"الجعان يحلم بسوق
العيش" ذلك المثل النابع من تراثنا الشعبي اللي بتشر منه الحكمه يمكن ان يشرح
لنا نفسيه الشخص اللي بيعيش على اطلال الماضي ويعطي ظهره للحاضر اللي شايف جدرانه مدهونه
باللون الاسود ! لذلك فلا يجد الا الماضي يجري عليه ويترمي في احضانه ويقعد على
حجره ويطل بخياله ويدلدل قدمه في مياهه العذبه ليشكو اليه ضعف قوته وقله حيلته متجاهل
مرّه الذي كان يشكو منه في يوم من الايام لان حاضره مش ناقص مرّ ! فيلجأ اليه
للتخفيف من حده ضغوطه ! متناسي بان لكل زمن مرّه وضغوطه وظروفه ! مثله مثل الشخصيه
الكوميديه في اي فيلم ابيض واسود تسمع اللي يوافق مزاجها ومتجاهله "وتعمل
عبيطه" في الكلام اللي مايعجبهاش !
فعلى المستوى الاجتماعي : ترى المجتمع مع تغيير كل نظام -(اللي بطبيعه
حال بلدنا بيتغير مع الاشخاص اللي بقى تغييرهم دلوقتي كتغيير كارت اعاده شحن
الرصيد ! )- الكلمه الاشهر لديه " ولا يوم من ايامك يا..." مع انهم
كانوا في ايام مايدعى ب "يااا" كانوا بيشوفوا الذل والهوان وده راجع لان
واقعهم الحالي فاشل فبيحنوا الي الماضي اللي كان برده فاشل ولكن بدرجه اقل ( وده
طبيعي فبزياده الاعباء والضغوط وبدون وجود اي حل لازم يبقى الحاضر افشل من الماضي
) ويشتغلوا زي الجزار يشفي اللحم من العظم ! وبعد لما كانوا راضيين بحته لحمه
مخلوطه بعظمه بقوا راضيين بالعظمه نفسها بدون اللحمه ! .
ذلك
المجتمع لا يذكر عيوب الماضي ويعتبر الماضي مثالي كأي راقصه لا ترى ماضيها مخزي
تراه اكثر بياضا ! مجتمع "يولول" على اخلاق الحاضر وكأن المجتمع تغير
فجأه مع انه مجتمع منحل بطبعه بس مستني فرصه يفلت من قيوده اللي نابعه من العادات
والتقاليد والدين ! ، المجتمع هو هو وماتغيرش كل اللي اتغير انه كان بيمارس
انحلاله في السر (راجع فيلم بين القصرين ) دلوقتي بقى في العلن (راجع
فيلم حين ميسره) وده بس لتطور التكنولوجيا اللي عرت المجتمع بعد ماكان بيعمل اللي
بيعمله تحت البطنيه !
قيس على ذلك كل الظواهر اللي في المجتمع
بدايه من الاغاني الشعبيه ( اللي منهم دلوقتي بيقول على عدويه من زمن الفن الجميل
! مع انه في زمه اتشتم لما قال يابس وكانوا بيقولوا ولا يوم من ايامك يامنيره
يامهديه ! ) مرورا بالقمامه في الشوارع الي الزحمه الي الشتائم القبيحه الي الكسل
وقله العمل والانتاج الي النفسنه والحقد والنظر الي مافي يد الاخرين نهايتا
بالتحرش الجنسي اللي طول عمره موجود (راجع الكاريكاتيرات والافلام القديمه وانت
تعرف قصدي ) في بلدنا اللي رجالها لديهم صفه اشهر من النار على العلم ان عيونهم
زايغه ! .
على مستوى الجماعات : ترى صفه العيش في الماضي واضحه بقوه في اي
تنظيم سياسي او ديني فاي تنظيم ديني لكي يكون صحيح من وجهه نظره لازم يتمسك وبشده بدون
تفكير بافكار اجداده التي لاتصلح للزمن الذي يعيش فيه ! يخضع لتفسيرات قراءنيه
اجتهد مفسريها في الماضي ليحلوا بها مشاكلهم في زمانهم التي من المؤكد انها تغيرت
واصبح هناك مشاكل من نوع اخر تحتاج الي تفسير جديد وللاسف البانه اللي دائما في
بقهم ان القراءن لم يفسره الرسول لكي يواكب كل زمان ومكان لكن يشأ المثل المصري
الصميم يعبر وبقوه عنهم " اسمع كلامك اصدقكك اشوف امورك استعجب "!
فالقراءن صالح لكل زمان ومكان لكن كلام الشيوخ القدامي هم شايفينه برده يصلح لكل
زمان ومكان ! مجرد نقالين كلام من كتب التراث "كسلانين " يجتهدوا في
تفسير الايات والاحاديث بشكل جديد يواكب العصر وعلشان كده تلاقي ناس كتير بقت تقول
على الالحاد وعلشان كده احنا اخترنااااه !
ياايها الراقدون تحت انقاض الماضي قوموا الي
حاضركم يرحمكم الله ! كفايه بص في المرايه على الماضي علشان كفايه رشقه في الحيط احنا
اتخرشمنا ! استعملها فقط في ملاحظه الطريق والحذر من اللي حوليك لان الطريق الاساسي
هو اللي قدامك مش اللي وراك لان الماضي فات واصبح ذكريات ! الماضي جميل ولطيف لكن حاضركم
حيبقى ماضي في يوم من الايام وده اختيار منكم اما يكون ساحر وجميل وملهم للاجيال
التاليه واما يكون عار ويلعنكم به اللاعنون !
ليست هناك تعليقات:
إرسال تعليق