التحــــــــرش النفســـــــــي !!!

حدث مره ان سواق تاكسي "ذنق" على بنت "غصب" عنه على عربيتها بس الصراحه كانت جميله :) بس حنقول ايه زي ماقال ارسطو "تكلم حتى اراك"! ويارتها ماتكلمت - كنت على الاقل ححتفظ بالصوره اللي كانت في خيالي !!- اذ لقيت قنبله من الشتائم والرديييييييييح انفجرت وانتهت بالكلمه الاكثر شهره ! " انت فاكر نفسك ايه ده انت حته "سواق تاكسي " !! كأن سواق التاكسي ده مثلا "انسان الغاب " ومش بني ادم له احترامه وتقديره وله دور في المجتمع زي دور رئيس الوزراء - بس طبعااااا مش دور عصام شرف لان دوره كومبرس صاااامت! - بالظبط الفرق ان رئيس الوزراء له سواق خاص وسواق التاكسي بيسوق بنفسه !! . فالتحرش النفسي واحتقار المهن مهما صغر حجمها من الموروثات المهببه والخاطئه اللي كلنا اتربينا عليها ! فاي شغلانه مش وظيفيه ومش على مكتب تبقى "كخه" ويتم التقليل منها ومن صاحبها مع ان المثل بيقول "الايد البطاله نجسه" لامؤخذه ! يعني اللي بيشتغل حتى لو كناس احسن من اللي  " بيتنطع " على امه وابوه ! ومحسوب علينا في التعداد السكاني على الفاضي ! ده حتى لما بنيجي نتجوز بيطلع عين تيييييييت في توضيب الشقه يعني لولا المهنيين زي السباك او النجار مش حتقدر تغمض عنيك ! تبقا بذمتك تقلل ازااااااااي!!

نيجي بقى للعمل الحرفي اللي بدون الرعايه والاهتمام من الدوله بدا ينقرض بمساعده "المتحرشين النفسيين " بما يفعلوه من تعالي على اصحاب الحرف والصناعات اليدويه ! فقبل التعالي "والتحرش " اعرف يعني ايه عمل حرفي واهميته " فالحرفة هي عمل فني يتم باستخدام اليدين مع تشغيل العقل وتحتاج لمهارات خاصة لا يمكن إكتسابها إلا بالتدريب العملي ". وبما ان السياحه خير لينا كلنا" فالحرفه سبب في النهضه والسياحه - اللي هي من اوائل دخلنا القومي! - فالحضاره الفرعونيه والاتقان العجيب وما تركته من اثار كان وراه عمل حرفى ، الحضاره الاسلاميه بكل ما تركته فى مصر والشام واسبانيا كان وراها عمل حرفى متقن وبالتالي مفيش صناعة ولا نهضه من غير العمل الحرفي فكلاهما وجهان لعمله واحده  والشيخ محمد الغزالي - رحمه الله - له كلام عظيم في الموضوع ده فيقول "إن الحرف والمهن في العالم الإسلامي الآن ليست كفيلة باستقلاله عن غيره من الدول وأنه لو قيل لكل شىء في البلاد الإسلامية عد من حيث أتيت لخشيت أن يمشي الناس حفاة عراة"!! فهذا هو الاسلام "العملي" الذي يدعوا الي العمل والاتقان واحترام قيمه العمل بدل الشتيمه "والتكفير" في خلق الله – بالمناسبه الميكروفون اللي الشيوخ بيشتموا ويكفروا فيه ده اللي عملوه غير مسلمين ويمكن يكونوا ملحدين كمان !! وهذا الموروث الثقافي "المهبب "  له اسبابه وهي ان بلادنا العربيه اصلا اصلا غير مهتمه بالتعليم الصناعي والحرفي ولا يدخل مدارس التعليم الصناعي الا ذوي الدرجات الضعيفه او اللي ملوش في التعليم اصلا اهو الاسم ياخذ شهاده والسلام !! . اتمنى بعد ثورتنا اللي ابهرت العالم كله  نبطل تحرش نفسي بالاخر وتكون قيمه الانسان تكمن في كونه يعمل ومااضافه للبلد وللبشريه ونبهر العالم كله بعملنا واتقنا بدل "مابنتنطع" على العالم ونستهلك اكثر مابننتج ونضيف للبشريه فاذا لم تزد شئ في الحياه كنت انت زياده عليها  !                   

مقــــــــاول هــــــدد !!

ورث عم عبد الجبار – اللي بيتغدي بالولعه ويتعشي بالنار- شغلانته عن جدود جدوده ولا يعرف شغلانه غيرها وهي انه ياخذ مقاوله "اتخن" مبني ويهده كله ومعندوش تفاهم يعني يهد وميرممش وعاش عمره كله على هذا الحال !. مش عارف ليه كتيييير مننا يهوي هذه الشغلانه وفي مننا محترف بس بقى مش في هد اتخن "مبني" لالالا دي في هد اتخن" فكره" مع انها ممكن تكون فكره لها اهميتها تساعدنا على النهوض من مستنقع "مجاري العالم" اللي عايشين فيه فيتم هدم الفكره من الاساس بهدم صاحبها والتشكيك والتجريح  في شخصه واللي جبوه كمان  بدون فصل بين قوه واهميه الفكره - او ضعفها -  وبين صاحب الفكره نفسه وخد عندك امثال وامثال من اول الامام محمد عبده - داعية وإمام إسلامي، عرف بفكره الإصلاحي ودعوته للتحرر من كافة أشكال الاستعمار الأجنبي ومحاولاته المستمرة من أجل الارتقاء بالمؤسسات الإسلامية والتعليمية وسعيه الدائم  للإصلاح والتطوير في الأزهر -  في بدايه القرن العشرين عندما اتهم بالكفر وان افكاره "غريبه" لاتنسجم مع المجتمع الذي يعيش مع انه كان يسعى الي تحرير العقول من الجهل والخرافات والاوهام وملامسه قضايا العصر وتفسير القرءان الكريم بعيدا عن التقليد وبما يوافق روح العصر ، ودلوقتي الشيوخ يقولوا الامام محمد عبده قال كذا وكذا وهذا لسبب اننا نجل كل الاحترام والتقدير للاموات !! ثم ياتي التجريح في سعد باشا زعلول ومع ان الرجل كانت لديه الشجاعه الادبيه التي يفتقدها الكثير وقال في مذكراته انه كان لاعب قمار وهذه كانت نقطه ضعفه "مقاولين الهدد" بقى تركوا كل انجازاته ومحاولاته المستميته في مقاومه الاحتلال ومسكوا في لعبه للقمار مع انها حاجه شخصيه سوف يحاسبه عليها ربه ! وكل ذلك ولم يتعلم احد من التاريخ والتوقف عن ممارسه شغلانه "مقاول هدد الافكار " والتجريح في الاشخاص ! فعندما تكلمت عن عبد الناصر وتجربته الاشتراكيه في نهضه الوطن على احدى المجموعات " Groups" على الفيس بوك فكتبت هذه الجمله " قال عبد الناصر عندما سأله احد الصحفيين البريطانيين هذا السؤال "لماذا لاتطبق تجربة إسلامية في الحكم ما دمت تؤمن بالاشتراكية العربية المستندة على أسس إسلامية ؟" فاجاب وقال  "إن الحكم والسياسة مجرد تجربة إنسانية لا تخلو من احتمالات الخطأ فإذا فشلت سيقولون إن عبد الناصر هو الذي فشل ،إنني أريد أن أتحمل مسئولية الفشل وحدي فيما لو حدث ولا أحمله للإسلام ، وأمامنا تجربة محمد على جناح في باكستان التي فشلت هناك فقال البعض إن الإسلام هو الذي فشل وليس محمد على جناح، فلماذا أعرض الإسلام لمثل هذا النقد الذي ينال منه بكل تأكيد."؟ وجاءت ردود الناس كالتالي " حكيم زمانه لو كان اتمسك و فشل الانقلاب بتاع يوليو كان زمانه رمز للخيانة و العمالة و كان اتخزوق لكن عشان الانقلاب نجح فبقي زعيم و بيقول حكم و هو كان اصلا جلف عميل ودانا في ستين داهية الله يحرقه !! ، انا بكره الراجل ده لله في لله  الله لا يرحمه سبب كل البلاوي الي احنا فيها كنا طول عمرنا مصر و السودان و ماحدش في السودان اشتكي و هو نفسه العميل بيدعو لوحدة عربية يروح الغبي يفصل مصر عن السودان و يروح يعمل وحدة مع سوريا الي مافيش بينه و بينها حدود !! - ( يحكم هذا الشخص بمعيار دلوقتي ولا يضع الموقف في سياقه الزمني والموقف اللي دعي لذلك ) - " ولكن للموضوعيه هناك من رد عليه بمنتهى العقل والحكمه بدون تجريح وعاطفه فقال" احنا ممكن ننتقض اراء بعض و ننتقض اراء الاخرين بأسلوب كويس و مفهوش استهزاء او شتيمة ده المفروض احد قوانين الجروب اللي انا اعجبت بيها و بالفعل لقيت الناس ملتزمة بيها فلا يجوز ان احنا نشتم في اي حد (لان لو سمحت لنفسي ان اشتم حد يبقي بسمح للاخرين انهم يشتموني) اللي المفروض يحصل ان احنا ننتقض بأسلوب علمي عشان نقدر نوصل لاسباب الاخطاء و نحللها و نستفيد من اخطاء الاخرين و يبقي كمان في مساحة للحوار و النقاش . ثانيا عبد الناصر بشر له اخطاءه و له حسناته والعدو قبل الصديق اتفق علي نزاهة عبد الناصر و حبه للبلد و ما بقلش انه ملاك لان اكيد له اخطاء بس و احنا بنتكلم عنه المفروض نقول الحسنات و السيئات وعلي فكرة اكبر غلطة لعبد الناصر اللي اترتب عليها اخطاء كبيرة انه اعتمد علي ناس مش كفء في الامور الداخلية و اهتم هو بالشئون الخارجية عشان كده لقينا الكوارث اللي حصلت من صلاح نصر و شمس بدران و عبد الحكيم . ، اما بالنسبة للحسنات اي حد من علي الجروب اتعلم في مدارس و جامعات حكوميه  بسبب عبد الناصر ،اي حد والده او والدته شغالة في المصانع اللي عملها عبد الناصر و ربوه كويس ده من انجازات عبد الناصر لان الموظف في عهد عبد الناصر كان عايش حياة كريمة من حيث الدخل.، مصنع الحديد و الصلب اللي هو مكون من المصنع و المدينة السكنية و المينا في اسكندرية و خط الحديد من الواحات الي اسوان من انجازات عبد الناصر المصانع الحربية و الهيئة العربية للتصنيع اللي كانت في عهد عبد الناصر بتقوم بدورها في التصنيع الحربي بجانب دورها المدني  من انجازات عبد الناصر ، تأميم قناة السويس من انجازات عبد الناصر  ". هذا الحوار الذي اثير ان دل فانه يدل على العصبيه الزائده عند بعض الاشخاص وشخصنه الامور والتجريح في الاخرين دون سند موضوعي مع ان المسلم من سلم المسلمون من لسانه ويده!! ، ايضا الاستاذ  جمال البنا - مع اعتراضي على بعض افكاره - عندما يثير اي افكار لاتعجب البعض يقوم الشيوخ والدعاه بالتجريح فيه والشتيمه ولم ارى واحد منهم يرد عليه الحجه بالحجه والفكره بالفكره بهدوء ومنطق  بدلا من رفع الصوت والزعييييييييق ولكن من يعلو صوته دليل على ضعف حجته ! فهو اجتهد ومعروف من اجتهد فاصاب فله اجران ومن اجتهد ولم يصب له اجر واحد لكن يكتفي هؤلاء بقول "يابن زنوبه" !! ايضا عندما تكلم د.محمد البرادعي عن الليبراليه قال احد الشيوخ بدون علم ولا قراءه اي "كتيب" عن الليبراليه "ليبرالي يابرادعي يعني امك تمشي من غير حجاب " مع ان امه ملهاش دعوه اصلا !  كل ذلك هو غرام وعشق  بالشكل الاسلامي اكتر بكتيييير من المضمون الديني  المتسامح القائم على التقدير والاحترام للاشخاص وتوقير الكبير . ولابد ان يكون الحكم على الاشخاص بكفاءته وقدرته على انجاز المهمه الموكله له فالحكم يكون اما النجاح او الفشل مش بالشتيمه واعلاء الهبل مكان العقل والمنطق والا لو فضلنا بهذا الشكل يبقى احلام النهضه سوف تقف عند كونها احلام بدون ان تتحول الي حقائق يستفيد منها الجميع .