان الدين لله والوطن للمؤمنين وان الناس كويسه في دينها وبايته في المسجد ليل ونهار وان هناك صائمين كتير في رمضان مش بيفطروا في الخفاء ! ومافيش تحرش جنسي في ايام ربنا المقدسه ، ومافيش شيوخ غير مؤهلين للدعوه وقبول المخالف معهم ، يبقى خلاص خلينا زي ماحنا كده كويسين ولاتزعل نفسك وخلي السوس ينخور تحت الارض لغايه لما تتهد الدنيا فوق دمغنا بس ماتبقاش تزعل بعد كده ! وخلي بالك كمان من حاجه مهمه قالها الامام الغزالي رحمه الله "إن انتشار الكفر في العالم يحمل نصف أوزاره متدينون بغضوا الله إلى خلقه بسوء صنيعهم وسوء كلامهم" ! .

ضحايــــا الاستقــــــرار

من يوم نشأه البشريه ومن ايام ماكانت لسه بشورت والضحايا بتتعدد اما بكوارث طبيعيه او بتخريبات وحوادث بشريه ، اما بقى الجديد في هذا العصر اللي مايعلم به الا ربنا ولاول مره في التاريخ الانساني وفي بلدنا بالتحديد ام الدنيا وابوها كمان ان الضحايا عندنا هم ضحايا الاستقرار!

 ولأن المصري معروف بطبيعته انه بيحب "الانتخه" وكل همه في الحياه انه يعيش جنب الحيط ويربي عياله على امل انهم يطلعوا احسن منه فعلى هذا الوتر لعب الاخوان ودعوا الناس انها تنقلب على الثوره "وتفصّلها" على مقاسهم وبمزاجهم ويصيغوا دستور لايعبر الا عن افكارهم الذين يحاولون بها تحويل البلد كلها لكي تصبح شبهم لخمسين سنه وتطلع اجيال مشوهه ! وكل ذلك بحجه "ياعم خليها تمشي بقى وكبر دماغك" حتى اوصلتنا هذه الحجه الي الواقع اللي اصبح امر من المر .

 فالناس كانت فاكره ان لما "ترقع" الدستور - ( مع ان الثورة دائما تقوم لإسقاط النظام الظالم بقوانينه ودستوره ثم تنتقل السلطة إلى الشعب الثائر ليمارس بالشرعية الدستورية تطهير الدولة من الفاسدين ثم يتم انتخاب جمعية تأسيسية لكتابة دستور جديد يعبر عن أهداف الثورة ويتم تشريع منظومة قوانين جديدة تحقق العدالة التى قامت الثورة من أجلها ! )- العجله حتمشي واكتشفوا بعدها بان العجله من الشيطان ! وكان عندهم امل بان "طائر النهضه"-( اللي زيه زي العصفوره لما كانت والدتك علشان تسكتك من العياط وتريح دمغها فتقول لك "بص العصفوره" !)-  ذو المؤخره حيبيض لهم بيضه فضه وبيضه ذهب وحيخدهم على جناحاته ويطير ويرفرف في الفضا فاذ اكتشفوا انهم ماطروش اصلا !-( زي مسرحيه عفروتو لما هنيدي ضحك على حسن حسني وحب يستغله واخذ فلوسه وفهمه بانه حيطيره حول العالم وفي الاخر اكتشف حسني بعد ماتشعلق في العفريت انه ماطرش اصلا وان عفروتو جالوا لمباجو J )- وثابتين في مكانهم وبيغرقوا في رمال متحركه بتخدهم فقط لتحت !

 ده الي جانب امتداد لسياسات النظام القديم -( اللي تخلصنا من الكلام فيها عن  "حكمه الرئيس" ليحل محلها الكلام عن "رحمه الرئيس"! )- اللي بتراعي فقط حقوق الاغنياء على حساب الفقراء وان مازال الاغنياء يزدادوا غنى والفقراء بيطلع عين اهلهم ويزدادوا فقرا !

فلم يجد الفقراء - (اللي اصبحوا غالبيه هذا الوطن)- الدعم الذي يستحقوه بل الدعم يحصل عليه اصحاب المصانع العملاقه الذين يحصلون على دعم الطاقه ويبيعون السلع بالاسعار العالميه ! بل والمثير للاندهاش انه لايفرض عليهم اي ضرائب تصاعديه يحاسبون على ضرائبهم شأنهم شأن باقي افراد الوطن ! ، اما المواصلات فلم يجدوها تحترم ادميتهم ولا هناك شوارع ولا مرور سلس بل وجدوا ان الازمه بقت انيل من الاول خصوصا مع وجود ازمات متلاحقه على البنزين - (وهو اساسا سلعه استراتيجيه بتشد اي حاجه معها لفوق لدرجه انك تلاقي بتاع العسليه يقولك معلش يابيه العسليه غليت لان البنزين غلي ! والغالي في بلدنا عمره مابيرخص تاني والمشكله بتكون مصيبه مع ثبات معدل الدخول وانخفاضها اللي مرسي وعد بتطبيق الحد الادنى والاعلى للدخول ولم يوفى بوعده والنتيجه ان الناس بتسب مليون دين ! )- الذي يصّدر الي غزه وكأن مصر وغزه ايد واحده وان مرسي رئيس مصر وغزه ! ، ده غير ازمات انقطاع الكهرباء اللي هشام بك قطونيل عايز يحلها بان الناس تتجمع في غرفه واحده بها تكيف واحد بدلا من التكيفات الكتيره اللي في الشقه !- ( انعزال تام عن المجتمع كما كان حال حكومه نظيف! دي الناس بتدخل جمعيه علشان تشتري تكيف واحد وبتعمل جمعيه تانيه علشان تدفع فاتوره الكهرباء عند تشغيله ! )- بل ويريد ان يغلق المحلات بعد الساعه 10 مساء دون ادنى دراسه عن المصائب اللي ممكن تحصل من غلقها من بطاله وعدم وجود امان بسبب "مياصه" ضباط الشرطه وعدم حزمهم مع البلطجيه اللي اصبحوا اكتر من قش الارز ! وغيرها من المشاكل والمصائب .

 غير موكب السيد الرئيس الذي لم يتغير منذ عهد مبارك فتغلق الشوارع على جانبي الطريق بحجه تأمين السيد الرئيس ، حتى وصل الامر الي تأمينه في الصلاه اللي المفروض اصلا اصلا انه في بيت ربنا وفي حفظه ! ، حتى رغيف العيش فلم يجدوه نظيف ولا يحصلون عليه في سهوله ويسر ! ، وبدلا من طمأنه الناس وتوضيح لهم "بصيص" من الامل حتى يصبروا على طائر النهضه ! الا ان مرسي وجماعته زودوا الطين بله وقاموا بالاقتراض من الخارج اللي بشروطه حتغرق الاجيال القادمه في مشاكل هم في غنى عنها وكل ذلك بحجه ان البنك الدولي به قسم خاص للمعاملات الاسلاميه غير ربوي والفائده اللي حندفعها هي فقط رسوم اداريه وتعليقه على هذا جاء سخيفا ومستخفا بعقول الشعب بانه لن يسمح بان يأكل الشعب مال حرام ! منتهى العبث واللعب بالدين ويفسروه حسب اهوائهم ومصالحهم وكأنهم بيلعبوا فقره الحاوي في السيرك ! ومن فقره الحاوي دي نتج عنها تصريحاته بان ماتحقق من وعود المائه يوم هي 70 % ! حاله من الانفصال التام عن الواقع كما كان حال مبارك الذي كان يستمد معلوماته من تقارير المطبلتيه له ! لكن مبارك وصل لذلك بعد فتره طوييييله من الزمن لكن ماشاء الله مرسي وصلها في اقل من 3 شهور ! بس حنقول ايه ولسه ياما في الجراب ياحاوي !

"المــرايــــــا العاكــــــــسه "!

في الماضي والحاضر والمستقبل سيظل الفن مراه للمجتمع -( علشان كده كتير بيكرهه لان محدش بيحب يتفرج على نفسه في المرايه خصوصا لو كان شكله لايسر عدو ولا حبيب !)- يشرّح احواله من الداخل ليستطيع القادرون على حلها انهم يخلصونا منها ومن وجع دمغها ويخلعوها من جذورها حتى لا تنمو الاطراف الفاسده بشكل قوي وفعال ، ويعكس احوالنا للخارج ليتعرف الاخرون على ثقافتنا وحضارتنا وشكل البلد اللي حيزورها ومدى "جدعنه" شعبها التي لاتظهر الا عند الشده فقط ! ، ومع كل ذلك يريد الغير الفاهمين لهويه هذا البلد وقوتها ناعمه التاثير ان يبطلوا تاثيرها واعدامها والقضاء عليها قضاء تااااااام بدعوى ان هذا هو قضاء الاسلام حيث انها حراااااام ! تلك القوه الفنيه والادبيه ،التي نجيد صناعتها من "طقطق لسلام عليكم" ليست صناعه "تجميعيه"عندنا ولكنها صناعه "ابداعيه" ... ابداعيه الصناعه وساحره التاثير تبدا مراحل انتاجها من شويه كلمات مع قصه وتكنيك وتخلطهم على بعض ويطلع لك مارد جبار يحقق لك كل شئ ويجعل العالم العربي والعالمي يعمل لك اعتبار وخير مثال الحركه الفنيه بعد ثوره 52 فعبد الناصر كان لابيحب السينما ولا الفن ولا يحزنزن ولم يكن يجذب انتباهه ولكنه كان مدرك مدى تاثير تلك القوه فقام مدعمها بقوه ، وامريكا لم تصبح امريكا في قوتها الا عندما اهتمت بالسينما وانشات مدينه هوليود التي تنتج افلام تسوق الي افكار امريكا التي تريد ان تجعل العالم كله شبهها ! وتركيا غزت العالم العربي كله بفنها الذي لايحكمه منطق ولاقصه هي فقط صوره تعكس جمال البلد وحضارتها ! لذلك فهذه القوه تشبه دلال المراه على زوجها فتفتح بقوتها الناعمه كافه الابواب المغلقه حتى اذا طلبت لبن العصفور سياتي به J

مشكله المعادين للفن والسينما انهم يحصرونها في فئه معينه لاتعبر بالضروره عن الصناعه بأكملها شايفنها انها مجرد "صناعه سبكيه" الاصل تمثل "شارع الهرم" ولايرونها على انها "سواق الاتوبيس"  ! مثله كمثل الذي يحكم على مصنع للاثاث باكمله انه لايصلح في السوق ومن الافضل ان يغلق وذلك لان السرير وقع على الارض وهو نائم نومه رومانسيه ! فيحكم على الكل من خلال الجزء مع ان الجزء ليس بالضروره ان يعبر عن الكل ! وذلك لسبب منطقي وهو كارثه هذا الوطن "التعميم"! مع ان كل تجربه تعبر عن نفسها بذات نفسها "لان صوابعك مش زي بعضها" ! فهو يحكم على الصناعه باكملها على انها صناعه "دعاره" وانها صناعه تختش حياء المجتمع ! المجتمع الذي اساسا يخدش حيائه بنفسه بدون وازع من اي احد نتيجه احباطه الاقتصادي والاجتماعي ! فيعلق فشله وقله حيائه وحيلته على الفن واصبح هو من "يهيجهم"! اذا كان الفن يهيج فهو يهيج على الفكر والاصلاح وهذا هو الدور الحقيقي له-( ومعاك ان في كتير خرجوا عن هذا الدور لكن القرءان بيقول "فاما الزبد فيذهب جفاء واما ماينفع الناس يمكث في الارض")- لكن المعادين بالنسبه لهم ان الفكر والابداع اساسا هو"ابتداع" في حد ذاته وان العقل والتفكير حرااااام شرعا فيحبون "الاتباع" عن "الابتداع" وتشغيل العقل فكل ماهو مفكر كافر وفاسق بطبيعه الحال والفكر هو اساس الابداع والفن ، ولكن هل يدرك هذا المعادي ان هناك قوانين في المجتمع  قد تغيرت من خلال السينما -(عود الي تاريخ فيلم جعلوني مجرما للفنان فريد شوقي والمخرج عاطف سالم وانت تعرف كلامي )- هل يعلم ان الفن يؤرخ لذاكره الامه كلها من خلال الحكايات والقصص التي تتوارد علينا بسبب اننا امه لاتحب القراءه تحب الاستماع الي الحكايات على الشلته! -( ثوره 19 لم تؤرخ الا من خلال مشهد المخرج حسن الامام في فيلم بين القصرين وعند التكلم عن الثوره دائما ياتون بهذا المشهد فقط )- هل تعلم بان بفيلم واحد تصنعه يؤثر في الناس بمقام 100 كتاب ؟ هل تعلم انك من خلال الفن يمكنك ان تدعوا الي الاسلام خير من مائه شيخ فاضي فقط "للنميمه شو "ويكفر ده ويسلم ده ! طب هل وهل .....!!؟؟

والمصيبه الاكبر انهم ينظرون الي الصناعه على انها من الافضل ان تصرف مصاريفها على الفقراء! بمنطق محدود الفكر وضعيف الافق ومحدود المستوى الثقافي والادراكي فهو ينظر الي الموضوع "من خرم ابره" وبنظره اكثر "رقميه" دون النظر الي دونها من اي جانب اخر ! ليس العجيب من منطقهم -(اذا كان عندهم منطق اصلا)- العجيب هو اني ماعرفش صناعه في العالم كله تتكلف كلها على بعضها شاكب راكب ويتعمل عليها كل هذه الضجه والهيصه مليار وكام مليون جنيه ! مع انها صناعه كأي صناعه تاتي من ورائها فلوس برده كاي صناعه ياسبحان الله -(لاسحر ولاشعوزه)- ! تاتي من ورائها فلوس وتعود الي الدوله مره اخرى بفلوس برده في شكل ضرائب ، طب اذا كان هذا منطقهم فلنغلق بقى شركات الحديد والصلب ، والحليج والقطن ، الشركات الغذائيه وناخذ فلوس تلك الصناعات ونصرفها احسن على الفقراء بلا صناعه بلا نهضه - ( بلاش نهضه دي لاحسن بقت كلمه ابيحه لانها اصبحت استغفال شعب )- ايها الناس ارجوا النظر على بلدنا والحكم على الامور بنظره اكثر اتساعا وواسعه الافق فالدوله كاي شركه لها مدخلات ومخرجاتها في انتاجها لتنهض ثم تريد ان تروج لبضاعتها والفن هو هذا المروج الذكي الذي يجعلك سلطان زمانك خصوصا اذا كانت بضاعتك تستاهل الترويج !     

امنـــــا الغـــولــــــه !

"التعليم في الصغر كالنقش على الحجر " تلك المقوله الساحره كانت مبثابه لامؤخذه "المرشد" لاهالينا في تربيتنا وتعليمنا ، وفي الغالب كان يتم هذا النقش بطرق وباشخاص خياليه "مأفوره" ترهب اكتر ماترغب الطفل في انه يتعلم حاجه تنفعه فيتخرج ويحصل على شهاده لا تشهد على اي حاجه ! فقط تشهد على "افورته" واللي السبب فيها تلك الشخصيات المأفوره الخياليه "امنا الغوله" وباقي عائلتها اللي كان بيخوفوا الطفل بها لو مسمعش الكلام ويدخل معها "حجره الفئران مع أبو رجل مسلوخة اللي هيخيط رجله لو مشيي حافى "! ولما الطفل كبر وكبر معه اجيال بحالها كبرت معاهم "الافوره" واصبح من الطبيعي انه مفيش جمله مفيده او غير مفيده تقال الا ولازم يتحط عليها شويه بهارات علشان الكلام مابيحلاش من غيره ! ويعمل لك "من البحر طحينه" حتى اصبحت "الافوره اراده وسمه شعب " !

هذا الشعب بكل طوائفه واعماره "محفوره" جواه المبالغه بدا من زياره ضيف له في منزله واللي بيوصفها انه زاره النبي ولا يستحي من ذلك الوصف  حتى لو كان الضيف ده "مابيركعهاش" ! ، وكمان يزيد من ترحابه بانه يحطه فوق راسه حتى لو وزنه 2 طن ! مرورا برغبه صاحب البيت انه "يدبح عيل من عياله" على الاكل ليثبت للضيف انه غالي عنده اوي ! ولما بترسى في الاخر على شويه فول وجبنه ويطلب من البائع انه يتوصى شويه بالزيت الحار ويكتر الطحينه فيعبر له البائع عن شده حبه للزبون "من عنيا" يابيه حتى لو حيأخذ من عنيه دي شويه عماص ! نهايتا في تعبير الضيف عن شده اعجابه بالاكل بانه "اكل صوابعه وراه " ! .

شعب ظريف وجميل ولو لفيت العالم مش حتلاقي مثله في حبه للخيال الكارتوني اللي بيعشقه زي حبه عنيه ، يمكن علشان مش شايف نفسه مع واقعه المأساوي فخياله بيفوق خيال جيمز كاميرون مخرج فيلم افاتار ، بل ويفوق بشده خيال والت ديزنى نفسه لدرجه تجعلك تفكر ان ديزني مولود من اب شبراوي الاصل  ! ، شعب لما حتى بيحب بيحب بافوره فيجلس الشخص مع حبيبته على الرصيف ويقول لها "انت تقولي للقمر يقوم وانا اقعد مكانك "! ولما بينزل الواقع ويتجوز بيعرف ان علميا وعمليا القمر لو نزل على الارض حتحصل كارثه ولو حد طلع يعيش فوق حيموت ! ، شعب في شده مخاطره برده يعشق الافوره ويزيد من شده خوفه وبيحب يعيش جو الرعب فكنت تجد في اللجان الشعبيه الناس بتحمي بعضها وبتأفور في تلك الحمايه فكانت تختلق الخطر بان هناك ناس حتهجم عليهم من الشوارع الخلفيه بسنج ويمكن برشاشات وطائرات F16  كمان ! .


 شعب بيأفور من افكار بعضه ويكبرها ويخليها "وحش" امامه واللي بتطلع في الاخر "قطه" نيعو نيعو ! فيأفور من الليبراليين والليبراليه ويعرفها ان امك تمشي من غير حجاب !او ان البلد حتتحول في اعيادها القوميه الي حفلات ناس "مأفوره في عدم لبسها" وتطالب بمطالب "شاذه" ! بل وتتحول الافلام العربيه اللي اتربينا عليها الي افلام بورنو  تؤصل للفعل اللي مش حيبقى فاضح في الطريق العام ! ، ويأفور من الاسلاميين بانه حيعلقوا الناس وسط الشوارع ويجلدوهم ! - (كما حدث في فيلم فجر الاسلام  في تعذيب المؤمنين ! وبرده الافوره لم تترك الفيلم في حاله حيث "افوروا" وصوروا ان ابو لهب علشان كافر فوجهه اسود وحواجبه تتتتخينه مع انه سمي ابو لهب لانه كان شديد الجمال وحمره الوجه ! )- وتمشي جماعه تأمر بالمعروف وتخطف الناس بدون علم اهلهم - ( امن الدوله قايم بالواجب في الحته دي وزياده )- وتمشي البنات خايفه على نفسها من ضرب احدهم لها وهو يعلوا صوته ويصرخ في وجهها "اااااتحشمي يامره"! ، وانهم سيقوموا بحرق كل المطاعم الامريكيه ويسيبوا محلات "مؤمن" بتاع السندوتشات !

مما سبق اجد نفسي احاول مجرد محاوله ان اتقمص دور احمد ذكي في فيلم ضد الحكومه بل وأأفور في التقمص كمان واقول  " كلنا مافورون -(بما فيهم انا فانا ابن المنظومه المأفوره )- ولا استثني احد حتى المواطن قليل الحيله " ! لذلك اتمنى اننا نترفع شويه عن افوره المراهقين دي حتى لاتكون "الافوره اراده شعب " اللي بتودي في داهيه لان للاسف بعض الناس يسمعون نصف الحديث، ويفھمون ربعه ويتكلمون ويفتون  بأضعافه ! .

بطيخــــه قرعــــه !

لما تسمع امثال زماااان تستشف وتستنتج منها ان "نينه وجدو" كانت عندهم حكمه كبيره وخبره عريقه في الحياه تفوق خبره وفلسفه "ارسطو" في زمانه ! فتلاقي كلامهم فيه الشفا وهما كلمتين ورد غطاهم بس ايه في الجووول فتسمع مثلا "القرعه تتعايق بشعر بنت اختها " ولو تعمقت وحللت المثل ده وطبقته على ناس كتييير في حياتنا عايشين حولينا حتلاقيهم "مسخ من جوه ، وشكل من بره" يعني "بطيخه قرعه "! وحتلاقي الناس دي برده لهم سمه مميزه تميزهم عن باقي خلق ربنا - ( ماتخفش مش حتتعب كتيير في انك تجدهم لانهم منتشرين وسطنا كالنار وسط حقل البرسيم !)-  وهي انك تجد داخلهم قليل وبراهم كتييير ويبان لك هذا من اول كلمه ينطقوا بها ! لذلك  فلقله مابداخلهم من نقص فتجدهم بيعوضوا ذلك بالزياده - ( وكتييير بالبهرجه )-  في شكلهم وهيئتهم سواء بالافعال او الاقوال ! مما يجعلهم ارجوزات يتم استخدامهم من جانب الناس الاخرى للتسليه وللقلش عليهم في وجودهم ، ويقطّعوا فروتهم في غيابهم !

والمشكله الحقيقه واظن السبب في كل "العته" ده هو اننا "متطرفين" يااما يمين اوي يااما شماااال اوي والوسط اللي عمّالين نتغني به و"نمدغه " زي اللبانه في بقنا طول النهار والليل ليس له وجود في حياتنا ! فاما ان تجد اشخاص زاهدين - ( ودول اقليه جدااا نظرا لقله من هم لديهم ثقه بانفسهم ومستمتعين ومؤمنين بما في داخلهم !)- في كافه اشكال الحياه ومتعها ! واما ان تجد اشخاص متفشخره بالجامد-( ودول الاغلبيه )- في شكلها ولبسها  وابنائها او حتى بالمكان اللي عايشه فيه او المكان اللي رايحه تتغدى او تتعشى فيه حتى لو كان بسبب جمعيه وقبضها الاول وراح المكان ده بطلوع الروح ! بس الهدف يستحق كل هذا التعب وهي "الفشخره " اللي كتييير بتكون كذابه ! كذابه لانها بتضحك على صاحبها قبل ان تضحك على الناس فيصدق نفسه وكذبته بانه كويس وانه ابن ناس ومن اهل القمه - ( مع ان اهل القمه وولاد الناس مش بيعملوا كده لان اللي بداخلهم مليان اوي يغنيهم عن كثره القول والفشخره )-  ويرسم لنفسه "شخصيه وهميه" يصدقها الناس ويتعاملوا معاه من خلالها بس في الاخر هي شخصيه وهميه "مسخ من جوه ، وشكل من بره"! ، وللاسف بيساعد على ذلك الاستخدام الخاطئ للتكنولوجيا فتلاقى الناس بتشارك بعضها في على مواقع التواصل الاجتماعي اين ذهبت ومافعلت وكله بالمستنداااات (الصور) حتى تكون "الفشخره للجميع "!

 كل تلك السمات هي حصري فقط  في البلاد المتخلفه فقط اما البلاد المتحضره فمن سماتها ان الانسان ميزته في انه انسان يهتم بداخله قبل خارجه - ( بالرغم اننا بنمثل اننا متدينين الا ان كل الاديان السماويه بتركز على الداخل قبل الخارج بس احنا بنأخذ اللي على كفنا فقط والاسهل ! )-  لذلك تجد فيهم البساطه والتوازن في الشكل والعمق في المضمون هذا العمق لم يأتي من فراغ بل انه جاء نتيجه "الثقه بالنفس" تلك الثقه لم تاتي من فراغ ايضا فهي نتاج  العمل الشاق والناجح والتركيز على المهم قبل الاهم والاهم من كل هذا وذاك "القراءه" فهي الاساس الاول لثقه الانسان بنفسه وتجعله متوازن في حياته الخاريجه والداخليه - ( بعكس ماافرزته السينما في ان المثقف لازم يكون هدومه مقطعه ومدهول وعبيط ! ) - ، وكل ماسبق هو حلقه مكمله لبعضها فكل حلقه توصل للي بعدها حتى تكتمل باقى السلسله ويبقى في الاخر شكلها جميل وجذاب من اول نظره  ويصبح شكله وثمنه لايقدر بمال لذلك فحتى تكون بطيخه حمرا ومرمله يعشقها الناس ويتلهفوا عليها فعليك بالتوازن بين الداخل والخارج وبطل فشخره لانها مشهوره بكذبها !  بدلا من ان تكون بطيخه قرعه يقرف الناس منها مع اول قطمه ! 

خارجـــي مـــش داخلــــي !

وصلت لنا عبر السنين قصص من التراث والتاريخ الاسلامي بان الدين تم نشره في بلاد تعبد الاصنام والافيال كمان عن طريق المعامله التجاريه الحسنه بما تتناسب مع تعالم الاسلام "الاخلاقيه" الحسنه من الامانه والجوده والصدق ومن ثم فيسأل الشحص الذي يعبد اله اخر غير ربنا عن اسم هذا الدين لكي "يعتنقه" فيتم جوابه بان الاسلام هو ديننا وربنا هو إلهنا ، تتطور هذا المفهوم عبر مئات السنين وزي اي حاجه في الدنيا اذا لم يتم صيانتها فتتدهور فالان وبعد هذا الانتشار للاسلام اصبح الغرب بيسال نفس السؤال اللي سأله اجداده من مئات السنين مااسم هذا الدين لكي "لانعتنقه" ونبعد عنه من الاساس ويانحله لاتقرصيني ولا عايزه عسل منك ! ونجيب عليهم ليس بالاقوال والمعامله فقط لاسمح الله بل نرد بالافعال التي تدل على واقع كسول غير مؤهل لنشر الاسلام حتى في البيت اللي جنبه ! واليك الشواهد علشان متقولش اني ظالم ومفتري واني مش بتاع ربنا !! :-

-          لما تلاقي بين كل زاويه وزاويه زاويه للصلاه وتدخل تلاقي صف او صفين بالكتير اوي وربع صف في صلاه الفجر بيصلوا وراء الامام  يبقى ده ايه بقى!؟ هي مش الصلاه عماد الدين ولا هي عماد متعب ! ثم تلاقي اللي بيأذن صوته زي الغراب عايز يأخذ ثواب انه يأذن وهو بيأخذ ذنوب على ازعاج الناس بصوته واللي زاد وغطا انه بيذيع الصلاه كلها في الميكروفون الخارجي والداخلي دون مراعاه مريض او امراه عجوز اوي اي شئ ! مع ان الدين وصانا بسابع جار وانه دين الرحمه!! .

-          لما تلاقي اكبر نسبه للتحرش الجنسي في بلدنا وكله هايج ومش عارف يمسك نفسه مع ان الدين امرنا بغض البصر واحترام حرمه الشارع ! وتجد شيوخ يطلعوا فتاوي تفشي الفاحشه اكتر ماهي متفشيه بفتاوى ارضاع الكبير ! ، وزواج المتعه ، ويأتي باشكال والوان من العلاقات اللي بقى ملهاش مكان وسطنا في هذا الزمان مثل ملك اليمين ! ومصدر الفتوه دي اصلا عايز يفك زنقته قام فاتى باي كلام  ! .

-          لما تلاقي مصانع مرموقه في البلد -( وانا اعرف منهم كتيير وشفتهم بنفسي واتعكيت من اهمالهم في كتيير من المشاكل وشكوى العملاء )- واغلبيه العاملين فيها مهتمين بطول وجوده اللحيه والاعتناء بها ومهملين في جوده المنتج اللي بيطلعوه من ايديهم مع ان الدين امرهم إِذَا عَمِلَ أَحَدُهمْ عَمَلا أَنْ يُتْقِنَهُ ! .

-          لما تمشي مع واحد صاحبك او حد ليك سابق معرفه به ويكون مربي ذقنه -( حتى لو يساري مربي ذقنه )- تلاقي الاخ اللي جاي من الجهه الاخرى يسلم عليه فقط ويسيبك كأنك هوا شفاف ملكش اي وجود ! مع ان الدين امره ان السلام لله وافشوا السلام بينكم ! .

-             لما تركب مايكروباص وتلاقي السواق مشغل ايات من القراءان والمصيبه ان منها مثلا " وَمَنْ يَعْمَلْ مِنَ  الصَّالِحَاتِ وَهُوَ مُؤْمِنٌ فَلا يَخَافُ ظُلْمًا وَلا هَضْمًا "وعمال بيبلطج على الناس ويستغلهم في رفع الاجره مع ان المسافه متستحقش كل ده في حين ان  نظام الإسلام صارم في منع الاستغلال لحاجة الناس ! .

-          لما تغلط وتعمل ذنب وتحب تسأل شيخ علشان تعرف الصح فين وترجع الي ربنا فكتييير منهم ينهرك ويقولك ايييييييه اللي عملته ده ويزود الطين بله ! ثم ينظر لك بمنتهى الاستحقار وكأنه ملاك منزّل من السماء لايغلط ! - ( اعرف واحد منهم كان بيحب مايكل جاكسون وبيعرف يرقص زيه ولما ربنا هداه وبقى "بتاع ربنا" مفيش فتره بسيطه واصبح يفتى في كل شئ واحب كلمه ياشيخ دي اوي ولما حد ساله عن شئ في التاريخ الاسلامي فقال ان الرسول لما قال " اللهم أعز الإسلام بأحد العمرين " كان يقصد عمر بن عبد العزيز !! مع انه ولد 61 هـ والرسول مات 11 هـ وكان المقصود من احدى العمرين ده عمر بن الخطاب ، وعمرو بن هشام ( أبو جهل ) بس ليه ميفتيش هو مش بقى شيخ ! )- ده الرسول لما جاء له واحد وقال له صرح لي بالذنا تكلم معاه الرسول بلطف حتى اقنعه بهدووووء في ان اللي بيعمله ده غلط ولا يجوز وانه من الكبائر !!

-          لما يروح شاب يتقدم لوحده بنت واهلها يقولوا له في بدايه الكلام قبل الدخول في العميق احنا يابني بنشتري راجل واهم حاجه عندنا الدين والاخلاق ويطلع كلامهم ده كله مجرد كلام في الهواء مع اول اتفاق على المهر والشبكه وتجهيز الشقه ويحملوه بما لا يطيق مما يدل على "الطفاسه" في كل شئ حتى الجواز ! مع ان الدين بيقول "اذا جاءكم من ترضون دينه وخلقه فزوجوه، إلا تفعلوا تكن فتنة في الأرض وفساد كبير" !! .

-          لما تلاقي الناس في رمضان نازله كلام هنا وهناك وكانها في سباق ليس مع نفسها وربها بل مع الناس وتهتم بالارقام اشد اهتمام فيقول كل بني ادم للاخر انا قرات 10 اجزاء في اليوم وصليت تهجد 11 ركعه وكذا وكذا طب هو مال الاخرين بكده هي دي فشخره ولا ايه ! مالاعمال دي بينك وبين ربنا لان الاعمال التي يشرك فيها احد مع ربنا لا تقبل اصلا وان النيه دي زي اللبن تتعكر من اقل تراب ! .

عزيزي القارئ الذي ينادي باقامه دوله الاسلام .... قول له اقمها جواك انت الاول ثم طالب الاخرين والدوله انها تبنيها ، لما نواجهه تلك العادات السيئه ونعترف بالاخطاء اولا ونتخلص ثانيا من مفهومنا عن اننا ملائكه الرحمه وليس بنا اي عيوب ، ولما نواجه الحقيقه باننا مسلمين بالشكل وليس بالمضمون ! ساعتها يمكن ننهض ونبقى دوله محترمه وساعاتها قول براحتك انك بتنشر الاسلام لان ساعتها الناس هي اللي حتدخل الاسلام بنفسها لان السمعه الحلوه حتبقى سبقاها لكن دلوقتي الناس عايزها تحب الاسلام ازاي يعني لما تلاقي ناس عايشين عاله على العالم المتقدم ، لما تلاقي ان الفقراء اغلبهم من المسلمين ، لما تلاقي ان الدول المستبده التي لاتوجد عندها رحمه ولا عدل من دول الاسلام ، لما تلاقي اننا بنتكلم اكتر مابننتج ، لما تلاقي ان مفيش ولا منتج واحد اسلامي وتلاقي واحد متفزلك يقولك نقاطع طب قاطع بقى الكمبيوتر اللي بتقرا عليه تلك المقاله ، والميكروفون اللي شيوخك بيشتموا فيه اللي صنعوه ! لذلك  فبعد هذا العرض مني ارجوا ايها القارئ الا تترك جسم الجاموسه وتمسك في ذيلها وتهاجمني وتقول لي ياعدو الدين يافاجر لان الغرض هو تحديد المشكله وتعريفها ومن ثم الاصلاح والبحث لها عن حلول جذريه بدل مااحنا دافنين راسنا في الرمل ونقول باننا جامدين اوي وزي الفل واحنا متنيلين وزي الزفت وعاملين زي اللي مش عارف يتجوز مراته وبيأوح ومش عايز يروح لدكتور فايبخت من بكاني ولا ابكى الناس عليا ويابحت من ضحكني ولا اضحك الناس عليا ... سلامات .

عجـــــــائب وغـــــــرائب !

- احنا اصبحنا عاملين زي اللي كانوا مسجونين في سجن كبير ومقسم الي عده عنابر ولمده طويله من الزمان كان كل منهم يسمع صراخ الاخر ولا يعرف شكله وعندما تفتحت السجون نظر كل واحد للاخر وظلوا يسخرون من بعضهم "ها ها ها ايه ذقنك الطويله دي! والاخر ها ها ها ايه لبسك القصير ده ! والثالث ها ها ها ايه جسمك التخين ده !" والعجيب ان كل واحد منهم عنده عيوب كثيره يمنع نفسه من رؤيتها ويسمح لنفسه فقط انه يستهزء من الاخرين ! العقل هو الحل !

- اللي خايف من تحول مصر الي "مستعمره اخوانيه" بلاش تبالغ في خوفك كده لان قوه مصر "الثقافيه والحضاريه" اقوى من اي استعمار ،وقادره على "دهس" اي حد يلعب "في اساسها" ، دي انجلترا بجلاله قدرها احتلتنا 70 سنه واحنا اللي اثرنا فيهم مش هم ومكناش زي المغرب ولا تونس في تأثير التقافه والاحتلال الفرنسي عليهم .

- Top of Form

حلم كل فتاه انها تلاقي راجل " غني -( وحط تحت غني دي مليون خط يعني عنده كل حاجه لارج! )- متدين ، مثقف ، مش جاد اوي ولا ابن نكته اوي ، عائلته كويسه ، طموح ، عقله متفتح ، لبق في كلامه او اهبل ، اجتماعي ، بيحب الخروج والسفر اااااوي ! ، ميقولش لآ على الشوبنج ولو ايده فرطه يبقى راااائع ! ، وامه تكون بنت حلال ولو ميته يبقى فل اول !! ، مش عصبي ولا خلقه ضيق وبيأخذ وبيدي في الكلام" .... ايها الفتاه عندما تجدي هذا الرجل التي تجتمع فيه كل تلك الصفات عليكي بالاتصال 0900 بس عند الاتصال مش حتلاقي طلبك ده لان اللي حيرد عليكي حيقولك عليكي بتحديد اولوياتك والاهم لان الشروه دي كتيره اوي ومفيش حد يشيل كل ده فاشتري الاهم اولا ثم عليكي بعد ذلك ان تحصلي على الباقي من الاشياء التي يمكن ان تعوض فلا تشتري الرخيص بالغالي لان هناك اشياء لاتعوض !

- يمكن ان تكون "البلونه" مصدر سعاده للاطفال الا انهم كثيرا مايستمتعون بالضغط عليها "فتفرقع" وبعدها بيعيطوا ! هكذا يفعل الناس في مصدر سعادتهم

- عجبا لهذه الدنيا فهي تشبه مائده الطعام الفاخره متعها في اصنافها فهناك اصناف قد سئمت نفسك من كترها وهناك اصناف اخرى في نهااااااايه المائده نفسك "حتموت عليها" وايدك مش طايلاه !

- عايرتوا الولاد بمهند وكريم وهما عايروكوا ببنات اليورو ! ومفيش حد "اهيف" من حد Top of FormTop of Form

- الرزق زي السمك ماعليك الا انك ترمي السناره وانتظر انها .... تغمزTop of Form

- الي كل من يتريق على لبس زوجه د.مرسي بلاش بقى تصدعنا وتوجع دماغنا في خوفك على حريه الناس بتوع لبس البكيني  مبادئ الحريه لاتتجزا

- مشكله الاخوان انهم"جماعه اقصائيه"وعيوب الطريقه الاقصائيه انها بتعمل تكتل قادر وحده على تفتيت اي ديناصور ولكم في الوطني عبره يااولى الالباب

- قالوا عايزين30 %من البرلمان فطمعوا واخذوا 43 %قالوا مش حنزل رئيس في الرئاسيه ونزلواقالوا ستكون الحكومه خارج الاخوان وبيسعوا لتكن اخوانيه

- جمال عبد الناصر والسادات كل واحد فيهم لما مسك الحكم كتير من الناس مكنتش مرحبه بهم اوي لان الطبيعه البشريه بتخاف من الجديد ومن المجهول لكن لما عملوا حاجات في صالح الناس فطمنتهم وجعلتهم يحبوهم فاصبح الاول في نظرهم "زعيم" خالده ذكراه حتى الان ،، والثاني "بطل" للحرب والسلام .... دي مجرد نصيحه ل د.مرسي لعل الذكرى تنفع المؤمنين وان عمله يكون لكل المصريين وليسوا للاخوانيين فقط !

- Top of Form

Top of Form

Top of Form

Top of Form

Top of Form

Top of Form

Top of Form

ياعم دافع عن مرسي براحتك بس والنبي ماتنظفش الطرقه بس وترمي التراب تحت السرير  الرئيس بيربك حركه المرور فعلا فبلاش مزايده بقى وفرعنه

- مش معنى اننا ضد تقديس الرئيس اننا نهينه في شخصه ! دي حتى المعارضه اسمها "معارضه سياسيه مش شخصيه" !Top of Form

- العبره بالافعال لاننا هرمنا من ااالكلام ! شباب النواصي لهم حكمه في الوضع ده"اللي بيعمل مبيقولش واللي بيقول مابيعملش" فدعنا نرى ونسمع افعالك

- د.مرسي في خطاباته وكلامه بيفكرني بللي بيروح فرح ويقعد يعبي الطبق اصناف كتيييره اكتر مما تتحمله بطنه وفي الاخر الاكل بيفضل ويبقى شكله وحش ! فلابد من التعقل وعمل تحليل واقعي لمناطق القوه والضعف له وللبلد علشان يبدا على مايه بيضاء ويبدا صح .

- في نفس المكان (جامعه القاهره) وقف اوباما من اربع سنوات وقال السلام عليكم وقلنا ساعتها ان العالم سوف يتغير وامريكا ستتصالح مع العالم الاسلامي

- اكيد القرءان ده على روح الشهداء اللي الهتيفه في القاعه مكيفهم اوي "الجيش والشعب ايد واحده" ونسيوا ان الاخوان والجيش قاتله واحده

- قسم د.مرسي "وان احترم الدستور والقانون "..... انهي دستور

-  30 يونيه ميعاد تسليم السلطه -(مع اننا عارفين انه حيسلمها كده وكده )- ورجوع الجيش الي ثكناته ياريت برده كل واحد يرجع ثكناته في الاشياء والاعمال اللي بيفهم فيها بل مطلوب انه يبدع كمان فنحن لسنا بحاجه الي غير المبدعين الذين يتكلمون اكثر مما يفعلون  وكن انت التغيير الذي تحب ان تراه في الاخرين

- شايف ان د.مرسي تعلم من اخطاءه الفادحه في اول خطاب والتي صححها في خطابه اليوم اللي اظن انه طمن به ناس كتير خصوصا تركيزه على "الدوله المدنيه"

- مطالبه د.مرسي في اي خطاب بان نعلي من اسم مصر ولا نهتم بالاشخاص لانهم زائلون بيفكرني بام حميده في فيلم ابن حميدو "مش عايزه هتاف خاص عايزه هتاف عام ..... يعيش البحر الاحمر المتوسط" 

- اكتر كلمه بكرهها في ثورتنا هي "ايد واحده" لان ايد لوحدها مبتصفقش ! خصوصا ان من يهتف بهذا الهتاف "ايده" ملطخه بالدماء

- فوز الاخوان بالرئاسه بيفكرني بالمشهد الكلاسيكي في السينما وهو ان "الممثل يطلع على سلم الاعدام وفي ااااخر لحظه يجي خبر الافراج عنه "Top of Form

- مشفق على الحرس الجمهوري موقف اول مره يتعرضوله!تلاقيهم بيقولوا فينك يامبارك كانت مؤتمراتك في مكان مغلق ويؤمن قبله بسنه!بس المنافقين متغيروش

- بالنسبه الي السيدات الموجوده في الميدان مش رجالتهم بردوا قالوا من قبل"انا لااقبل لزوجتي او اختي تنزل الميدان والبيت اشرف لها بلا قله ادب"

- بعد التهريج اللي في الازهر للجمهور اللي متشوق انه يعمل باي باي في التليفزيون! بيحضرني كلمه قيلت عند رحيل جلال عامر"رحل الساخر وبقيت المسخره"

- تعجز كل الكلمات الاباحيه عن وصف مايحدث في الواقع السياسي اللي اصبح مغلف بالتيار الاخواني

- من الحكمه انك تأخذ اللي "بيمثل انه متدين " على قد عقله علشان متوجعش دماغك

- ليه دائما الحريه مفاهيمها مغلوطه عندنا لدرجه ان تنظم مسيره بمطالبه ان"البيره حق لينا "سابوا كل اشكال الحريات المهدده بالانقراض ومسكوا البيره

- هي الوليه المذيعه رشا مجدي اللي هيجت الناس ضد الاقباط في احداث ماسبيرو ايه اللي رجعها تاني  للتليفزيون !!؟؟ولا علشان قضائنا الشامخ طلع الناس بريئه وان هناك كائنات فضائيه هي اللي قتلتهم

- نفسي الناس السازجه اللي بيقفوا يأخذوا صورتين وكل واحد فيهم شايل مصحف وصليب تختفى من حياتنا

- الاخوان فاقوا الجنزوري في اشهر تصريحاته "لن نركع" طب اهم ركعوا وحيحلف امام المحكمه الدستوريه والاعلان الدستوري المحمل"حيكمل"،والبرلمان منحل

- اعداد اي خطبه هناك اولويات في الحديث ! ومرسي كانت اولوياته هي التك توك وليست الثقافه اللي متدهوره في بلدنا ولن تقوم الثقافه الا على ايدي مثقفين محترمين وليسوا اكيد من سائقي التوك توك

- اذا كان د.مرسى قال كذا مره انه حيجيب حق الشهداء ! طب الاولى حق الاحياء في العيشه بدرجه بني ادمين بدلا من ان يتحولوا الي شهداء افران العيش وعباره وغيرها من الاسباب التي تؤدي الي اطلاق لقب شهداء عليهم ! ومش عايزين متاجره باي دم !

- قناه الفراعين دلوقتي بتفكرني بقناه المحور اثناء تنحي مبارك جايبه اغاني ومش عاارفين يقولوا ايه ! طالبه بقى احمد عيد يدخل يشتم عكاشه وحياه الدرديري على الهواء :)

- وعايزين يجيبوا شفيق بدلا من مبارك طب ماهو مبارك سبب خبيتكوا في التعليم اللي خلاكوا هبل في قراءه اللغه العربيه ! قاضي ومبيعرفش يقرا وبيكسر المرفوع ويرفع المكسور! وبيفخم حروف لايمكن تفخم الشعب يريد تعليم القضاه !

- من الكوميديا السوداء اني بكتب سيناريو فيلم عن موقعه وبالطبع كانت دمويه ! تمت في عهد المجلس العسكري قوم وانا راجع من الورشه اتصدم باحتفالات العبيد كان هاين عليا بعد اللي شفته هناك ارمي الورق من ايدي !

- اجمل حاجه ان في حاله فوز مرسي بالرئاسه حيكملوا مشوارهم للنهضه والاصلاح المتعطشه لها بلدنا من زماااان واللي منها على سبيل المثال وليس "الفقع" ! حجب المواقع الاباحيه ، ختان الاناث ، قوانين الخلع ، زواج البنت وهي صغيره ( مش حتكلفك كتير يادوب مصاصه وكيس شبسي!! ) حقيقي يااخوان مصر محتاجه لكم ! حد حيقول لي دول السلفيين مش الاخوان حقول لحضرتك ان عند اجتماع الغربان حيقولوا ايه فده حيقول " واك" وده حيقول "واك "! فالطيور على اشكالها تقع !

- من العجائب االلي هي من سمات بلدنا الاصيله ! ان هناك نوع من البني ادمين يقول لك في المطلق ياعم متدينين ايه ياعم الدين ده مش صلاه وصوم وعباده الدين دين اخلاق ! ولما يعمل فعل ينافي الاخلاق وحد ينصحه يقول له "ياعم هو انت حتعمل فيها شيخ "!!

- الاخوان عندهم شعره في مبادئهم ساعه تروح وساعه تيجي ! شويه يقولوا على د.الاسواني فاجر وبتاع روايات قليله الادب ! وشويه يقولوا الاديب الكبير ! شويه يقولوا ان مينفعش المسيحي او المراه يكونوا في اي منصب في الدوله ! وشويه يقولوا ينفع ! وهم في الاخر عايزين يرضوا الناس مع ان من سعى لرضا الناس اجمعين خسرهم اجمعين !

Top of Form

- يارب تفضل 6 ابريل حركه جدعه ،د.علاء الاسواني الاديب العالمي، وبلال فضل الكاتب الكبير المحترم ومتسقتش تلك الصفات عنهم مع اول معارضه للاخوان !

Top of Form

Top of Form

Top of Form

- بقى من الطبيعي جداااا ومن العادي اننا نشتغل مع ناس مش "ملتزمه بموعيدها" ويظهر ان الملتزم هو اللي بقى مش طبيعي !

- من السزاجه ان هناك من يصدق ان العسكر حيسيب السلطه في 30 -6 !! هو فعلا حيسبها "شكلا" لكن عمره ماحيسبها موضوعا !! العسكر متغلغل في كتيييير من النواحي الاقتصاديه ! وقدمنا سنين عقبال لما نتخلص منه نهائيا ويرجع بجد الي ثكناته ! ودليل انه حيفضل مكمل معانا ان شفيق استأذن المشير انه ينزل الانتخابات والمشير دلوقتي بيفرش الارض رمل لشفيق لانه واحد من العسكر ومتلم عليهم واتلم تنتون على متنتن طلعوا الاثنين انتن من بعض !

- لما تقف عند الاوبرا وتنظر الي الامام حتشوف خازوقين كبااااار واحد اتعمل بعد ثوره 52 باربع سنوات ( برج القاهره) !! والتاني اتعمل بعد ثوره 25 يناير ب4 شهور ( برج الثوره اللي اخره علم مصر ) !! والاثنين من العسكر !! ياترا دي صدفه ! ولادي من عجائب القدر الذي لايبقى ولايذر!!

Top of Form

- ومازال بعد سنه ونصف من الاخطاء والف والدوران ودهاء العسكر هناك من عنده الرومانسيه الثوريه والدبدبه على الارض !! ومش عايز يصدق ان الثوره اسلوب حياه ولعبه سياسيه مش شوارعيه ! كلنا لازم نجهز للفتره الجايه ونكون A1 من الوعي والدهاء وفن المراوغه "السياسيه"

"- التاريخ بيني وبينك والعسكر حينقلب على السلطه "
حازم صلاح ابو اسماعيل
ياجماعه تناسبا مع هذا التصريح القديم والخطير الذي يتداوله انصار الشيخ احب اقول لكم معلومات تانيه ان ايام الاسبوع 7 ايام ، والشهر فيه 30 يوم واحيانا 31 ! ، والقاهره موجوده في مصر ! والمياه بتنزل من الحنفيه واحيانا من الطرمبه !

- قالوا قديما "اكبر منك بيوم يعرف عنك بسنه" والشعب هو الاكبر والجماعه هي الاصغر سننا كان المفروض تسمع كلام الشعب ولا هم كانوا عاملين طرش !

Top of Form

- هناك ناس تعيب على "عساكر الامن المركزي" وهي صوره تبقى الاصل منهم ! في ترديد كلام "حافظi مش فاهمi" خصوصا اذا تعلق الامر بالدين !

- الي كل من يريد ان ينتخب مرسى بعد اذن سيادتك متضحكش عليا وتقولي "مرشح الثوره" خصوصا ان اصلا اصلا انه مرشح الجماعه اللي تخلت عن الثوره ولا نسيت محمد محمود ، ومجلس الوزراء واحتفالاتت الركوب على الثوره ثم ان الثوره كلمه مش محبوبه عند القائمين على اداره شئون البلاد! وافتكر لما قلنا على عصام شرف رئيس حكومه الثوره كان مجرد "خيال مأته" علشان يقولوا للناس ان اختيارات الثوار ملهاش اي لزمه وان الدهن في العتاقي !!

Top of Form

Top of Form

- اللي حينتخب مرسى ، او شفيق بلاش وهو عاصر على نفسه لمونه كده يدوقني طعمها لاني عارف طعمها كويس "مزه اااوي "! انتخب وانت ساكت لانك اصلا معندكش اي مبررات جزريه ده اختيار بمنطق رد الفعل والخوف ! وايضا اختيار اصلا اصلا من بين افضل الوسخين ! يعني حضرتك مش حتختار ملاك ! بس على راي بيشوي صاحبي "الحساب ميزعلش " حساب الاخره يعني !

- عمرو خالد بعد مشاركته منتدى اهل مصر ، وتأسيسه لحزب ! عليه ان يختار ان يكون اما رجل دين او رجل سياسه لكن العمل بفكره الشيكولاته باللبن متنفعش

- عمرو خالد مؤسس حزب مصر المستقبل ، الشيخ حسان داخل في السياسه من اول الثوره ، صفوت حجازي بيهرتل من اول الثوره وهارينا كلام في السياسه اشبه بكلام عكاشه بس على وقار شويه ! ، خالد عبدالله راشق برده في اي كذبه وادعاء وافتراء على خلق ربنا ! والشيخ البلكيمي دخل السياسه ومنخيره كبرت اكتر من الكذب ، والشيخ على ونيس وبنت اخته اللي بيقبلها في الطريق العام ! وغيرهم وغيرهم طب دول اتكلموا وافتوا في السياسه وخربوها ! مين بقى اللي حيدعوا الي ربنا والموعظه الحسنه !!

Top of Form

Top of Form

Top of Form

Top of Form

- ‎"الجماعه"عجوزه وعندها 84 سنه وبتدلع على الناس وكأنها مراهقه تحيط بها الاخطاء وعدم الحكمه!بيحضرني مثل شعبي ظريف ادلعي ياعوجه في السنين السودا

Top of Form

- في عصر الغش في الثانويه العامه عن طريق تويتر يمكنك ايها "الغشاش" فعل التالي : بدل ماتسخدم الطريقه التقليديه من تداول البراشيم ، وكراسات الاجابات قم بعمل "ريت تويت" للاجابه ، ولو التويته مكفتش لانك محكوم ب 140 حرف اعمل تويته اخرى فعندك عدد لانهائي من التويتات بدل كراسه الاجابه التي لاتتعدى 12 صفحه !وعندما تجد ان رصيدك خلص قم بشحنه بسلفه 3 جنيه بدل ماتستلف قلم زميلك ! ولماتخلص عش قم بعمل sign out لحسابك !وكده جبرت!

Top of Form

- احنا عايشين في احداث فيلم سينمائي يعجز عن كتابته كتاب افلام الخيال العلمي !! ويصعب على اي كاتب مبدع انه يكتب افلام يبهر ويفاجئ بها الجمهور!

- واحنا صغيرين كونا بنقول بالنطق الطفولي "الشتيمه تلف تلف وترجع لصاحبها " وها بعد ماكبرنا تثبت صحه هذه المقوله ! فعندما قلنا ياجمال قول لابوك كل الشعب بيكرهك لفت دلوقتي ورجعت لنا والشعب كرهنا احنا وثورتنا !! الفساد لادين له

- شفيق رغم ال35 بلاغ اللي اتقدموا ضده الا انه مازال عايش مطلق الصراح !! ها ها انه ابراهيم الابيض !

- مبارك اخذ مصر "حق انتفاع" لمده 30 سنه ! ووفقا لعقود حق الانتفاع يتم رجوع الشئ للدوله زي الاول واحسن من حيث الجوده ! وبما ان مبارك اخذ البلد وهي خربانه لاننا كنا طالعين من حرب ازهلت العالم فرجعها خرابه اكتر من الاول بكتييييير وكفاءه على اللي عمله طلع براءه ! وكأنه معملش حاجه وتعامل معه القضاء ودوله الفساد بمبدا عفى الله عمى سلف ! واحنا ولاد النهارده !

- "ده لو كان اتمسك بتمنايه (حشيش يعني) كان خد التأبيده المتن....! دي"
واحد من كبار السن الساخرين اللي في الميدان:))

- دلاله العداله اللي الست معصوبه العينين الصراحه معبره جدااا وهي ان "العداله عامله عبيطه" !Top of Form

- في ناس معرفتها بالثوره تشبه معرفتها باللغه الصينيه فلاتسطيع قراءه معني كلمه حريه ولا كتابتها بدمائهم فقط يرددونها ! فيقولون مالا يفهمون!

Top of Form

Top of Form

- للاخوان "اخطاء" وللعسكر "خطايا" وكلاهما ضاع بسببها حقوق!! بسبب الانانيه فكان واجب الاخير حمايتها ! بس حتعمل ايه يموت الطبال وصوابعه بتلعب !

Top of Form

- في اوروبا والدول المتقدمه اذا حدث فيها ثوره اذهلت بها العالم اجمع سوف تكرم شهدائها وتسمي شوارع باسمائهم ! لكن عندنا اكتفى المكلفين باداره شئون البلاد بوضع صورهم على اكياس المناديل ! تلك المناديل هي اصدق شئ تمسح به الجريمه من جذورها حتى اطرافها ! حتى نرى القاتل يقال له "برااااءه"!

Top of Form

- من سينتخب شفيق وحجته الحفاظ على شكل الدوله عنده حق فهو حيحافظ على شكل "دوله الفساد"!

Top of Form

- مافعله العيان بالميت هو انه .....موته اكتر !

- قلبي قلب شاب وعقلي عقل شاب وشكلي من كتر الهم كأن راجل في اخر عمره شعره شاب !