امنـــــا الغـــولــــــه !

"التعليم في الصغر كالنقش على الحجر " تلك المقوله الساحره كانت مبثابه لامؤخذه "المرشد" لاهالينا في تربيتنا وتعليمنا ، وفي الغالب كان يتم هذا النقش بطرق وباشخاص خياليه "مأفوره" ترهب اكتر ماترغب الطفل في انه يتعلم حاجه تنفعه فيتخرج ويحصل على شهاده لا تشهد على اي حاجه ! فقط تشهد على "افورته" واللي السبب فيها تلك الشخصيات المأفوره الخياليه "امنا الغوله" وباقي عائلتها اللي كان بيخوفوا الطفل بها لو مسمعش الكلام ويدخل معها "حجره الفئران مع أبو رجل مسلوخة اللي هيخيط رجله لو مشيي حافى "! ولما الطفل كبر وكبر معه اجيال بحالها كبرت معاهم "الافوره" واصبح من الطبيعي انه مفيش جمله مفيده او غير مفيده تقال الا ولازم يتحط عليها شويه بهارات علشان الكلام مابيحلاش من غيره ! ويعمل لك "من البحر طحينه" حتى اصبحت "الافوره اراده وسمه شعب " !

هذا الشعب بكل طوائفه واعماره "محفوره" جواه المبالغه بدا من زياره ضيف له في منزله واللي بيوصفها انه زاره النبي ولا يستحي من ذلك الوصف  حتى لو كان الضيف ده "مابيركعهاش" ! ، وكمان يزيد من ترحابه بانه يحطه فوق راسه حتى لو وزنه 2 طن ! مرورا برغبه صاحب البيت انه "يدبح عيل من عياله" على الاكل ليثبت للضيف انه غالي عنده اوي ! ولما بترسى في الاخر على شويه فول وجبنه ويطلب من البائع انه يتوصى شويه بالزيت الحار ويكتر الطحينه فيعبر له البائع عن شده حبه للزبون "من عنيا" يابيه حتى لو حيأخذ من عنيه دي شويه عماص ! نهايتا في تعبير الضيف عن شده اعجابه بالاكل بانه "اكل صوابعه وراه " ! .

شعب ظريف وجميل ولو لفيت العالم مش حتلاقي مثله في حبه للخيال الكارتوني اللي بيعشقه زي حبه عنيه ، يمكن علشان مش شايف نفسه مع واقعه المأساوي فخياله بيفوق خيال جيمز كاميرون مخرج فيلم افاتار ، بل ويفوق بشده خيال والت ديزنى نفسه لدرجه تجعلك تفكر ان ديزني مولود من اب شبراوي الاصل  ! ، شعب لما حتى بيحب بيحب بافوره فيجلس الشخص مع حبيبته على الرصيف ويقول لها "انت تقولي للقمر يقوم وانا اقعد مكانك "! ولما بينزل الواقع ويتجوز بيعرف ان علميا وعمليا القمر لو نزل على الارض حتحصل كارثه ولو حد طلع يعيش فوق حيموت ! ، شعب في شده مخاطره برده يعشق الافوره ويزيد من شده خوفه وبيحب يعيش جو الرعب فكنت تجد في اللجان الشعبيه الناس بتحمي بعضها وبتأفور في تلك الحمايه فكانت تختلق الخطر بان هناك ناس حتهجم عليهم من الشوارع الخلفيه بسنج ويمكن برشاشات وطائرات F16  كمان ! .


 شعب بيأفور من افكار بعضه ويكبرها ويخليها "وحش" امامه واللي بتطلع في الاخر "قطه" نيعو نيعو ! فيأفور من الليبراليين والليبراليه ويعرفها ان امك تمشي من غير حجاب !او ان البلد حتتحول في اعيادها القوميه الي حفلات ناس "مأفوره في عدم لبسها" وتطالب بمطالب "شاذه" ! بل وتتحول الافلام العربيه اللي اتربينا عليها الي افلام بورنو  تؤصل للفعل اللي مش حيبقى فاضح في الطريق العام ! ، ويأفور من الاسلاميين بانه حيعلقوا الناس وسط الشوارع ويجلدوهم ! - (كما حدث في فيلم فجر الاسلام  في تعذيب المؤمنين ! وبرده الافوره لم تترك الفيلم في حاله حيث "افوروا" وصوروا ان ابو لهب علشان كافر فوجهه اسود وحواجبه تتتتخينه مع انه سمي ابو لهب لانه كان شديد الجمال وحمره الوجه ! )- وتمشي جماعه تأمر بالمعروف وتخطف الناس بدون علم اهلهم - ( امن الدوله قايم بالواجب في الحته دي وزياده )- وتمشي البنات خايفه على نفسها من ضرب احدهم لها وهو يعلوا صوته ويصرخ في وجهها "اااااتحشمي يامره"! ، وانهم سيقوموا بحرق كل المطاعم الامريكيه ويسيبوا محلات "مؤمن" بتاع السندوتشات !

مما سبق اجد نفسي احاول مجرد محاوله ان اتقمص دور احمد ذكي في فيلم ضد الحكومه بل وأأفور في التقمص كمان واقول  " كلنا مافورون -(بما فيهم انا فانا ابن المنظومه المأفوره )- ولا استثني احد حتى المواطن قليل الحيله " ! لذلك اتمنى اننا نترفع شويه عن افوره المراهقين دي حتى لاتكون "الافوره اراده شعب " اللي بتودي في داهيه لان للاسف بعض الناس يسمعون نصف الحديث، ويفھمون ربعه ويتكلمون ويفتون  بأضعافه ! .

بطيخــــه قرعــــه !

لما تسمع امثال زماااان تستشف وتستنتج منها ان "نينه وجدو" كانت عندهم حكمه كبيره وخبره عريقه في الحياه تفوق خبره وفلسفه "ارسطو" في زمانه ! فتلاقي كلامهم فيه الشفا وهما كلمتين ورد غطاهم بس ايه في الجووول فتسمع مثلا "القرعه تتعايق بشعر بنت اختها " ولو تعمقت وحللت المثل ده وطبقته على ناس كتييير في حياتنا عايشين حولينا حتلاقيهم "مسخ من جوه ، وشكل من بره" يعني "بطيخه قرعه "! وحتلاقي الناس دي برده لهم سمه مميزه تميزهم عن باقي خلق ربنا - ( ماتخفش مش حتتعب كتيير في انك تجدهم لانهم منتشرين وسطنا كالنار وسط حقل البرسيم !)-  وهي انك تجد داخلهم قليل وبراهم كتييير ويبان لك هذا من اول كلمه ينطقوا بها ! لذلك  فلقله مابداخلهم من نقص فتجدهم بيعوضوا ذلك بالزياده - ( وكتييير بالبهرجه )-  في شكلهم وهيئتهم سواء بالافعال او الاقوال ! مما يجعلهم ارجوزات يتم استخدامهم من جانب الناس الاخرى للتسليه وللقلش عليهم في وجودهم ، ويقطّعوا فروتهم في غيابهم !

والمشكله الحقيقه واظن السبب في كل "العته" ده هو اننا "متطرفين" يااما يمين اوي يااما شماااال اوي والوسط اللي عمّالين نتغني به و"نمدغه " زي اللبانه في بقنا طول النهار والليل ليس له وجود في حياتنا ! فاما ان تجد اشخاص زاهدين - ( ودول اقليه جدااا نظرا لقله من هم لديهم ثقه بانفسهم ومستمتعين ومؤمنين بما في داخلهم !)- في كافه اشكال الحياه ومتعها ! واما ان تجد اشخاص متفشخره بالجامد-( ودول الاغلبيه )- في شكلها ولبسها  وابنائها او حتى بالمكان اللي عايشه فيه او المكان اللي رايحه تتغدى او تتعشى فيه حتى لو كان بسبب جمعيه وقبضها الاول وراح المكان ده بطلوع الروح ! بس الهدف يستحق كل هذا التعب وهي "الفشخره " اللي كتييير بتكون كذابه ! كذابه لانها بتضحك على صاحبها قبل ان تضحك على الناس فيصدق نفسه وكذبته بانه كويس وانه ابن ناس ومن اهل القمه - ( مع ان اهل القمه وولاد الناس مش بيعملوا كده لان اللي بداخلهم مليان اوي يغنيهم عن كثره القول والفشخره )-  ويرسم لنفسه "شخصيه وهميه" يصدقها الناس ويتعاملوا معاه من خلالها بس في الاخر هي شخصيه وهميه "مسخ من جوه ، وشكل من بره"! ، وللاسف بيساعد على ذلك الاستخدام الخاطئ للتكنولوجيا فتلاقى الناس بتشارك بعضها في على مواقع التواصل الاجتماعي اين ذهبت ومافعلت وكله بالمستنداااات (الصور) حتى تكون "الفشخره للجميع "!

 كل تلك السمات هي حصري فقط  في البلاد المتخلفه فقط اما البلاد المتحضره فمن سماتها ان الانسان ميزته في انه انسان يهتم بداخله قبل خارجه - ( بالرغم اننا بنمثل اننا متدينين الا ان كل الاديان السماويه بتركز على الداخل قبل الخارج بس احنا بنأخذ اللي على كفنا فقط والاسهل ! )-  لذلك تجد فيهم البساطه والتوازن في الشكل والعمق في المضمون هذا العمق لم يأتي من فراغ بل انه جاء نتيجه "الثقه بالنفس" تلك الثقه لم تاتي من فراغ ايضا فهي نتاج  العمل الشاق والناجح والتركيز على المهم قبل الاهم والاهم من كل هذا وذاك "القراءه" فهي الاساس الاول لثقه الانسان بنفسه وتجعله متوازن في حياته الخاريجه والداخليه - ( بعكس ماافرزته السينما في ان المثقف لازم يكون هدومه مقطعه ومدهول وعبيط ! ) - ، وكل ماسبق هو حلقه مكمله لبعضها فكل حلقه توصل للي بعدها حتى تكتمل باقى السلسله ويبقى في الاخر شكلها جميل وجذاب من اول نظره  ويصبح شكله وثمنه لايقدر بمال لذلك فحتى تكون بطيخه حمرا ومرمله يعشقها الناس ويتلهفوا عليها فعليك بالتوازن بين الداخل والخارج وبطل فشخره لانها مشهوره بكذبها !  بدلا من ان تكون بطيخه قرعه يقرف الناس منها مع اول قطمه ! 

خارجـــي مـــش داخلــــي !

وصلت لنا عبر السنين قصص من التراث والتاريخ الاسلامي بان الدين تم نشره في بلاد تعبد الاصنام والافيال كمان عن طريق المعامله التجاريه الحسنه بما تتناسب مع تعالم الاسلام "الاخلاقيه" الحسنه من الامانه والجوده والصدق ومن ثم فيسأل الشحص الذي يعبد اله اخر غير ربنا عن اسم هذا الدين لكي "يعتنقه" فيتم جوابه بان الاسلام هو ديننا وربنا هو إلهنا ، تتطور هذا المفهوم عبر مئات السنين وزي اي حاجه في الدنيا اذا لم يتم صيانتها فتتدهور فالان وبعد هذا الانتشار للاسلام اصبح الغرب بيسال نفس السؤال اللي سأله اجداده من مئات السنين مااسم هذا الدين لكي "لانعتنقه" ونبعد عنه من الاساس ويانحله لاتقرصيني ولا عايزه عسل منك ! ونجيب عليهم ليس بالاقوال والمعامله فقط لاسمح الله بل نرد بالافعال التي تدل على واقع كسول غير مؤهل لنشر الاسلام حتى في البيت اللي جنبه ! واليك الشواهد علشان متقولش اني ظالم ومفتري واني مش بتاع ربنا !! :-

-          لما تلاقي بين كل زاويه وزاويه زاويه للصلاه وتدخل تلاقي صف او صفين بالكتير اوي وربع صف في صلاه الفجر بيصلوا وراء الامام  يبقى ده ايه بقى!؟ هي مش الصلاه عماد الدين ولا هي عماد متعب ! ثم تلاقي اللي بيأذن صوته زي الغراب عايز يأخذ ثواب انه يأذن وهو بيأخذ ذنوب على ازعاج الناس بصوته واللي زاد وغطا انه بيذيع الصلاه كلها في الميكروفون الخارجي والداخلي دون مراعاه مريض او امراه عجوز اوي اي شئ ! مع ان الدين وصانا بسابع جار وانه دين الرحمه!! .

-          لما تلاقي اكبر نسبه للتحرش الجنسي في بلدنا وكله هايج ومش عارف يمسك نفسه مع ان الدين امرنا بغض البصر واحترام حرمه الشارع ! وتجد شيوخ يطلعوا فتاوي تفشي الفاحشه اكتر ماهي متفشيه بفتاوى ارضاع الكبير ! ، وزواج المتعه ، ويأتي باشكال والوان من العلاقات اللي بقى ملهاش مكان وسطنا في هذا الزمان مثل ملك اليمين ! ومصدر الفتوه دي اصلا عايز يفك زنقته قام فاتى باي كلام  ! .

-          لما تلاقي مصانع مرموقه في البلد -( وانا اعرف منهم كتيير وشفتهم بنفسي واتعكيت من اهمالهم في كتيير من المشاكل وشكوى العملاء )- واغلبيه العاملين فيها مهتمين بطول وجوده اللحيه والاعتناء بها ومهملين في جوده المنتج اللي بيطلعوه من ايديهم مع ان الدين امرهم إِذَا عَمِلَ أَحَدُهمْ عَمَلا أَنْ يُتْقِنَهُ ! .

-          لما تمشي مع واحد صاحبك او حد ليك سابق معرفه به ويكون مربي ذقنه -( حتى لو يساري مربي ذقنه )- تلاقي الاخ اللي جاي من الجهه الاخرى يسلم عليه فقط ويسيبك كأنك هوا شفاف ملكش اي وجود ! مع ان الدين امره ان السلام لله وافشوا السلام بينكم ! .

-             لما تركب مايكروباص وتلاقي السواق مشغل ايات من القراءان والمصيبه ان منها مثلا " وَمَنْ يَعْمَلْ مِنَ  الصَّالِحَاتِ وَهُوَ مُؤْمِنٌ فَلا يَخَافُ ظُلْمًا وَلا هَضْمًا "وعمال بيبلطج على الناس ويستغلهم في رفع الاجره مع ان المسافه متستحقش كل ده في حين ان  نظام الإسلام صارم في منع الاستغلال لحاجة الناس ! .

-          لما تغلط وتعمل ذنب وتحب تسأل شيخ علشان تعرف الصح فين وترجع الي ربنا فكتييير منهم ينهرك ويقولك ايييييييه اللي عملته ده ويزود الطين بله ! ثم ينظر لك بمنتهى الاستحقار وكأنه ملاك منزّل من السماء لايغلط ! - ( اعرف واحد منهم كان بيحب مايكل جاكسون وبيعرف يرقص زيه ولما ربنا هداه وبقى "بتاع ربنا" مفيش فتره بسيطه واصبح يفتى في كل شئ واحب كلمه ياشيخ دي اوي ولما حد ساله عن شئ في التاريخ الاسلامي فقال ان الرسول لما قال " اللهم أعز الإسلام بأحد العمرين " كان يقصد عمر بن عبد العزيز !! مع انه ولد 61 هـ والرسول مات 11 هـ وكان المقصود من احدى العمرين ده عمر بن الخطاب ، وعمرو بن هشام ( أبو جهل ) بس ليه ميفتيش هو مش بقى شيخ ! )- ده الرسول لما جاء له واحد وقال له صرح لي بالذنا تكلم معاه الرسول بلطف حتى اقنعه بهدووووء في ان اللي بيعمله ده غلط ولا يجوز وانه من الكبائر !!

-          لما يروح شاب يتقدم لوحده بنت واهلها يقولوا له في بدايه الكلام قبل الدخول في العميق احنا يابني بنشتري راجل واهم حاجه عندنا الدين والاخلاق ويطلع كلامهم ده كله مجرد كلام في الهواء مع اول اتفاق على المهر والشبكه وتجهيز الشقه ويحملوه بما لا يطيق مما يدل على "الطفاسه" في كل شئ حتى الجواز ! مع ان الدين بيقول "اذا جاءكم من ترضون دينه وخلقه فزوجوه، إلا تفعلوا تكن فتنة في الأرض وفساد كبير" !! .

-          لما تلاقي الناس في رمضان نازله كلام هنا وهناك وكانها في سباق ليس مع نفسها وربها بل مع الناس وتهتم بالارقام اشد اهتمام فيقول كل بني ادم للاخر انا قرات 10 اجزاء في اليوم وصليت تهجد 11 ركعه وكذا وكذا طب هو مال الاخرين بكده هي دي فشخره ولا ايه ! مالاعمال دي بينك وبين ربنا لان الاعمال التي يشرك فيها احد مع ربنا لا تقبل اصلا وان النيه دي زي اللبن تتعكر من اقل تراب ! .

عزيزي القارئ الذي ينادي باقامه دوله الاسلام .... قول له اقمها جواك انت الاول ثم طالب الاخرين والدوله انها تبنيها ، لما نواجهه تلك العادات السيئه ونعترف بالاخطاء اولا ونتخلص ثانيا من مفهومنا عن اننا ملائكه الرحمه وليس بنا اي عيوب ، ولما نواجه الحقيقه باننا مسلمين بالشكل وليس بالمضمون ! ساعتها يمكن ننهض ونبقى دوله محترمه وساعاتها قول براحتك انك بتنشر الاسلام لان ساعتها الناس هي اللي حتدخل الاسلام بنفسها لان السمعه الحلوه حتبقى سبقاها لكن دلوقتي الناس عايزها تحب الاسلام ازاي يعني لما تلاقي ناس عايشين عاله على العالم المتقدم ، لما تلاقي ان الفقراء اغلبهم من المسلمين ، لما تلاقي ان الدول المستبده التي لاتوجد عندها رحمه ولا عدل من دول الاسلام ، لما تلاقي اننا بنتكلم اكتر مابننتج ، لما تلاقي ان مفيش ولا منتج واحد اسلامي وتلاقي واحد متفزلك يقولك نقاطع طب قاطع بقى الكمبيوتر اللي بتقرا عليه تلك المقاله ، والميكروفون اللي شيوخك بيشتموا فيه اللي صنعوه ! لذلك  فبعد هذا العرض مني ارجوا ايها القارئ الا تترك جسم الجاموسه وتمسك في ذيلها وتهاجمني وتقول لي ياعدو الدين يافاجر لان الغرض هو تحديد المشكله وتعريفها ومن ثم الاصلاح والبحث لها عن حلول جذريه بدل مااحنا دافنين راسنا في الرمل ونقول باننا جامدين اوي وزي الفل واحنا متنيلين وزي الزفت وعاملين زي اللي مش عارف يتجوز مراته وبيأوح ومش عايز يروح لدكتور فايبخت من بكاني ولا ابكى الناس عليا ويابحت من ضحكني ولا اضحك الناس عليا ... سلامات .