من ساعه لما قامت الثوره والناس عمالين يشتموا ويسبوا ويلعنوا ويقولوا كلام عجيب وغريب واقرب الوصف انه مريب وكئيب على شباب الثوره وعمالين يفتوا ويتناقل كلام اهبل يثبت نظريه ان الانسان اصله "بغبغان" يعني العقل اللي ميزهم به الخالق سبحانه وتعالى عن البغبغان لم يجراوا على استخدامه ابداااا يعني مثلا تلاقي واحد يفتي ويقولك فيس "توك" ايه ياعم ده الفيس توك ده اللي البنات فيه عريانه !!! وواحد تاني يقولك حرااااام عليكوا عايزين نشغل عجله التنميه وهو اصلا ولا عارف يعني ايه عجله ولا حتى بسكلته !!! مع انه هو هو اللي كان من 6 شهور كان بيصوت امام مجلس الشعب ومجلس الوزراء ورافع شعارات مثل " ياللى رايح ياللى جاى....عايز حقى وأجيبه إزاى" وشعار تاني بيقول "اعتصامنا دا مشروع...ضد الظلم وضد الجوع" ولما جت الفرصه علشان يبقى بني ادم له كرامه في وطنه ليه وليه لازم يفضل ياخذ على" قفاه " وعمال يجيب كل حاجه على شباب الثوره اللي خلوه بني ادم – ارفع راسك فوق انت مصري – بعد ان كان ليس له قيمه ولا داخل مصر ولا خارجها حتى اصبحنا مهزقه العالم اجمع !! ومش بعيده انه يقول ان الحقيقه وراء زلزال اليابان هم شباب الثوره برده !! مع انه من الاولى انه يلوم نفسه – مره واحد صاحبي كنا راكبين العربيه وقالي هما الشباب دول عايزين ايه ولاد تيييييييت وهو بيقول كده راح رامي علبه العصير من الشباك !!! - يقول اينشتين " ليس السبب في مايحدث في العالم من شر هم الاشرار بل الاخيار الذين يسكتون على الاشرار " يعني بدل ماكان هو "مطرمخ" على الفساد ويقول ياسيدي خلينا ناكل عيش مع ان العيش اللي عايز ياكله ده كان فيه مسامير وكوارس في طابوره حتى تحول الشهداء من الحروب الي افران العيش !! وبرده يردد كلام اخر بان معدل البطاله 12 % وده برده سببه شباب الثوره انا عايز افكر الاخ بان معدل البطاله عمره مانقص عن 10 % اصلا وكان يتراوح بين 10 – 12 % وكانت هناك تقارير من مؤسسات دوليه تقول بان معدل البطاله كان 20 % !!! يعني اهو مش شباب الثوره اللي عملوا كل ده !! ده غير المشاكل والكوارس اللي حطنا فيها النظام الفاسد وعلى راسها ازمه حوض النيل!! وبرده عايز افكر الاخ الكريم بممارسات جهاز امن الدوله والشرطه اللي كانت فاكره نفسها فوق ربنا وتمارس مع المواطنين ابشع الجرائم واخرها قبل قيام الثوره الشيخ بلال بتاع حادث كنيسه القديسين اللي كان مبارك واعوانه السبب في تفجيرها !! ده غير الكلام الاهبل بان من قام بالثوره ومن يقوم بالمليونات هم جماعه "عوطليه " مع ان من دعى الي الثوره وقام بها من الصفوف الاولى والثانيه – على الاقل - بالبلدي كده " مستريحين " ماديا يعني نقطنا بسكاتك وخلينا نشوف حلنا بقا على شان ولادك وولاد ولادك بدل طرمختك اللي ودتنا في دهيه !! الخلاصه ان مفيش تغيير" لايت " ومفيش تغيير بدون تغيير يااما نشتغل صح وعلى نظافه يااما كانك ياابو زيد ماغزيت !! وكفايه بقااااا نكنس ونرمي تحت السرير !! خلونا بقا ننظف صح ونطهر البلد ونركب قطار التقدم اللي فتنا من زماااااااان ولو سيادتك مش عاجبك مش مهم انت اكيد مش عارف مصلحتك لانك رافع شعار ماكسي جورجي " خلقنا لنعترض "!! ولو حتى جبنالك لبن العصفور مش حترضى لان لايملئ عين ابن ادم الا التراب كما قال رسول الله ادعوك للتفكير بعقلك شويه وان تدخل الكلام من ودنك ويذهب الي عقلك وتفكر تفكير استراتيجي بان مصر حترجع بان الرحمن ام الدنيا وابوها كمان وبلاش يصدق عليك كلام عمنا نجيب محفوظ بان "افه حارتنا النسيان "!! لان اللي بيحصل ده شئ طبيعي جدااا في اعقاب اي ثوره من ساعه الثوره البلشفية في روسيا 1917 الي ثورتنا حتى الان يعني نحكم عقلنا نرتاح كلنا . وبرده مش احنا اللي ورا زلزال اليابان!!
مقال له علاقه بهذا المقال " بلد شعارات صحيح "
