انــــت جيـييييت يارمضــــــــان !!

كثير من الناس فكرتهم عن شهر رمضان زي فكره سعيد صالح في مسرحيه "العيال كبرت" عن اسلوب الزوجه في تعاملها مع زوجها وانها لازم تكون ست" لؤخذه" علشان تعجب جوزها !! فتقول كريمه مختار لجوزها رمضان السكري " انت جيييت هئ هئ يارمضان "! يعني تلاقي شهر رمضان اللي الهدف منه اصلا اصلا هو اننا نشعر بحرمان وجوع الفقراء اللي وصلت نسبتهم في بلدنا اكتر من 40 % تحت خط الفقر والباقي من البلد  يادوب متشعباطين فيه ! ورغم كده  تلاقي قمه التناقد اللي هي سمه من سمات بلدنا ! فتلاقي ام احمد عازمه ام ابراهيم وعيالها -اصل رمضان بيحب اللمه ! - وطنط عفت عازمه عمو صلاح وعياله على الفطار واييييه بقا عزومه عزومه تقعد الست تحضر فيها اسبوع ! واشي حمام وفراخ وبوفتيك اةةة لازم البوفتيك !وبطبيعه الحال لازم مع كل ده يختفي الشعور بالفقراء واللي خلفوهم كمان مع اول قطمه من البوفتيك !ويصبح الشغل الشاغل لست البيت هو حتوكل ابو العيال والعيال ايه على الفطار وشويه تفكر حتوكلهم ايه على السحور ! ثم تدور الساقيه ونلف في دائره مغلقه ويتحول رمضان بقدره قادر زي اي حاجه في بلدنا بتتحول من شهر الهدى والغفران الي شهر الشوربه والبوفتيك والتحليه بالرومان ! وطبعا مش حقولك بقا ان بعد الفطار لازم يبقى في تسالي وتحالي يعني شويه كنافه على قطايف بالسكر على بسبوسه وانت تشاهد مسلسلات رمضان اللي بقت اكتر من عدد المشاهدين وتتسابق القنوات قبل الهنا بسنه وتعلن عن برامجها ومسلسلاتها علشان حضرتك متقدرش تغمض عنيك ! يعني برده رمضان مش بس اصبح شهر الفجعان لالا ده تحول بقدره قادر برده ! من شهر القيام والصيام وقراءه القرءان  الي شهر السهر والسمر وغاده وفيفي وسميه كمان !! وتتنوع السهرات دي حسب مستواك وحالتك الماديه يعني عندك عده اختيارات هي انك تسهر في الاماكن اللي بتنشط سوقها ايام الشهر الكريم – بالشكل ده ده كرييييم اااوي – زي " الخيبه " الرمضانيه اللي تتسحر فيها على انغام الرقص الشرقي – لحمه بيضه على الفطار ولحمه بيضه على السحور !! – تشد حجر الشيشه بالطعم اللي يريحك تفاح تلاقي ، خوخ تلاقي ، اللي يعجبك كله موجود ياهندزه ! او تكون على قدك شويه وتقعد تشيش - من غير الرقص طبعا فكل برغوت على قد دمه !- طول الليل وتجيب في سيره دي وسيره ده واللي عملته من صيام الصبح وتعب يروح للي بتتكلم عليه وهو قاعد زي البرنس كده في مكانه !. مش عايز بقا اقولك لانك اكيد عارف انك تمشي في الشارع تلاقي الناس بتتخانق مع دبان وشها ويتعزر ويقولك اييييييه "انا صايم وكفران وطالع تييييييت اهلي "! ده غير نسبه التحرش اللي بتزيد في رمضان ! الظاهر ياجماعه اننا فعلا فاهمين رمضان غلط  ولازم نعتزر له ونعمل صفحه ونقول " احنا اسفييييين يارمضان علشان احنا بدل مابنغني ونقول "اهلا بالصوم مرحب لياليك عادت بامان" لا بنقول "هئ هي انت جيييييت يارمضان" !!!!

عقــــده الخــــــــواجه !!

"واللهي شفتهم وهما بياكلوا كنتاكي وبيخدوا خمسين $ " ... " يااستاذ دول جايين باجنده اجنبيه من امريكا ومدربين في اسرائيل على يد الموساد " دي الحجج والشائعات التي روجها النظام الفاسد في ايام الميلاد الاولى لثورتنا العظيمه وكان الغرض منها تقليل حجمها واهانتها!! المصيبه بقاااااا اننا نسينا مثل مصري اصلي وهو "اذا كان المتكلم مجنون فلابد ان يكون المستمع عاااااااقل"!! يعني كتيييير من الناس على ثقافات مختلفه صدقوا الكلام الاهبل ده حتى الان ومش مصدقين اننا ابهرنا العالم بثوره غيرت مجرى التاريخ وينسبوا عظمتها وفضلها للاجانب وهذا ان دل فانه يدل على " عقده الخواجه " لديهم - هو مصطلح ظهر ليعبر عن حالة نفسية عامه لشعوب المنطقة العربية. مصطلح مكون من كلمتين الأولى (عقدة) تعني مشكلة نفسية ما و(الخواجة) تعني الشخص الأجنبي من خارج البلاد, خصوصا خارج المنطقة العربية ويقصد به غالبا الإنسان الأوروبي أو الأمريكي. تعبر هذه الحالة في نفوس أصحابها عن حبهم لكل ما هو غربي ورفضهم لكل ما عربي. هنا كلمة حب تعني الإعجاب والاعتقاد والقناعة وتصديق واعتماد كل ما هو غربي، واستبدال العربي بالغربي. في المقابل" تقليل "كل ما هو عربي وعدم الاعتقاد فيه أو تصديقة أو اعتمادة في حال وجود بديل غربي له" – ليه بعد شهور من خلع " الدرس " المسوس البايظ الفاسد – بالمناسبه طلعت زكروتا بيقول انه لم يخلع!! هااو هااو هأهأاو -  وظهور وتكشف كثيييير من الحقائق برده في ناس بتقول نفس الكلام اجنده وكراسه وكشكول !! وهو لا يدرى بان بكلمه منه يساعد بذلك على انتشار الاهانه لنا امام العالم بعد ان اصبح لنا قيمه امام العالم ! ليه ياسيدي الفاضل مستكبر تقول بان من فعل تلك الثوره هما الشباب !؟؟ااااايوه ابنك اللي كنت "بتغير" له الكافوله! وهو صغير اهو كبر "وغير" النظام كله ايوه ابنك اللي كنت بتزعق له "وتضربه" عمل اللي حضرتك معملتوش "وضرب" النظام كله على قفاه! - بس الاعتراف بالحق فضيله برده يعني حضرتك ساعدت في ذلك بطريق غير مباشر في تعليمه ! يالا علشان محدش يقول اااااة ياناكرين الجميل !!- ولو مش مصدق يبقى اكيد حضرتك كنت برده بتسمع قنوات الاعلام المصريه – قبل الثوره - وهي تروج بان الشباب هم خيبه هذا الوطن وانهم مش عايزين يشتغلوا !! – سبحان الله برده نفس الاعلام بيقول نفس الكلام بان الثوار دول مش عايزين يشتغلوا !!!-  اةةة اذا كنت متعود دااااااايما على سماع القنوات دي يبقى كده مش حلومك بس رجاء ابقى حول على اي قناه تانيه يمكن تعرف الحقيقه !  ولا اقولك سيب الكنبه واوعى ايدك والريموت كنترول وخد اول تذكره مترو وتعالى الميدان وشوف واحكم بنفسك وشم ريحه الحريه اللي تقريبا قعدت ربع او نص – حسب سن حضرتك –  حياتك تتكلم عنها وكانها الجنه فيها ما عين رات ولااذن سمعت ولا خطر على قلب بشر . حضرتك دي ثوره والثوار والشباب هم وقود هذه الثوره واكيد اكيد عارفين احنا بنعمل ايه كويس والدليل ان كل قرار الحكومه بتخدوا وحضرتك بترضى بالقليل كالعاده طبعا بنقول لالالا وفي الاخر بتقول اةةة ياولاد صحيح انتوا صح !! يبقى مدام تاريخنا نظيف مع الثوره من الاول يبقى خلاص مش كل شويه نسمع كلمتين يسموا البدن كعاده الاباء مع ابناءها ! وفي النهايه احب ان اقول لحضرتك وكل اعزائي المشاهدين !! بان الثوره دي "بيور" مشفيه" يعني مصريه 100 % ولا بلاش دي لحسن ده شعار قناه الفلول مودرن مصريه 100% يالله كله بياكل عيش !! وارجوا ان حضرتك تضع هذا الحديث شعار للمرحله القادمه  "عن أبي هريرة -رضي الله عنه- قال: قال رسول الله -صلى الله عليه وسلم-: من كان يؤمن بالله واليوم الآخر فليقل خيرا أو ليصمت" وانا من عندي كمان من كان يومن بالثوره فليقل خيرا او ليصمت !! وكفايه عقده الخواجه دي بقا وارجوك ااااارفع راسك فوق انت مصريييييييييي .

الحـــــــــب الكشكــــولــــــــي !!

لو كنت من الناس اللي اتعلمت في مدارس حكوميه يبقى حتعرف يعني ايه لما تفترق عن الجنس اللطيف – يالطيف اللطف يااااارب – اول لما تدخل اعدادي وكأن الولاد عندهم مرض الحصبه ! تاخذ فااااااصل وبعدين تلتقى بهم في الجامعه وبين الفترتين انت بتعمل زي حرب الاستنزاف مناورات مراهقيه شبابيه او بمعنى اصح طفوليه !! ومش عارف ليه كتيييير مننا بيعتقد ان بدخوله الجامعه كأنه مثلا رايح اوكرانيا وحيلاقي البنات بيترموا عليه زي ماكان احمد عز معتقد في فيلم الرهينه !!! فيروح الكليه وهو لابس " الحته الزفره" اللي على الحبل مع الكوتشي الجديد من "توكيل باتا " ! ويعرف الجدول ليس طلبا في العلم لا سمح الله !لالالا ده علشان يفضل يدور على بنت والسناره تغمز وينفذ كل الاساطير اللي سمع عنها قبل دخوله الجامعه اما من ناس هبله او تافهه او يمكن صنف من هذا وذاك! تغمز السنااااااره ويتبادل نمر التليفونات ويقعد يكتب في كشكول المحاضرات اغاني حب ويتبادل معها الكشكول نصفه اغاني ويدوب جزء منه بسييييييط دروس ومذاكره يتقابلوا شويه في الكافتريا وطبعااا يعمل فيها الواد الجامد " الجنتل " البورم  ويصرف ويعزم مره عصير ومره اكله حلوه يعني على حسب "مصروفه من بابي"! يقعدوا مع بعض في الاماكن المخصصه لذوي القلوب الحائره( وانا في الكليه كان مكانهم معروف فوق المجمع التجاري كانوا على الروف بيحطوا النقط على الحروف ! )  وهااااتك يارغي ويفضل يحلم ويطلعها السماء السبعه ويقول وعود اقرب الي افلام الخيال العلمي يعني يقول " بصي ياحببتي انا اول لما اتخرج حاجي اقابل باباكي على طووووول !!" ولا بيعمل اااااي شئ علشان يجعل هذا الحلم والخيال حقيقه وينطبق عليه شعر عمنا احمد فؤاد نجم "مابيعملش حاجه ومعندوش كلام .... صرصار القهاوي ...هربان م الزحام ...غيبان عن وجوده... يصحي علشان ينام" !! وطبعا اي كلام بيقوله ده قله وعي او قله خبره وبرده يمكن شئ من هذا وذاك !  تفوت الايام والشهور والسنين ويتخرج وطبعااااا يلاقي الخيال بقا واقع مر ويلاقي نفسه مطالب بمليييييييون حاجه علشان يتجوز وامامه الجيش اللي هو "تزنيب " واصلاح !! يدخل الجيش ويطلع في استقبال الاهل والاحباب ويغنوله " سالمه ياسلامه حماده طلع بالسلامه " و يغني هو اغنيه عمرو دياب ورجعت من السفر دايب من الفراق مشتاق لعيون حبيبي ولحظه اشتياق ! او يغني اغنيه الرائع الشعبي طارق الشيخ دقيقه حداد دقيقه حداد ! على حبيبته اللي اتجوزت ومخلفه حماده صغير – كويس اهو كفايه اسمه بس اللي بقا معاها !- شويه بشويه الايام بتنسى وينضج ويكبر ويعرف بان الراجل "الاصلي" زي المسك "الاصلي" كل لما يقدم كل لما تكون رائحته احلى يعني حتزيد خبرتك ونضجكك وعقلك يكون اكثر تفتحا طبعااااا ده بشرط  الجد والاجتهاد والطموح العالي والقراءه والدخول " بصدر جااااامد " وقلب ميت في خبرات متنوعه تعلمك وتعلم عليك وتكون واد " مخربش" قادر على تحمل المسئوليه وتلتقى بالبنت اللي تقدرك وترفعك فوق راسها وبالتالي ستجعلها ملكه فوق عرش عالمك و حتشوفك راجل وسند تقدر تعتمد  وترمي الحمل عليه لان الامان بالنسبه للست زي الكمبيوتر بالنسبه للنت لان الرجل هو جذع الشجرة وساقها وأوراقها، أما المرأة فهي ثمارها وكأن لسان حال المراه يقول على حد قول احدى السيدات "من أسمح له بتولي مقعد القيادة في حياتي يجب أن يكون سائقاً ماهراً، حاذقاً، يقظاً إلى حد يسمح لأن أستغرق في غفوة مريحة ،  وانا بجانبه وكلي ثقه انه لن يدخل بنا في حائط او يهبط في واد .. سائق يتعامل مع مطبات الحياه بهدوء وتوازن  يعرف متى يفترض أن يخفف السرعة، ومتى يجب أن يتوقف تماماً.. يحترم الإشارات.. ويفهمها" الي كل الاخوه والاخوات كفايه بقا نتعب قلوبنا اللي ممرمطنها معانا دي وكفااااااايه الحب الكشكولي وليكون شعارنا نحب بعقلنا وقلبنا نرتاح كلنا فمجتمع العقل والقلب الا وكانت ثالثهما السعاده .