ازمه منتصف العمر ... بس على صغير !!!

ازمه منتصف العمر دي بتيجي للانسان في منتصف عمره فبيحس انه ملوش لزمه في الدنيا خلاص بعد ان حقق كثير من احلامه فبتجيله ازمه نفسيه ويزهد في الحياه . لغايه كده فل ااااوي ومعروف لكن الغريب والمريب والكئيب ان تيجي الازمه دي لشباب في سن العشرينات بس بتيجي بالعكس يعني يحسوا ان مفيش فايده وانهم مش حيحققوا اي حاجه في حياتهم وانهم ملهمش لزمه برده في الحياه وبرده بيزهدوا في الحياه .. طب ااااازي !!!! المفروض ان سن العشرينات ده سن تفجر الطاقه والانتاج الحقيقي والغزييييير فكونك انك شاب في السن ده يعني المفروض تجبها من مشرقها لمغربها وتنحت في الصخر متنمش الليل تشتغل اي حاجه وكل حاجه مدام مش عيب او حرام بلاش تضيع وقت وتلوم الظروف وتعلق فشلك على البلد او مامي او بابي فاوقد شمعه خير من ان تلعن الظلام فاستغل كل لحظه في المفيد ...اشتغل وانت طالب في فتره الاجازه الصيفيه اي حاجه ففي الفتره دي مفيش عليك اي مسئوليه اشتغل مثلا موزع جرايد ..اشتغل في بنزينه .. في مطعم ... تدريب في شركه اذا كنت محظوظ  مش يمكن تتعين فيها بعد متتخرج بعد مااثبت كفاءه وحتى لو متعينتش فيها يبقى عملت علاقات كويسه تساعدك بعد كده واتعلمت شغلانه ومهاره جديده المهم انك تشتغل اي حاجه كل ده بيزود خبرتك ومهاراتك في الحياه " فالاحتكاك يولد الخبره " وبتتحط في مواقف مختلفه تخليك تقدر تتصرف في اي موقف ومتعجزسش عن وجود اي حل فاول سؤال تتسأله في مقابله العمل بعد التخرج اشتغلت ايه قبل كده ؟؟؟ والسؤال ده بيتسأل علشان يعرف ايه مستواك وكفاءتك وانك شغلت مخك قبل كده ولا كنت بتقديها في مارينا – او جمصه – في الصيف !!!!فالمدير او صاحب العمل مش عايز واحد يوجع قلبه ويكون مستواه صفر فالوقت الحالي محدش فاضي يعلم حد الشغل في الشركات الخاصه ضغط عصبي ومسائله دائما عن تحقيقك للمهام اللي بيكلفوك بيها وقدرتك على تحقيقها هما مش بيدولك مرتب يبقى خلاص يستنزف دمك على قد مايقدر هو ده فكر القطاع الخاص والحكومه خلاص مبتعينش حد ابوا بلاش خلص خلاص!!! فانا عيزك تكون (شغته) متتفرمش بسهوله مع اللحمه الحمرا خليك واد مخربش  تفوت في الحديد ولما تتجوز تكون اد المسئوليه وتحس مراتك انها تقدر تعتمد على راجل مش واد فرفور !!! ولما تطلع الي سن الثلاثينات تكون ساعتها كونت قاعده قويه وخبرتك زادت جدااااا  وحياتك بقا فيها شئ ذو قيمه تقدر تفتخر بيها وتبقى مالي مركزك ومركزك المالي قوي .. ولا ايه !!؟؟؟ انا عايزك تقول ورايا انا شغته انا شغته . ولما تنسى فكر نفسك وقول انا شغته ... اوعا يجيلك زهايمر وتنسى

البنت مش زي الولد ..... بس مش كماله عدد

غنت سعاد حسني اغنيه "البنات ... البنات الطف الكائنات .. البنت زي الولد مهش كماله عدد " ومن ساعتها والبنات طلعه فيها جداااا وفجاه صحيت من نومها متأخر كالعاده وقالت انا ليا حقوق لازم اخودها - مش لما يخدها الراجل الاول –  فهما فلحين بس في انهم يدورا على الحقوق مع ان مدام في حقوق يبقا في واجبات – ولا ايه !!؟؟؟ ومدام هم عايزين مساواه يبقا ليه الشاب يتتخرج من الجامعه ويتحط عليه – بلوك – لغايه لما يعرف موقفه من التجنيد والبنت ملهاش تجنيد!؟ .

والواقع بيقول ان البنت استحااااله انها تكون زي الولد وحضربلك امثله على كده :- عمرك شفت بنت مثلا شايله انبوبه بتجاز ونازله تغيرها طبعا لآ !. طيب عمرك شفت بنت قاعده عند ميكانيكي طول النهار بتصلح عربيتها – انا شوفت الصراحه بس كنت بقول عليها انها ولد ومتخيلتهاش ابدا بنت لان كل كلمها معايا بتفولي اصل الكربيراتير بتاعه العربيه... الكاربيراتييير !؟ - طيب بص دي الولد بسيط جدااا في حاجته يعني لو سافر اااخره هيأخذ معاه تيشرتين وبنطلون وعلبه جيل ومات الكلام – احنا غلابه والله -  لكن البنت بتأخذ معها الدولاب كله كانها مهاجره ومش راجعه تاني ! حاجه كمان الولد يقدر ينهى مكالمة تليفون بسرعه  ويقول فيها كل اللي هو عاوزه وده طبعا معناه فاتورة تليفون اقل اوعمر اطول لكارت الشحن البنت بقى ممكن تخلص كارت ب 200 جنيه قبل  ما تدخل فى الموضوع اصلا – بيبوا فرقع جيجي .                                                                                                                                                                         
الولد لو حد قاله كلمه جارحه وعيط حيقولوا عليه بيعيط زي البنات  عاااااااا حاجه كمان - بجد انا مش عارف اقول ايه ولا ايه المهم -  نلاقي ان جهاز البنت غير جهاز الولد – ( جهاز الكمبيوتر يعني ) محدش يفهمني غلط - تلاقى جهاز البنت نضيف ومترتب اما الولد من النظرة الاولى للجهاز ووضعه من بعيد تحس انه عامل حادثه ومفيش في حاجه سليمه - يلا اهو قلت حاجه انصاف للمراه علشان محدش يقول عنصريه بقى - كل الي فات يدل ان البنت مش زي الولد خااااالص  .    

  لكن مش معنى كده انها كماله عدد هما بس حشرين نفسهم في ادوار مش بتعتهم والاولويات متلخبطه شويه ! مع ان ربنا خلق للبنت ادوار مينفعش الولد يقوم بيها - حتى لو اتنطط على راسه ! - وعندها (امكانيات) مش عندنا وقدره تحمل وصبر اكتر من الولد يعني الراجل ممكن يقعد مع ابنه بالكتير ربع ساعه وميستحملش ويرميه لامه ! لكن الست عندها طاقه تحايل وتبطب - انبوه انجغا - فالام مدرسه يعني (تربيه وتعليم) فمهم جداا ان الاطفال امهم تراعيهم جدااا وهم اطفال لان علماء النفس بيقولوا ان اغلب المشاكل النفسيه ترجع الي اول سبع سنوات وكمان ان التربيه وبناء الطفل بيكون في المرحله دي وبناء الانسان اصلا اصلا مش سهل ! لكن بقا البنات تتنطط وتقول طموحي انا عايزه اشتغل واحقق نفسي وتنشغل - مش لما يشتغل الشباب الاول بالمناسبه معدل البطاله وصل الي 12 % - وتهمل البيت والاطفال اللي هي مهمتها الاولى ده بقى العيب ! لان باهمالهم حيطلع لنا اطفال مشوهه ومجتمعنا مش ناقص عاهات ! وانا مش ضد عمل المراه اصلا لان عملها حيقوي منها وفي بناء شخصيتها ونضجها لكن العبره  في التوازن اللي حتعرف توازن( بدون) ان يأتي ذلك على حساب اولادها تبقى المراه كما ينبغى ان تكون .
الخلاصه علشان ده موضوع شائك جدااا ان كل خلق لما هو ميسر له وكل واحد في الحياه له دور في الحياه يقوم به لتكمله الاخر فمحدش يحط منخيره في دور التاني وينادي بحق غير حقه علشان كده لازم البنات تعترف وتقول احنا اسفييييين ياصلاح اقصد يارجاله ويقولوا البنت مش زي الولد  لان اتضح ان ده كان هزار بس تقيل شويه  .

احنا بتوع الاتوبيس .... بيب بيب

الظاهر ان البلد دي – مصر يعني بلدنا وبلد اللي خليفونا – من زمان وهي بتعاني من مشكله الزحام بدليل ان المغني الشعبي احمد عدويه غنى في السبعينات اغنيه " زحمه يادنيا زحمه ... زحمه وتاهوا الحبايب ... مولد وصاحبه غايب" فالاغنيه دي لسه محتفظه بشبابها الي وقتنا هذا ولسه بتعكس حال شوارعنا واتوبيساتها  فلو حبيت تروح اي مكان ولو حتى قريب من بيتك فبتحارب علشان توصل فالمشوار لو مشيته يأخذ منك خمس دقائق ولو اخذت اتوبيس تاخذ لو انت متفائل مابين ساعتين الى ثلاثه ساعات. فممكن ان نقسم القرف ده الي ثلاثه حاجات 1- قرف انك تستنى الاوتوبيس .    2- قرف انك تركب الاوتوبيس بزحمته . 3- قرف تحرك الاتوبيس في الشارع . - بامناسبه المسافه بين بيتا وشغلي حوالي تلت ساعه بروح الصبح في ساعه وبرجع في ثلاثه ساعات - ومن المفترض ان يكون ليك مكان في الاتوبيس كأي مواطن عادي محترم – زي الهند ( مصدره التكتوك) -  لكن عمرك محتلاقي اي مكان لانه دائما متكربس واذا صادفك الحظ وكانت – يور مازر – دعيالك وتقعد على كرسي تحس بالحقد والحسد من اي واحد واقف وتلاقيه يقول في نفسه ااااه يابختك يابني المحظوظه .وتلاقي السواق او الكمسري يقول ياجماعه الاتوبيس فاضي جوه اهو !!! مع ان الناس جوه اصلا ( راكبه على بعض ) . ده غير ان سواق الاتوبيس بيقف على مزاجه في المحطات- رسميه بقا او غير رسميه- بعشوائيه عشوائيه زي المجتمع اللي ماشي في شوارعه.المصيبه كمان ان مبدا المشاركه واحترام الكبير والرئفه بالسيدات مبقتش موجوده يعني تلاقي واحد يتمتع بصحه جيده – مش بحسد ولا حاجه – جالس وامامه اما بنت او ست او راجل عجوز ويعمل وكأنه مش واخذ باله وينظر الي الشباك بيتأمل الطبيعه !!!– مره شفت موقف غظني جدااا واحد واقفه امامه بنت وهو جالس بيقول لها عنك شنطتك ...لآ حنين ااوي !!!! بدل مايقول لها اقعدي علشان الزحمه لأ بيقعد شنتطها !!!. حاجه تغيظ صحيح . السؤال الاستثماري هنا مين اللي مستفيد من الزحمه دي ؟؟؟؟ اكيد في حد مستفيد فداخل كل مصيبه فرصه استثماريه . والمستفيد هم شركات المحمول طبعاااا لان الناس بتتكلم اما من زهقها من الزحمه او للاعتذار عن التأخير على موعدها  فالزحمه دي برعايه فودافون – عيش احلى مافي اللحظه – لحظه الزحمه طبعاااااا .... فبلدنا اللي بتمثلها الحكومه اللي مختزله في الحزب الوطني رافع شعار العبور اللي المستقبل – طيب نعبر ازاي في الزحمه دي مش حنوصل  اصلا !!! لازم تلاقي حل للازمه دي  فلما يكون في مواصلات ادميه تحترم المواطن وتوصله بالسلامه  اي مكان يريده بدل مبيتشاهد على روحه كل لما ينزل من بيتهم  ويتبهدل وقتها نقول العبور الي المستقبل والي المريخ لو حبينا لكن احنا لسه بدري اوي على العبور ده لاننا ياخونا ببساطه احنا بتوع الاوتوبيس ... بيب بيب.. اعوا                                                                                                                                                                                                                                                                                                                                                                                                                                                                                                                                                                                                                                                                                                                                                                                                   

انتهاكات مش انتخابات...!!!!

لما تشوف اعلانات التليفزيون عن الانتخابات تحس انك بتشوف اعلان لمطعم وجبات سريييعه اللي بيصورك الساندوتش اد الوحش وفي الحقيقه هو مثل عقله الصباع فلما تشوف الاعلانات دي تحس انك لازم تشارك ويجيلك "لطشه" من الحس الوطني بوجوب المشاركه وبان المشاركه واجب وفرض عين على كل مصري !!! وان "البلد فعلا بتتقدم بينا" الظاهر ان كل ده  كلام اعلانات لانك لما تنزل وتشارك تشوف اللي عمرك ماشفته في حياتك كلها وانك مش حتقدر تغمض عنيك وفي الواقع انك حتغمض عنيك لانك حتلاقي مهااااازل من اصوات بتتباع وكأنك في شارع عبد العزيز لما يقولك تبيع يابيه الموبايل بتاعك!!! وهناك تسعيره للاصوات تبدا ب300 جنيه وتصل الي 700 جنيه - الا اونه الا دوا الا تريه – وتلاقي اتقان وتنظيم  في التزوير وتلاقي خناقات وتحرشات واغاني تقول وعلشان كده احنا اختارناه !!! بذمتك !!!! والناخبين بيدخلوا الانتخابات ياما قاتل واما مقتول ويقوموا بتجهيز عدد وادوات التزوير -( الانتخابات سابقا) - من رشاوي وبلطجيه وغيرها من الادوات الازمه لكسب الحرب وتلاقي احزاب كتيره تنسحب واصبح المجلس بلا معارضه يعني لو تم مناقشه بيع البلد بالكامل - مع انها اتباعت - محدش حيعترض على حاجه خااااالص مهو اصل كل اللي دخل المجلس مش هامه اصلا مصلحه البلد لانه " رافع " شعار مصلحتي اولا !!! فلازم يوافق على اي اقتراح علشان ميغضبش منه الراجل الكبير ويلاقي نفسه واخد انظار ويكون بره الملعب " اوف سايد "  وبعد الفوز تلاقي الحكومه تطلع وتقول " دي اراده الشعب " شعب ايه!!!وان الانتخابات كانت شفافه ونزيهه !!! بذمتك برده!!! ده احنا اصلا شعب معندوش اراده شعب بيتكلم اكتر مابيأكل لان الكلام معلوهوش جمرك بس الاكل عليه حاجااااات كتيره - مجنونه ياقوطا – نيجي بقا الي دخول المراه مجلس الشعب واللي يسمى " كوته المراه " يعني تخصيص نسبة لها فى مقاعد مجلس الشعب علشان تصوت على القرارات والقوانين اللي بينقشها المجلس - دي حتصوت صويييت  وبرده حمرا.... ياكوتا  - ففي الاخر علشان منغوتش اكتر من كده نقدر نقول ان الاسم الاصح للانتخابات اننا نسميها انتهاكااااات .... بس خلاص

التعليم في مصر زي الهواء والمياه .... ملوث!!!

عندما احتل طه حسين وزاره التعليم عام 1950 قال ان التعليم زي الماء والهواء عندما بدا تطبيق مجانيه التعليم ماقبل الجامعي اي قبل قيام ثوره يوليو1952  بعامين وبعد قيام الثوره عزز موقفها موقف طه حسين وامتدت مجانيه التعليم لتشمل التعليم الجامعي ايضا  حيث كان هناك اهتمام بالعلم وكانت المناهج العلميه محترمه وقادره علي بناء انسان محترم قادر على خدمه وطنه وبناء امته..... دلوقتي !!! وبعد مرور اكثر من نصف قرن على المقوله دي حدث للتعليم ماحث للهواء من ثقب الاوزون وتلوثه وايضا ماحدث للمياه من دخول مياه الشرب على مياه المجاري فاصبح التعليم ملوث وده التطور الطبيعي للاشياء في بلدنا فاي شئ في بلدنا بيرجع للخلف وكاننا في اله زمنيه مبرمجه علي انها ترجع بينا للخلف فقط !!! اصبح التعليم متخلف لدرجه انه لايقدر على اخراج انسان مش قادر على بناء بلده ده مش قادر حتى على ( بناء اسره)  والتعليم يشبه الدوله الموجود بها فاذا كانت الدوله " نظيفه وجميله ومتطوره " تجد ايضا التعليم كذلك . وفالحين بس في كل لقاء سواء في ندوه عن التعليم  او في احاديث تلفزيونيه - ده د. احمد زويل كل سنه ياتي من اخر بلاد المسلمين ويقول التعليم التعليم التعليم بس تقول لمين اصل المسئولين بيتعملوا معاه على انه ( خواجا) مش من مصر ولا يعرف عنها حاجه – ان نقول لازم نهتم بالتعليم !!!!! .ويبدا تاريخ تدهور المصري عقليا بعد دخوله الحلقه التعليميه المفرغه فيدخلها في سن 6 سنوات ويخرج 22 سنه يعني حوالي 16 سنه المفروض انه يخرج يهد الدنيا ويشارك في بناء نفسه ووطنه بس للاسف يلاقي الدنيا في وادي والتعليم اللي ( ضيع ) حياته فيه في وادي تاني خاااالص ولا علاقه بينهما فالمدرسين مدربين ( علشان الكادر طبعا) على نظريه الحشو يعني انهم ازاي يحشوا راس الطالب وكانها بتنجانه تحشيها ارز ده حتى وصلت نظريه الحشو دي اللي التعليم الجامعي واتبع دكتور الجامعه نفس النظريه  ووصل الامر حتى الي الدراسات العليا فلم يسلم احد من المنظومه المتخلفه دي فمن الخمسينات واحنا بنقول لازم نصلح التعليم نغيب نغيب ونقول ياجماعه احنا لازم نصلح التعليم وفي رؤيه الحكومه لمصر عام 2030 برده حنقول لازم نصلح التعليم بس حنصلح ايه ده بقى شئ طبيعي زي الهوا والمياه ملوث ولا ينفع فيه اي شئ قصر الكلام مفيش فايده!!!                                                          

التســــــــويق الديـني ....حييي!!!

كنت اشاهد فيلم " رصيف نمره خامسه " لوحش الشاشه فريد شوقي والفنان ذكي رستم في المشهد اللي دخل فيه فريد شوقي (المسجد ) وقال لذكي رستم " امال فين سبحتك يامعلم ... اصلي لمتهالك " في مشهد اكتشاف رئيس العصابه ذكي رستم .. ده بالظبط اللي بيحصل في واقعنا الدرامي تلاقي ناس كتيييير بتمثل ومتخفيه وراء ستار الدين والمصيبه انهم مش شايفيين نفسهم واخطائهم ويعيبوا على اخطاء الاخرين وكانهم معصومين من الاخطاء مع ان المعصوم من الخطأ مات وهو النبي صلى الله عليه وسلم ... وتلاقي الناس دي بتحب ااااوي"التسويق الديني" يعني (يقولك) انا صايم بكره ... ويقولي ليه !!؟؟؟ انا نازل اصلي في المسجد .. ولو ادى فريضه الحج يزعل ااااوي لو مقلتلوش يا حج !!!! مع ان كل العبادات دي بين العبد وربه بس تقول ايه تسويق بقا!!! والبنات – وماادراك ماالبنات - اللي بتلبس شئ يشبه الحجاب !!! ومنقسمه نصفين تشبه انفصام وانقسام المجتمع اللي عايشه فيه فتلاقي البنت لبسه ضيق في ضيق ومخالفه تماما شروط الحجاب وبتفكرني بمشهد سمير غانم في مسرحيه المتزوجون لما قال للفنانه شيرين " هو يعني المنجد بيعمل ايه !! بيجيب القطن من هنا لهنا طيب اااهو !!! ففكره البنات دي عن الحجاب زي فكره مسعود ( سمير غانم ) عن عمل المنجد!!! فتضع طرحه على راسها فقط وفاكره ان ده حجاب !!! وهي في واقع الامر بتخاف على بشرتها وعلى شعرها!!! – انا مره سمعت بنت بتقول ان اهدافها انها عايزه تخلف ولاد يكونوا متمسكين بدينهم مع ان قصه شعرها كانت باينه وحاجات تانيه كتييير كانت باينه تيييييييييت !!!- انما الاعمال بالنيات برده - كمان تبقى احب الناس الي الناس لو احتوى كلامك على احاديث نبويه اوايات قرءانيه وتبقى عدو الناس لو عملت العكس وتستشهد بكلام فيلسوف او عالم على غير دينك مع ان العلم ملوش دين فالحضاره الاسلاميه بنت قوتها على ترجمه كتب وعلوم الحضاره اليونانيه القديمه واضافت عليها وبرده الغرب في عصور الظلام ترجم اعمالنا واضاف عليها ونهض فنور نفسه ونور العالم كله – بالمناسبه سجاده الصلاه صيني والميكروفون اللي بنشتم فيه الغرب امريكي - في الزمن اللي احنا في ده الدين اصبح سلعه يتم تروجها بشكل مشين وعن جهل ويتم استخدامه في الانتخابات - الحاج محروس رمز الفانوس بيرشح نفسه لخدمه عباد الله -  والناس فكره نفسها متدينه بجد مش حقولك ان بلدنا فيها اكتر نسبه تحرش جنسي!!! ده غير الرشوه اللي بنسميها الشاي مع ان ربنا لعن الراشي والمرتشي!!! احنا بس فلحين في الاهتمام  بشروط الغسل !!! ارضاع الكبير!!! حواجب المراه !!!بس حنقول ايه اصل الدين افيون الشعوب زي ماقال كارل ماركس فنحن تركنا الكل ومسكنا في الجزء  فعلشان كده لو عايز تتحب اتكلم في الدين فالناس كلها على فكر واحد .... حييييي   .

اغاني وطنيه على كيف كيفك..!!!

بعد ثوره يوليو 1952 ظهرت ثروه من الاغاني الوطنيه وكان لعبد الحليم حافظ وفريقه من محمد الموجي وبليغ حمدي وصلاح جاهين وكمال الطويل وغيرهم النصيب الاكبر منها وكانت تلك الاغاني بتتناسب مع الانجازات الوطنيه اللي كانت بتحققها البلاد على جميع المستويات سواء السياسيه والاجتماعيه والاقتصاديه في ذلك الوقت فكان الفن هو الوقود اللي بيشحن من همه الرجال لمزيد من النجاح والانجازات فظهرت الاغاني مثل" صوره – احنا الشعب – بالاحضان " وغيرهم وذي أي دوره حياه تبدا بالنمو ثم النضوج وتنتهي بالتدهور كان هو ده حالنا من بدايه الثوره حيث كان النمو وانتهاء بنكسه يونيه 1967 حيث كان التدهور وظهرت الاغاني اللي بتعبر عن النكسه واللي كان اشهرها "عدى النهار " غناء عبد الحليم حافظ وتأليف عبد الرحمن الابنودي والحان بليغ حمدي . وجت بعد كده اغاني تانيه برده وطنيه بتعبر عن انتصارات اكتوبر 1973 زي "رايحين شايلين في ايدنا سلاح ... واغنيه شاديه ياحببتي يامصر  واغنيه الحلوه بلادي للفنانه ورده واغنيه مبروك مبروك مبروك عليكم وعلينا لياسمين الخيام" وكل الاغاني  دي واكتر تم تأليفها وتلحينها بمناسبه الانتصارات الوطنيه اللي كان الفنان بيحتفل بها مع الشعب الي ان جاء اليوم اللي اتعمل فيه remix”" لتلك الاغاني فبدلا من ان يكون remix  للحن اصبح للموقف !!! فبقت الاغاني دي تغنى على نوع تاني من الانتصارات وهي "الانتصارات الكرويه" وابتدءا من كأس الامم الافريقيه 2006 تحولت الاغاني بقدره قادر بدلا من انها كانت تغنى للثوره والنكسه والانتصارات اصبحت تغنى للفوز بالكأس -  ماهي برده انتصارات !!! -  فاذا دخل لاعب منطقه الهجوم للفريق الاخر اصبحت تغنى له اغنيه فدائي فدائي فدائي بتاعه عبد الحليم ... ولما تحدث هزيمه في احدى المباريات اصبحت تغنى اغنيه النكسه "عدى النهار" .. وايه المانع!!! فنحن شعب "متكيف" 100% واللي زاد وغطا استخدم منسقوا حمله تأييد "مبارك الابن" اغنيه " ياجمال ... ياجمال ياحبيب الملايين " واللي غناها عبد الحليم للرئيس عبد الناصر في السيتينات وجعلوها خلفيه لفيلم يتم عرضه في جولاتهم الميدانيه في المحافظات لجمع التوقيعات المؤيده له ..... كل ده دليل اننا منملكش اي هدف قومي نلتف حوليه ونهتف له ونغني له فلم يعد عندنا مستعمر - مع ان الاستعمار بقا له اشكال تانيه كتييييير- ومفيش عندنا سد عالي لبناءه فبعد حرب اكتوبر 1973 الشعب "ريح "جدااا واصبح من اكثر شعوب العالم استهلاك وده كان بقياده الرئيس السادات حيث تحول هو نفسه من رجل مكافح الي رجل استهلاكي لايهمه الا المظاهر - حتى انه اصبح من اكثر 10 رؤساء في العالم اناقه - والاستهلاك واهمل الصناعه ودعى الي الانفتاح الاقتصادي اللي بقا انفتاح "السداح مداح " فنتقلنا من دوله شبه صناعيه الي دوله استهلاكيه100% تستورد اكثر ماتصدر لاتنتج اي شئ  – بتنتج بس رنات التليفون !!! - حتى متقدرش تسد جوع ومواطنيها وده ظهر لما حدثت "ازمه القمح " من حرائق القمح في روسيا كل ده واكثر دليل ان الوطن تايه وبيثبت المقوله "اذا لم يكن لديك هدف في الحياه فاي طريق اسلكه " بس نرجع ونغني " مشربتش من نيلها طب جربت تغنلها " ماهي اغاني وطنيه على كيف كيفك !!!

مصر بتعيد نفسها !!!

كلاكيت عاشره مره ....كنت بشوف  فيلم "شجيع السيما" للفنان الكوميدي احمد ادم  وياسر جلال  وجت على لسان الفنان ياسر جلال كلمه وهوبيقول " الحياه اللقطه فيها مره واحده اما في السينما اللقطه ممكن تتعاد 100 مره "لما نشوف بقا الواقع نجد ان الواقع بقا عامل زي السينما المشاهد بتتعاد مرات كتييييير وبقت المشاهد على كل المستويات سواء السياسي او الاجتماعي او حتى على مستوى ( الهلس)  فلما  نرجع  بالذاكره لورا او نقرا في الكتب عن "الاعتقالات السياسيه سبتمبر 1981" واللي كانت سببها- من وجه نظر الرئيس السادات - الحفاظ على الوطن من اعداء السلام اواعداء الوطن زي ماسماهم  احمد ذكي في (فيلم البرئ) فجمع اعداد كبيره  مختلفين من الناس مثقفين على متدينين على اللي ملهمش فيها كل دول جمعهم انهم مكانوش عايزين اتفاقيه سلام مع اسرائيل وقال  بانه حيفرج عن المعتقليين بعد  انسحاب اسرائيل من الاراضي المصريه بس القدر كان ليه دور نشط في الاحداث دي وتم اغتيال الرئيس السادات وايضا تم الافراج عن المعتقليين في العصر الجديد المبارك"عصر الحريات" وقد نفى الرئيس مبارك  اكثر من مره بعد ذلك علاقته بقرار السادات حتى انه سارع بعد توليه الحكم بالافراج عن كل المعتقليين واستضافهم داخل القصر الرئاسي وأعرب لهم عن أسفه لاعتقالهم.  دلوقتي .... وبعد مرور 29 سنه على اعتقالات سبتمبر 1981 نفس المشهد اتكرر مره تانيه وكأن الشريط سف  وهو مشهد "الاعتقالات الاعلاميه  اكتوبر 2010" والتي بدات بابعاد الاعلامي عمرو اديب واللي كان مبررها ان قناه اوربت مدفعتش الضرائب – مصلحتك اولا - المقرره عليها . وبعد كده جيه الدور على الصحفي ابراهيم عيسى لما ترك برنامج بلدنا بالمصري – على قناه اون تي في – والتي كان مبررها انه مشغول بالتجديدات اللي بتعشها جريده الدستور اللي هي نفسها تم ابعاده من رئاسه تحريرها بعد فتره بسيطه جداااا من التجديدات اللي قالوا عليها ..... ننتقل بقا الي مشهد من مشاهد الفيلم السينمائي السخيف والساخر والممل الي بنعيشه ونشوفه وكلنا مشتركين فيه بس للاسف الاغلبيه مننا كومبارس صامت والمشهد انه كان زمان في زحام كبير على المجمعات الاستهلاكيه فكانت الناس  تستيقظ من الفجر وتذهب لتأخذ مكاننا في الطابور حتي نشتري كيلو سكر او علبه شاي او باقي مستلزماتها ..... دلوقتي .... اتحلت مشكله المجمعات وجه مكانها " كارفور" وبقت الناس مش بتنزل الفجر لتشتري حاجاتها ولكنها بتروح الفجر لانها مبقتش مجمعات استهلاكيه ده بقت مناطق ترفيه للعائله وجت مشكله تانيه انتقل ليها الزحام بدل المجمعات وهو طاااااااااااابور العيش- شوفتوا بقا مصر بتتقدم بينا الزاي  – وبقت الناس برده بتنزل الفجر علشان تشتري بجنيه عيش لولدها واسرتها وبقينا نسمع عن شهداء طابور العيش وضحاياه. كل المشاهد دي من الالاف المشاهد اللي بتتكرر كل يوم وكأننا بنلعب دوخيني يالمونه  وكل ده بيدل ان مصر بتلف في حلقه مفرغه وان مصر بتعيد نفسها!!!!

احنا يابني بنشتري راجل !!!

الجمله دي اكيد سمعتها كتيييييير في افلام السيما فهي جمله مستهلكه جداااا ننزل بقا الي الواقع الي السينما انعكاس له فاذا كنت عايز تكمل نصف دينك وتتجوز انسانه تشاركك حياتك ورحت اتقدمت لوحده تلاقي ابوها مش بيشتري راجل بس ده بيشتري راجل فل اوبشن راجل كومبو ولازم تكون كل حاجه(large (يعني تكون راجل محترم وتملك اساسيات الزواج تلاقي ابوها يطلب منك اشيييييياء كتيره تفوق قدره اي شاب في بدايه حياته يعني مثلا مش كفايه انك جبت شقه في زمن الي جاب فيه شقه يقولوا ده تهييس- على راي الكيك كونج ابو الليف – لا يقولك انت لازم تجيب شقه زي الي بنتي اتربت فيها لاتقل عن 200 متر على اساس ان الجواز بيحتاج جري كتير !!!!! المهم ان الامر مش ان الاهل في  الحاله دي بيشتروا راجل لا دول بيشتروا راجل فول اوبشن  راجل كومبو وده نابع من الطفاصه – مش ثقافه – المصريه لازم الاهل يفكروا باسلوب استثثماري في قاعده في الاستثمارالذكي بتقول الاستثمار في القيمه يعني متبصش الي السعر الحالي في الشراء والبيع ولكن انظر الي جوهر وقيمه الشركه الحقيقي ومستقبلها بناء على مؤشرات ماليه وبعد كده اتخذ قرار الشراء بالسعر الي ترضى به وسوف تحقق عوائد كتييييير في المستقبل لكن لاننا معندناش نظره مستقبليه- ولاحاضره- وعايزين الثراء السريع نقع في اخطاء كتييره والواقع يدل علي كلامي ففي كام قضيه طلاق في محاكم الاسره  من الاختيار الخاطئ المبني علي الطفاسه !!!!؟؟؟؟ فارجوا من الاهل يخفوا علينا شويه فاذا كان هناك شاب محترم وملتزم وطموح وعنده اساسيات الزواج فارجوا التسهيل عليه علشان منندمش ونقول في البرامج السوداويه –اقصد المساءيه - ان معدل العنوسه وصل الي 10 مليون عانس  وان معدل الطلاق وصل الي 75 % وتطلع الاف المدونات وتقول عايزه اتجوز ومش بعيده تطلع مدونااااااات اخرى تقول عايزه اطلق !!! فارجوا ان تفكر الاهالي ويكونوا بجد بيشتروا راجل مش راجل كومبو.

المقــــــــال في موقـــــــع "حريتنا "

بلد شعارات صحيح !!!

طلع في السيتينات شخصيه ظريفه اسمها دسوقي افندي – عادل امام – في مسرحيه " انا وهو وهي" مع فؤاد المهندس وكان في جمله شهيره في المسرحيه لدسوقي افندي بتقول" بلد شهادات صحيح " وده كان لان العلم والشهادات ليهم اهميه. اما دلوقتي وبعد مافاتت سنين كتييير على الجمله دي فضلت زي ماهي بس بتحريف بسيط –  مصر صحيح بتتقدم بينا - واتحولت الي بلد شعارات لاتعطي الي العلم اي اهتمام وتعطي الى الشكل والشعارات الاهتمام الاكبر زي "بلدنا بتتقدم بينا" مع ان الواقع بيقول ان بلدنا بترجع وتتاخر بينا . والشعار برده المستفذ على حوائط المدارس" مدرستنا جميله نظيفه متطوره " مع ان الواقع برده بيقول " مدرستنا قبيحه ومليانه زباله ومتخلفه " فالتعليم والحمد لله عمل تطور مزهل جعل معدل الاميه في مصر 50 % وطبعا ده بفضل الشعارات الكدابه الي كانوا بيعلموهلنا في المدارس زي " مصر للمصريين " – ياكدابييييين - في ماده التربيه الوطنيه كشعار للانتماء وحب الوطن مع ان مصر مش للمصريين مصر للاجانب الي بيشتروا شركات المصريين بتراب الفلوس - فينك ياعمرافندي - ومثلا تلاقي شباب وبنات بيحطوا صوره اكبر ثوري في العالم "جيفارا" على عربيتهم وملابسهم وانا متاكد انهم اصلا ميعرفوش مين هو جيفارا بس حنقول اه اذا كان التعليم بيعلمهم ان الشعارات ليها اهميه كبيره ويكذبوا عليهم ويقولوا" مدرستي جميله نظيفه متطوره " وهم شايفين العكس يبقا اه المانع لما يرفعوا صوره جيفارا وهم مش عارفين مين هو اصلا !!! وللاسف ثورتهم بتكون  مثلا على ازاي شركات الانترنت  تخلي سعه التحميل محدوده !!! او ازاي ميذعوش مبارات كره القدم على التليفزيون  الارضي – مع ان مصر للمصريين - !!!! والشئ الغريب والكئيب والمريب ان الشعارات مبقتش بس سياسيه دي كمان دينيه ذي " فداك يارسول الله "و " انصر نبيك " ورافع الشعار ده اصلا تلاقيه مبيركعهاش ويكسر اشارات المرور ماهي شعارات بقا مش علمونا كده في المدارس " نظيفه جميله متطوره" وزي مابيقولوا هو الكلام عليه جمرك!!!  والحمد لله الحكومه بتمارس معانا  ديمقراطيه بس " تقفيل مصري" بمعنى قولوا الي انتوا عايزينه واحنا حنعمل الي احنا عوزينه برده اصل الحكومه عارفه اننا بلد الشعارات والكلام فقط من غير فعل – انا حوريك من شنكل ابن شناكل ( علاء عوض في فيلم مستركاراتيه)-  يعني مثلا تلاقي الاحتجاجات الي كانت امام مجلس الوزراء ورافعه شعارات مثل " ياللى رايح ياللى جاى....عايز حقى وأجيبه إزاى" وشعار تاني بيقول "اعتصامنا دا مشروع...ضد الظلم وضد الجوع" وفي ااااخر المطاف الامن فض كل  الاعتصامات زي مابيهش المعيز هررررر ولا حصل اي حاجه وعملوا زي ابراهيم توشكا في فيلم "كلمني شكرا" لما انضرب عليه نار وقال " احنا اسفيييييين ياصلاح " بس حنعمل اه سلو بلدنا كده انها  " بلد شعارات صحيح"

    المقــــــــال في مجلـــــــــه "فورورد "