منخـــــــوليــــــا !!

دائما ومش غالبا من يحارب الظلم ..... بيتظلم !

- بما ان احمد شفيق قال ان حسني مبارك مثله الاعلى ! يبقى ااكيد حيكون شعاره في المرحله التاليه " على خطى الحبيب"!

- كلا من شفيق او الاخوان زعلانين ان في هجوم عليهم من اي قوى ثوريه كانت او ليبراليه او حتى من ضرب الملوخيه -( دي منطقه في السيده عائشه)- طب ماهو اللي بيحب الدح ميقولش اح !

- عجائب العجب في ناس تشكر في د.الاسواني بسبب انه دعى الي دعم الاخوان! بالبلدي الكلام على هواهم! مش هو ده برده اللي بتاع روايات قليله الادب!

- في ناس بتقول ان الاخوان جماعه مدعومه من ربنا ! طب لما يفشلوا بقى (وده اكيد) يبقى ايه وضع الداعم (ربنا يعني)!؟ دخول الدين في السياسه اهانه

- هو اللي بيشكر في الاخوان او شفيق علشان يبرر انتخابه لاحدهما ! هو سيادتك عرفتهم منين!؟ ده حتى المثل بيقول عشرت فلان قال لا ....يبقى متعرفوش!

- طول عمري بقرا وبسمع عن صناعه الدكتاتور وازاي بيتحول من جحش صغير الي ديناصور رغم فرق السلاله ! والان بدات صناعته ! برده من راى ليس كمن سمع !

- الثورات على مر التاريخ لم تكن ديمقراطيه لانها تهدم مافات وتبني حسب رؤيتها هي وهذه ديكتاتوريه والتغيير يتطلب كده اصلا لان الناس بتحب الانتخه

- مرسي وشفيق كلاهما عند وصول احدهما الي الحكم حينفذوا برنامج غير برنامجهم !الاول للشاطر والتاني لمبارك ومش بعيد كمان شفيق يعمل معرض وعد فاوفى!

‎- "قول ماتخفشي العسكر لازم يمشي " حيمشي حيمشي بس حيسيب لنا حد من رحته يفكرنا بهمجيته !!

- حقيقتان تطاردنا خلال تاريخنا كله ! الاولى ان وظيفه الحاكم في بلدنا بالتعيين مش بالانتخاب !الثانيه ان بعد ان يعين مبيطلعش الا بالطبل البلدي !

- حد فكر وتأمل الصوره بتاعه "الجيش والشعب ايد واحده" في ان الطفل المحمول ده الشعب وعلشان هو طفل فحيجبولوا اب(احمد فشيخ) يعيد تربيته من جديد !!

- هو سؤال الي كل من يسنتخب الاخوان وفاكرهم ملائكه ! هما مش دول سبب القرف اللي احنا فيه ده وخلونا بقينا مسخره العالم في التاريخ وذلك بسبب حشدهم ودعوتهم الي "الترقيعات" الدستوريه بقول ننننننعم لدين ربنا بما سماها التيار الديني بعد ذلك "موقعه الصناديق"!                 
طيب ازاي تنتخب جماعه تعشق الاحاديه واقصائيه ولاتقبل اساسا براي الاخر وزيها زي الفريك مبتحبش شريك ! لو فاكر انك بتحارب شفيق بالاخوان فكده يبقى عليك واحد !

- الي كل من انتخب احمد شفيق علشان الاستقرار .... ها ها "عليك واحد"!

- كأن الايه بتوصف حال اخونا البعدا اللي اصبحوا كتييييير !!         
"وَإِذَا قِيلَ لَهُمْ لاَ تُفْسِدُواْ فِي الأَرْضِ قَالُواْ إِنَّمَا نَحْنُ مُصْلِحُونَ"
وللاجل الحظ الايه في سوره "البقره" شفت اجمل من دي صدفه 

كلنا لابد ان نسبح ونمشي ضد "الطيار"!

- "هناك صدمات لاترهق نفسك للتفكر فيها لانه سيولد لديك الوعى القادر وحده على توليد ألام قد تكون في غنى عنها

- اظن ان الفتره اللي جايه "الاطباء النفسيين" حالهم حينتعش ااااوي !! طالما المحامين فشلوا

- كل واحد يقول اشمعنا انا                      
- عمرو حمزاوي يقول اشمعنا حمدين يتنازل عن مواقفه طيب ماتخلي مرسى يتنازل لحمدين !
ونادر بكار يقول اشمعى مرسى يتنازل طيب ماتخلي ابو الفتوح يتنازل لمرسى !
احنا بقى نقول اشمعنا احنا يحكمنا ناس مبتفكرش غير في نفسها مش في الوطن !!

-فضلت الناس تدعي وتقول اللهم ماولي من "يصلح" واكيد كانت نيتهم مش حلوه وكان قصدهم من"يصلح"ماافسده الثوره !!فجه احمد شفيق

-منطق البعض في اعاده اختيار النظام القديم المتمثل في شفيق "من فات قديمه تااااه" ، ومنهم من يقول"اللي نعرف قمعه احسن من اللي منعرفوش"!!

-قعدنا سنه ونصف نقول عايزين قائد لنا يتحدث باسمنا فلم نجد الا "الخوف" ليكون قائدنا وسيد مواقفنا ! حتى اوشك على انه يموتنا ويقضي علينا !

-لما تقف عند الاوبرا وتنظر الي الامام حتشوف خازوقين كبااااار واحد اتعمل بعد ثوره 52 باربع سنوات ( برج القاهره) !! والتاني اتعمل بعد ثوره 25 يناير ب4 شهور ( برج الثوره اللي اخره علم مصر ) !! والاثنين من العسكر !! ياترا دي صدفه ! ولادي من عجائب القدر الذي لايبقى ولايذر!

-عمليا كده لو بصينا لنصف "البرميل المليان" حنقول ان الثوره نجحت لسببين اولا/ اكتر من 10 مليون ناخب صوتوا للثوره المشكله في التشتت يعني الناس فعلا مع الثوره .. ثانيا / الفرق بين حمدين صباحي وشفيق حوالي 3% يعني شفيق بفلوله وبفلوسه الفرق بينه وبين مرشح الثوره مش كبير !! علينا دلوقتي نفكر في حل بديل لان الحل البديل زي قطبان القطار بيحفظ توازنه

مرشحين " الماريونت "!!

مشهد من الاوبريت العملاق "الليله الكبيره" للعملاق صلاح جاهين ممكن يلخص لك الحاله اللي بتعشها "بلدنا الكبيره "مع مرشحنها والمشهد كالتالي رجل يستعرض عضلاته في السيرك ويقول "أنا شجيع السيما أبو شنب بريمة ... أول ما اقول علي هب واصرخ لي صرخة ها .. ها .. ها السبع يتكهرب ويبقى فرخة "! فالمحرك بتاع عروس الماريونت لشجيع السيما ده اراد بحركات معينه يوصل لنا صوره ورساله انه ده شجيع السيما بجد وذو قوه فتاكه قادره على كهربه السبع ويصبح فرخه ! هذا المشهد يشبه بالمللي قوتين تسعى كل منهما وبكل مااوتي لهم من قوه الي تحريك "مرشحين ماريونت " فتحركهم ذات اليمين وذات الشمال ومرشحهم باسط ذراعيه ليحي جماهيره المحشوده بالامر المباشر !! قوه ، وجماعه تدعم اشخاص بعينهم لينفذوا لهم اهوائهم وتفكيرهم الذي اظن انه شيطاني لتكون في النهايه البلد بلدهم واهلها فقط في خدمتهم ! ، هذه القوتين هناك تشابه بينهم كبييير في افكارهم واختلاف في افعالهم للوصول لاهدافهم ولكن تتعدد الاشخاص والافعال والفكر واحد "الفكر الفاشي" الذي يدرس في "المدرسه النفعيه" ، سواء مورس هذا الفكر بالدين او مورس بالعسكره ! .

اما عن "الفاشيه الدينيه" التي ترشح وتدعوا الي انتخاب محمد مرسى فهي جماعه اقصائيه لدرجه يعجز عن تخيلها المخرج العالمي ديفيد كاميرون مخرج فيلم الخيال العلمي الشهير "آفاتار"!!  فهم يحبون انفسهم ويسعون الي جذب من يشبهم فقط من من لايجادل ولايناقش! ، واللجنه التاسيسيه للدستور اللي كان شعارها "اما انا او الفوضى" وكانت الفوضى هي الكسبانه فاصبح ولاهناك دستور ولايحزنون واتهد المعبد عليهم وعلينا ، فيترشح المرشحون وينتخب الناخبون دون معرفه صلاحيات رئيسهم القادم ! ، هذه الجماعه "بتشتغل" الغلابه الطيبين - وللاسف منهم متعلمين ومتنورين - ذو القلب الطاهر البرئ "بمشروع النهضه" تلك الكلمه التي تشبه كلمه "الاستقرار" بما لها من نفس التاثير هو الضرب على القفا ! فمشروع النهضه هذا لا يوضح اي معالم سوى انه فقط يحقق في مجمله معدل تنميه 7% ! ال 7% اللي  ثورنا عليها في نظام مبارك ! ولما تتحدث معهم يقولون ان ال7% دي تنميه حقيقيه شامله وليست تنميه كده وكده ! مع انها بحق وحقيقي وعن جد تنميه كده وكده لانه كلام عبثي تعبيري انشائي ممكن ان يجتازوا به درجه امتياز في "كليه الدعوه او كليه دار العلوم "! لانه كلام .. فقط كلام دون توضيح اليات التنفيذ وطريقه تحقيق الهدف! وخد جانب من كلامهم لحسن يقولوا اني ضد الدين وضد شرع ربنا لاسمح الله !:- (التحول السريع والشامل من اقتصاد ريعى الى اقتصاد قيمة مضافة فى اطار مجتمع المعرفة والإنتاج من خلال مائة مشروع قومي يفوق كل منهم المليار دولار ، يضمن مضاعفة الناتج المحلى الاجمالى فى خمس سنوات - <خلي بالك خمس سنوات ودول شكلههم جايين على بيات للابد هي مش مده الترشح 4 سنوات ولا دي الشت منهم ! ولا هما ناويين يقعدوا علشان "صيانه النهضه" بتاعتهم دي الي الابد!؟  >- بمتوسط معدل نمو سنوى بين 6.5 % : 7% ،، دعم وتمكين المرأه المصرية وافساح الطريق لها للمشاركة المجتمعية والسياسية وأولويات العمل الوطنى والتنموى ،، استكمال بناء النظام السياسى الى اعادة هيكلة الدولة المصرية العميقة وتحويلها من دولة مهيمنه الى دوله مؤسسات ممكنه ذات اركان واضحه المعالم ، لها صلاحيات محددة تحترمها ولا تتجاوزها مع التأسيس لمبدأ التكامل بين السلطات التنفيذية والتشريعية والقضائية والتأكيد على استقلال كل سلطة فى أداء دورها -< كأنهم بجد حيعيدوا اختراع العجله وحيبنوا دوله من اول وجديد دولتنا اللي عمرها 7 الاف سنه حيجوا يبنوها من الاول وجديد !! والاعجب من كده ان بين كل بند وبند يستشهدون بأيه من القرءان الكريم وكانه "برنامج ديني" مش "برنامج انتخابي" ! ومصممين يربطوا المطلق بالنسبي والمتغير يعني لو فشلوا مثلا يبقى كده الايه اللي كتبوها دي ايه باطله لاسمح الله !!؟؟>- ) هذا كان  جزء من البرنامج الانتخابي لهذا المرشح الذي يعد ناخبيه الي انه سيتجه بهم ليركبوا ويتجهوا الي "النهضه والسلام"! ولو عايز تعرف اكتر دور عليه تحت السرير حتلاقيه طالعك من كل مكان يقولك نهضه نهضه فقط ترديد للكلمه دون اي محتوى او معنى لها بيفكري بالظبط "بمشروع توشكى "والمشترك بينهم ان الاثنين عباره عن "اشتغالات"!! لذلك فمن رايي ان هذا "المرشح المخلي "من صفات اي رئيس لاينفع لان يكون حتى رئيس مصلحه الضرائب بالرغم من شعارها "مصلحتك اولا" ! .

نيجي بقى للقوه الاخرى والاب الروحي والرجل الاول اللي ظهر وجهه في نهايه ثورتنا الدراميه دي وتاكدت لنا الشكوك من وجود علاقه غير شرعيه بينه وبين القوى الدينيه وطلع هو من يحرك الرجل الثاني (الاخوان) ووخدهم على حجره ولما اختلفوا حب يتخلص منهم فراحوا مستولين على كل حاجه ومنها ترشيح مرشح لهم للرئاسه بعد نفيهم اكثر من مره انهم لن يرشحوا احد من عندهم ! - (واللهي كاني بعيد كتابه سيناريو فيلم الراجل الثاني لرشدي اباظه عصمت كاظم الرجل الثاني ، الفنان عبد الخالق صالح الرجل الاول ) - هذه القوى لاتريد ان تبقى تحت سيطره احد وهذا ماهو ظاهر منذ اليوم الاول من تكليفهم باداره شئون البلاد وتمر الايام وتتكشف الحقائق وتنكشف حقيقه مهمه جدا وهي ان "اللي كلف ماتخلعش" وكل الشواهد بتقول كده فهو يده "خشنه وقويه وكلها قسوه " على الشباب الثائر الحق الذي يريد ان يهدم الفساد اللي لسه متهدمش ، اما على اللي ولاه ولايه ابوه مبارك فان يده "ناعمه وهينه وكلها حنيه "! فهذه القوى تسعى الي معالجه "التصدع" الذي حدث في نظام السيد الوالد ! فعندما هتف الشعب بانه يريد اسقاط النظام فانه لم يسقط بل تصدع فقط وهو قابل للانهيار في اي وقت لذلك فقد اراد المجلس العسكري ان يحافظ على هذا النظام من الانهيار لان انهياره بالنسبه له فهو انهيار له شخصيا !! لذلك فقد سمح للفريق احمد شفيق ان يترشح بالنيابه عنه وبشكل غير معلن انه مرشح المجلس العسكري ثم يحركه كيفما يشاء فهو لايمكن ان يعارض قرارات رؤسائه والا حاكموه محاكمه عسكريه ليس فقط لمخالفه الاوامر بل لانه  لص سرق ونهم في عصر الملايين الكتيره الذي يريد ان يرجع امجاده مره اخرى بس الزمن مبيرجعش لورا لانه فقط وان واي .وللاسف هناك من ينتخبه لانه فاكر انه حيرجع الاستقرار بصرف النظر عن السرقه وهناك ايضا من يدعمه وينتخبه عندا في الثوار اللي مكنوش عايزين حاجه الا مصلحه الوطن اللي هي فوق مصلحه الجميع .

عنــــتــــر جــــبنـــــه !

بسبب الموقع الجغرافي المتميز لبلدنا فعدى علينا تقريبا كل خلق ربنا ! فكل لما حد يروح او يجي شرقا او غربا يقوم ياكل لقمه ويشرب الشاي وتعجبه ست الحسن والجمال فيتجوزها و يريح عندنا ويقعد اقل واجب 70 سنه ثم يتطلع الي حكم البلاد وعندها تختلف المسميات في تسميه الحاكم منها الخليفه ومنها الملك ومنها الريس واخييييرا "عنترجبنه" وعنتر جبنه ايها القارئ العزيز هو اللي جوه بيته يعمل دكر وبره "يركع" للي يسوى واللي ميسواش! يستقوى على مراته وعياله وبره بيته على بعد عده امتار خارج بيته ويمكن على بسطه السلم "الناس الملثمه" تديله على قفاه عشرات المرات وتطلع لسنها وتجري! حزر فزر مين اللي انا اقصده ده ، لو تعرف ممكن تتصل بمجلس الشعب لتخبره انك قد عرفت الاجابه الصحيحه لكي تربح مروحه تهوي بها على بض.....!!! بس للاسف مش حتلاقيه بيرد عليك لانه ربما يكون مرفوع مؤقتا من الخدمه اومشغول بخدمه غيرك "خدمه اصحاب السمو الملكي"! لذلك فسبني بمنتهى الدكتاتوريه اجاوب بالنيابه عنك لانها مش ناقصه اللغاز من عينه مين اللي ضرب وذبح المتظاهرين والالتراس في محمد محمود ومزبحه بورسعيد!؟؟ فتكون الاجابه الاكثر غباء وسزاجه "الطرف التالت" من غير مانعرف هويه هذا الطرف ! ، بجانب اني اصلا مش واثق من وصول اجابتك الى مجلس الشعب لانه لايعبر ولايستمع الي الشعب ! وحتى اذا وصلت فلن تعلن لانهم حيدخلوها لجنه بعد لجنه حتى ينسى الامر تماما! ومش بعيد انسى انا شخصيا السؤال اساسا فعلشان مندخلش متاهه "طنطاوي بابا" دي فعنتر جبنه ده هو "المجلس العسكري" اللي هو"الطرف الثالث"!! - ( اوعي تكون اتخضيت او مش مصدق لانك لو اتخضيت حتشبه خضتك في كل مره تكتشف ان محمود المليجي هو زعيم العصابه في فيلم "بطل للنهايه" بتاع فريد شوقي مع انك شفته مئات المرات ومع ذلك بتتخض!! ، او تتخض لما تكتشف ان الرجل التاني هو رشدي اباظه مع انك شفته ملايين المرات !!)- اللي مش بيشيل سيفه ويرفعه الا على اهل بلده في ادعاء انه بيحمي الاهل من بعضهم ! ، بيحميهم من البلطجيه اللي هو مسرحهم وبيدعمهم ، وصبيانه اللي بيتعامل معاهم لكي يطلعوا الي مأذنه "مسجد النور" يضربوا كام رصاصه لفرح بنت العمده ثم يطلع العسكري يقفشه بمنتهى السهوله بدون تبادل اطلاق نار ويقوم يخدوا بعض بالاحضان وياخذوا صوره مع بعض للذكرى ثم يضرب تعظيم سلام ! ، المجلس العسكري اللي مشغل كل "صبيانه" في الاعلام لكي يقتلوا الناس "ببق" رجل واحد وعلى كلمه واحده " دي عيال بلطجيه يريدون اقتحام وزاره الدفاع !" - (من ضمن البلطجيه اللي بيدعي عليهم هذه التهمه البشعه صديقي "احمد صبري" وهو زميل" جمعه الغضب" شاب جميل يعمل في شركه مايكروسوفت ومطور برامج وبالبلدي كده مستريح ماديا واجتماعيا ولكن هو مشغول بشده بمستقبل البلد وللاسف هو ده عيبه ان الوطنيين يسموا بلطجيه والبلطجيه يسموا وطنيين !! ولاعزاء للاغبياء )- الخبر في حد ذاته لايقبله اهبل ! ، حتى اللي بيفخر بعدم انتمائه للبلد برده لايرضى بالاقتحام لانها في الاخر امه فهو يدعي على امه بس يكره الي يقول امييييين ! لكن ده لو اصلا الخبر صحيح لان مشفناش ولا سمعنا اي حد من "شهود العيان"اللي بحق وحقيق - (وعلى راسهم د.ايه) - بيقول انهم حولوا يقتحموا الوزاره لان اصلا اصلا اقتحامها مش حتزودهم حاجه ولا حينقصهم ولاهدفهم انهم  يطنطتوا على الكنب والمكاتب !!.  

ولان الحدايه عمرها ماحتحدف كتاكيت فالمجلس العسكري دحلاب وذو دهاء ومكر عالى الجوده ومستورد من امه امريكا هانم اللي بتجمعه معها علاقه في الحرام ! فهو بيستخدم غطاء من عينه "هيبه الجيش ، وطنيه الجيش"اللي محدش يقدر يقول عليه غير كده ليتخفى وراءه لكي يفعل مايريد في الوطن وبالجاهلين ! فهو لايفعل اي فعل بدون ان يعرف بل يكون متأكد من نتيجه فعله في الخطوه التاليه ! ، يستخدم غباء وسزاجه البعض لكي ينفذ خطته التي لايعرف احد اي معالم لها حتى الان سوى انها تثبت انه ليس وطني ولايحزنون وانه يسعى لاهداف شخصيه تتمثل في حكم البلد سواء بطريق مباشر منه شخصيا كما حدث بعد ثوره يوليو التي يتم تفيذ معالمها واولها قرار المحكمه الاداريه العليا بتأجيل الانتخابات ويالعالم حترجع تاني تتعمل ولا لا !! او بطريق غير مباشر بواحد من عينته وفصيلته "يطرمخ" له ويحميه ! ، وتعالى كده استرجع معايا تاريخ المزابح والعركات اثناء "الفتره الانتقاميه " واللي في كل عركه يكون لها رد فعل لحسابه الشخصى ! فعلى سبيل المثال "عركه محمد محمود" كانت لصالح مجلس الشعب اللي خلاه "شرابه خرج" لايثمن ولايغني من جوع ! لانه بالنسبه له مجرد ارضاء لتيار كان واخده على حجره يستخدمه لضرب باقي التيارات الاخرى ليعلى من شعاره" فرق تسد "! ثم يترك الاحزاب تدخل المجلس على مخالفه انها مؤسسه باساس ديني ثم يحتفظ في درج مكتبه بقرار المحكمه الدستوريه العليا لحل المجلس عندما يخرج عن الدور اللي مرسوم له في هذه المسرحيه الهزليه! ، والان نرى عركه العباسيه اللي دقت فيها طبول الاعلام وولوله الناس دفاعا عن جيشها اللي محدش اصلا قرب له ! وذلك ليكون ذريعه وسبب لكي يضرب اي حد على قفاه وساعتها حيكون له الحق في ذلك "انت مش تعديت على جيش بلدك يبقى تستاهل كل اللي يجرالك "! ، ولان كل مصيبه تحمل في داخلها فرصه ففرصه المجلس في "المصيبه اللي صنعها" دي ان يدعم مرشحين بعينهم من من يقول امين وتمام يافندم ومن قبلها يستاذن المشير لكي ينزل انتخابات الرئاسه قصدي لامؤخذه احمد فشيخ ! .

ارجوا بعد هذا الرغي الكتير اننا نتخلص من الغمامه اللي على عيون البعض ومن المصيبه اللي موديانا في داهيه الا وهي الخلاط للي بنخلط فيه بين المجلس العسكري والجيش ! زي خلط البعض بين الاخوان والاسلام مع ان كل منهما لايمثل الاخر ! ومحدش يقول ان المجلس حمى الثوره لان الحامي هو ربنا واصلا اصلا مفيش شئ مخيف هو حماه منه لان الجيش يحمي "شرعيه السلطه" اللي هي سقطط منذ اليوم الاول للثوره عن مبارك وتحولت الي الشعب ! ومحدش يقول هو انتوا عايزينه يكون زي سوريا وليبيا حقول لحضرتك هو ده الطبيعي من جيش بلدي لان بشكرك له انه مش خاين زي بالظبط اللي بيشكر زوجته انها مش خاينه ! وبرده شغلته انه يحميني ويعمل عنتر كمان بس مش عليا على غيري ! .سلامات  

شمال اااااوي !!

كتب د.علاء الاسواني في روايته العبقريه شيكاجو شخصيه "رافت ثابت" الذي هاجر من مصر الي امريكا في الستينات بعد ان تم تاميم املاك ابوه وعاش وتعايش مع الامريكان حتى اصبح واحد منهم  ليس بسبب اتقانه للغتهم ولكنتهم ولكن "لادائه" المصتنع في اقناء الاخرين انه ليس مصري وعربي بل انه "شيكاجو"ووصلت قمه تطرفه انه اصبح يكره اي شخص من ابناء بلده ياتي للدراسه الي الجامعه التي يعمل استاذ بها ، وحينما احبت بنته شاب "صايع" وعاشت معه في الحرام ظهر اصله العربي متمثل في غيرته العربيه الشرقيه الشديده على اهل بيته وبرغم هذا انكر ان يكون رفضه لعلاقه بنته بالشاب نتيجه هذه النزعه الشرقيه وان الموضوع بالنسبه له عادي لانه "شيكاجو"!! مش عارف ليه "كلنا رافت ثابت" في تطرفنا وانحيازنا لاي فكره او موقف جديده نتعرض له بل ونعلن الحرب على القديم ونقول بانه كان خطا ومتخذه على معصيه سواء معصيه فكريه او عقائديه! حتى دون اعمال "العقل" بل فقط "بالقلب" دون حتى اتخاذ موقف وسط وحيادي بين القديم والحديث! واظن ان هذا لسبب واحد ووحيد واوحد ان اتخاذ المواقف تم صدوره من المنطقه الخطا الا وهي "القلب" الذي لايعرف المنطق بل ان تطرفه وانحيازه لاي فكره وموقف بيكون "غبي" ويؤدي في النهايه الي صدام ! فاذا كان رافت ثابت الذي لم يثبت على حال واصبح مشتت ثارعلى اصوله ثم عانى بعد ذلك منها واصبح مشوه في موقفه ! فهناك ايضا من يثور ويتطرف على "الفكره والاعتقاد" الذى انتمى واقتنع به "ظاهريا" وليس "جوهريا"  وحينما يرى ان الفكره اصبحت (Old fashion)  ولم تعد تعجبه تركها واصبح من اشد المعادين لها وبمعتنقيها  وبكل قوه كمان! وهذا نتيجه كما قلت ان اعتناق الافكار ااتى من المنطقه الخطا !! فنرى مثلا شخص عجبه الفكر السلفي قام "قلد" السلفيين في الشكل والمنظر دون النظر الي الجوهر حتى اصبح واحد منهم وتجول بين الناس لينشر "ماسمعه" من الشيوخ ويمكن كان المحفز له احترام الناس له نظرا للحيته او جلبابه او لاننا متدينين بطبيعتنا - (او هكذا نعتقد) - فبنحب اي شخص متدين ! وعندما عجبه الفكر الليبرالي لتعطشه للحريه وفاكرها حريه جنسيه! فعادى الفكر السلفي بكل قوه وقال بانهم متطرفين "وبيخنقوا" على نفسهم وعلى اللي حوليهم ! والعكس بالعكس ! او نرى بنت عجبتها "لفه" ايشارب معينه وعجبها المنظر قالت اتحجب "وتطرفت" في اقناع زملائها التي تراهم " متبرجات " كما قال لها الشيخ التي سمعت له ! ثم حينما ترى ان الحجاب مجرد خنقه ومقيد لحريتها - هكذا تعتقد - ولم تعد تنال حب واحترام اصحابها اللي كانوا متبرجات في نظرها ! خلعته واصبحت "متطرفه" اكثر في شكلها ولبسها اكثر مما كانت قبل ان تتحجب لتحاول اثبات انها لم تعد مقتنعه بهذا الفكر وانها من ضمن اصحابها واصبحت من اشد المعادين للحجاب بل تنتقد المحجبات بكل قوه  وتراهم "متخلفين" ! وبرده العكس بالعكس ! وكله كوم ومدعين الثوره كوم تاني اللي منهم من كان من "اشد المعادين والمتطرفين" لفكره الثوره وكانوا بيحربوها من قريب ومن بعيد بشتى السبل والوسائل - (ومنهم من افتى بعدم المشاركه لعدم الخروج على الحاكم )- ولما نجحت قاموا قائلين احنا كنا في الميدان من الاول وكلنا ثورجيه ومعا لبناء الامجاد ! علشان كلنا في الهنا نبات ! ولما الثوره جت مش على هواه ومزاجه قام "تطرف " في موقفه ضد الثوره واصبح من هو يملك الحقيقه وجاب الديب من ذيله !

الي كل "المتطرفين" واللي مش بيثبتوا على راي ومبدا ومشتتين وليسوا الي هؤلاء ولا الي هؤلاء كلمه في ودنكوا الحياه عمرها محتكون ابيض وعمرها ماحتكون اسود لان الحياه وسط بين الاثنين "رمادي" اللي بيليق على اي لبس J ، والانحياز الي الافكار مقبول بس بحدود "وبالعقل"لان العقل هو المصدر الصحيح لانطلاق الافكار واتخاذ المواقف لان البني ادم موقف والموقف يتخذ بعد قراءه وتاني وهدوء وسماع كل الاطراف حتى يتم اتخاذ الموقف السليم وبرده "دون تطرف" وتكفير الاخرين والمحاربه لاثبات انهم على ضلال وخطا لان رايك صواب يحتمل الخطا وراي غيرك خطا يحتمل الصواب كما قال الشافعي ، الي جانب ان اصلا اصلا الحق صوته عالى فمفيش داعي يكون صوتك انت كمان اعلى بتطرفك لحسن يطرش الناس ويبقى عاهتهم ذنب في رقبتك !! واذا كنا مشتاقين الي الصوت العالي فلنعلي من "صوت الوسطيه" لانها سمه اساسيه من سمات البني ادمين الطبعيين !