اعاده تســـــويـــق بلــــدنــــا

قرات الخبر ده في احدى الصحف وهو " لقد منحت اللجنة التنفيذية التابعة للاتحاد الدولي لكرة القدم قطر شرف استضافة مونديال2022 , وتنافست قطر على الاستضافة مع الولايات المتحدة واستراليا وكوريا الجنوبية واليابان ، وهي اول دولة عربية تحظى بهذا الشرف  وقد تكلف هذا الحدث تعب واعداد وانفاق الكثير من الاموال واستخدمت التقنيات المستدامة وأنظمة التبريد المستخدمة على أكمل وجه في الملاعب ومناطق التدريب ومناطق المتفرجين" كل ده قامت قطر بعمله لزياده السائحين ولفت نظر العالم اليها ...احنا بقا ياريس مدفعناش اي فلوس ولاعملنا تكيفات تبريد ولكن دفعنا دماء الشهداء واعيد اعتبار الوطن ورجعت مصر سالمه لينا مصر اليوم في عيد زي ماقالت الفنانه شاديه ورجعت لها مكانتها الكبيره والعظيمه  اللي اكتسبتها طوال تاريخها الحضاري سواء على المستوى العربي او العالمي واصبح السائحين في شغف شديييييد لزياره مصر ام الدنيا وابوها كمان وخصوصا ميدان التحرير!!! -  مهما كانت اراء الحاقدين اعداء السلام - ويشوفوا شعبها العظيم اللي اكتسب بفضل النظام السابق الفاسد سمعه لاتليق بوضع مصر الاقليمي ولا وضعها الحضاري ولو كنا كملنا بالمنظر ده كنا حنشوف" كل الاوضاع"!!! فمن قريب اتكلمت مع احدالسائحين الفرنسيين وقال لي بانه فخور جداا بالمصريين وهو ليس خائف على نفسه بما يحدث في مصر الان وان اصدقاءه واقاربيه فرحين جداا بما حدث وعايزين يزوروا مصر في اقرب وقت ممكن .. لابد ان نستغل الحدث ده – وبطبيعه الحال الشعور الوطني الذي يملئ كل مصري وفخور كل الفخر بانه مصري ويقول " ارفع راسك فوق انت مصري" - الاستغلال الامثل وعلى الشكل الصحيح لان مصر تمتلك مقومات واصول غير مستغله لسنين طوييييييله من القمع والفساد لو تم استغلالها حتكون واحده من قائدي المنطقه والدول التي لها كلمه مسموعه وام الدنيا وابوها كمان فعلى سبيل المثال وليس الحصر في المجال السياحي مثلا عندنا اثار " فرعونيه ، اسلاميه ، قبطيه ، يونانيه " ، لدينا شؤاطئ ساحره ، لدينا الجو الطبيعى البديع وقفلي على كل الموضيع ومع كل ده ترتيبنا فيها 24 !!! ، لدينا ثروات طبيعيه وبشريه يمكن استغلالها في الصناعه وركب قطار التقدم الصناعي والتكنولوجي مع الدول المتقدمه فلو عايز تعرف مصر رايحه على فين اركب وانت تعرف يعني شارك في تسويق وطنك بالعمل والاجتهاد في عملك وتعالى نغير الصوره الذهنيه عن الصناعه المصريه عند الاجانب ويكون المنتج المصري له سمعه قويه في الخارج يعني النهارده الهند لها اسمها في الصناعات التكنولوجيه اللي من فتره بسيطه كان لما واحد صحبك" يحور "عليك تقوله انت فاكرني هندي ولا ايه!!؟؟ دلوقتي دي مش شتيمه ده فخر والمثل ينطبق على بلاد كتيييييره احنا مش اقل منهم لازم ندور على المزايا النسبيه لبلدنا ويكون لنا رؤيه لبلدنا زي ماليزيا 2020 يعني احنا زمان كنا مشهورين بالقطن طويل التيله وكانت انجلترا ايام الاحتلال بتزرع القطن عندنا وتستغل ثروتنا وخير بلدنا وتبيعه في الخارج باغلى الاثمان دلوقتي والحمد الله بفضل حكومه" الكوارس"- مش الكوادر- السابقه القطن بقا" قصير ونيله"!!! كل واحد مننا عليه دور مهم في التسويق ففي علم التسويق مش بس المسوقينmarketers  هم اللي عليهم المهمه دي دي الشركه كلها عليها المهمه دي ومخلياها في الاعتبار كلنا مشتركين ومساهمين في شركه عظيمه وعريقه تفوق قوه وخير اي شركه اخرى في العالم ارجوا ان الكل يشارك وخلاص الحجه القديمه خلاص ملهاش مكان وهي " ياعم هي البلد مش بلدنا احنا دي بلدهم هما - طبعا بعيدا عن تصريح الشيخ يعقوب طبعاااا- وده لسبب وحيد وكبير انك ارفع راسك فوق انت مصري .

.

صــــــدر ولا ورك!!!

تكلم وزير الاوهام – الاعلام سابقا – على انه كان يجلس منذ اليوم الاول من اندلاع تلك الثوره التي غيرت ليس فقط مستقبل مصر بل مستقبل العالم كله مهما كانت اراء البعض- الحاقدين طبعا اصحاب المصالح - في مكتبه يخدم بلده ووطنه مصر "المسروقه" كل ده طبعا كلام انشائي يقال في افتتاح محل بطاطه والسبب الرئيسي والواضح وضوح لان ماقدمه الاعلام المصري كان يتعامل بمنطق المنشات العسكريه ( ممنوع الاقتراب او التصوير) وهو نسي ان هناك  قنوات اخرى وصحفيين ومراسلين عالميين في موقع الحدث ويقدمون الحقيقه وليس اوهام بان كل شئ تمام وتحت السيطره فلما انتقد من الشعب والناس فستخدم منطق الكذب والنفاق فقلل من شأن شباب ميدان التحرير وادعى عن طريق ناس وقالوا بان من في ميدان التحرير يتقادون عن اليوم الواحد 55 $ وكمان ثلاثه وجبات كنتاكي !!! طيب لو كان ذلك الكلام سليم فهل ياترا المثقفين والسياسين والكتاب كانوا يأخذون وجبات كنتاكي فهل ياترا الاستاذ ابراهيم عيسى مثلا بيحب الورك ولا الصدر !!؟؟ وايضا الاستاذ عمرو موسى بيحب الفراخ بالكاتشب ولا بالمايونيز !!؟؟ كفاااااا للاعلام المصري الوهم والتضليل اللي عيش الناس فيه وجعلهم يتحولون الي قناه الجزيره التي هاجمها بشده وكان السبب في سحب ترخيصها طيب الناس تعمل ايه عايزه تعرف ماذا يحدث في بلادهم فيتحولون الي قناه الجزيره وماشابها  بدلا من منظر كوبري 6 اكتوبر وكورنيش النيل والبلد بتولع ويحسسوا الناس ان كل شئ تمام وان كل شئ على مايرام !!! ثم انتقلت عدوى الاعلام المضلل الي قناه المحور الذي يعتبر الطفل المدلل للتليفزيون المصري ومثله الاعلى في التضليل حيث اتى بواحده – شكلها اصلا غلط - وادعت بانها مدربه من الخارج وهي صاحبه اندلاع الثوره – كويس اهو البرنامج اتلغى والقناه في تراجع - وان كل شئ كان من تخطيطها وانها من اسرائيل !!! ياااااااسلام طيب بالزمه ده اعلام وفي الاخر طلعت صحفيه في احدى الصحف القوميه اكيد علشان منظومه الاوهام تكمل !!! والافجر من هذا كله انهم ادعوا بان من تظاهروا وبالاخص من في ميدان التحرير عملاء الامريكان ولديهم اجنده اجنبيه ومخطط لتدمير البلاد وعلشان "يسبكوها" اكثر واكثر قالوا بان ذلك موجود في وثائق ويكليكس خلاص اصبح ويكليكس صحيح البخاري علشان نصدق ماجاء فيه ده يمكن ميكونش في ويكليكس اي شئ ويكون كل ده باطل ونسمع بعد كده ان مؤسس موقع ويكليكس رفع عليهم قضيه !!! كل هذا حتى الان لا يستطيع هؤلاء المنافقين ان يدركوا ان العالم تغير تماما 180 درجه بعد ثروه الغضب 25 يناير وان ماقام بها هم شباب ثوار مثقفين واعين متعلمين ومحترمين والام من كل هذا وطنيين انا اتمنى ان يجلس التلفزيون المصري مع نفسه ويراجع اخطاءه و خطاياه والتضليل الذي ماذال موجود فيه – كويس اهو في حمله تطهيريه ارجوا ان تنجح - ويتعلم بان ماحدث في ثوره الغضب هو ماحث بالفعل في "وكسه 1967" وقالوا بان كل شئ تمام ياريس وان الجنود المصريين دخلوا تل ابيب !!! وفي الاخر اكتشافنا المصيبه والتضليل قولي هو انت بتحب الصدر ولا الورك ولا تحب حقك ناشف!!!                                                                                                                                  

عملـــــــه مـــــــــزوره

يدعي الاخوان المسلمين ان الدين والسياسه وجهان لعمله واحده !!! ازاي يعني وجهان!!؟؟ ماهو اما دين يااما سياسه وبعدين لو وجهان تبقى "عمله مزوره"  يعني هما ضحكوا على الناس وروجوا انهم لابد ان يقولوا نعم علشان ده الواجب الشرعي ودخلونا في حرام وحلال وكلام الريس متئال واستخدموا برده الكلمه السحريه الاستقرار "وعجله التنميه " فكتبوا في كل حته نعم للتعديلات وده لمصلحه البلد طب اااازاي هي الحدايه بتحدف كتاكيت !!! ومن امتى الرضا ده وخوفهم على مصلحه البلد ده هدفهم من ساعه لما وجدوا على ظهر الدنيا هو الوصول للحكم!!! – انا عارف ان هدفهم الان مش الحكم هو تفكيرهم استراتيجي هما عايزين المحليات لانها هي المتحكمه في البلاد وفي دعم مرشحين مجلس الشعب اللي بطبيعه الحال حيبقى المتحكم في زمام الامور لاننا بنطالب بجمهوريه برلمانيه - لا وبيلعبوا على الوتر الحساس للناس الغلبانه واللي مش غلبانه ويقولوا قولوا نعم للتعديلات علشان الاقباط عايزين يلغوا الماده الثانيه – اللي محدش جلب سيرتها اصلا - وبما ان الدين هو افيون الشعوب كما قال كارل ماركس فهما لعبوها صح بجداره وضغطوا على الوتر الحساس طيب الناس اللي سمعت كلامهم دول معندهمش عقل وميعرفش ان في حديث لرسول الله بيقول "لاتكن امعه" طيب اهو سياتك سمعت كلامهم حتى لو مختلف معاهم ومش طايقهم واديك ساعدتهم من غير ماتعرف وللاسف حجتك كانت ضعيفه جدااا ومشيت ورا كلام مرسل ليس له اساس من الصحه اللي زي دفع عجله التنميه تنميه ايه ياستاذ في حاجه في دراسه الجدوى اسمها الظروف المحيطه بالمشروع منها الظروف السياسيه والاقتصاديه للبلد يعني بقولك نعم علشان العجله... دي عجله وسرعه ملهاش اي مبرر لان مفيش مستثمر "عبيط" حيحط رجله او حتى شركه حاطه رجلها حتضع اي مليم الا لما حال البلد يتعدل وده مش حيكون قبل سنه او سنتين- ده على اقل تقدير - سواء قلنا نعم او لا ...اما اللي كان مبرره ان الماده 189 ملزمه للرئيس الجديد انه يعمل دستور جديد لالالا طبعا غير ملزمه يعني ممكن الرئيس يدعوا مجلس الشعب انه يجتمع والمجلس لا يوافق على الاجتماع اللي اصلا الاخوان المسلمين مسيطرين عليه وانا مش ضد الاخوان كجماعه دينيه دعويه فقط لا انا ضد عدم التكافئ واستخدام الدين للاغراض السياسيه والمصالح يعني ميتفعش تكون الاحزاب الاخرى – مش قصدي الاحزاب الديكوريه اللي كانت بتنفذ تعليمات سياده الرئيس انا اقصد الاحزاب اللي خرجت من بطن الثوره - الغير منظمه لنقسها وغير مؤسسه وغير معرفه للناس اصلا حتى لو حينزلوا مستقلين محدش عارف حد فيهم ومفيش وقت حد يعرف حد طيب يااخوان عليكوا واحد وتعيشوا وحتغدوا غيرها انتوا وكل اللي مبيفكرش كمان ده لو عشتوا اصلا  لان اهو الجماعه السلفيه "اللي ملهاش فيها " – بزعامه الشيخ يعقوب اللي بيقول اللي مش عاجبه يمشي ويروح كندا !!!- اللي قالوا ممنوع الخروج على الحاكم عايزين يعملوا حزب سياسي "وينطوا " على الثوره وبتلميحات للاخوان المسلمين بيقولوا لهم " عودوا الي صوابكم وحاسبوا انفسكم قبل ان تحاسبوا وتعالوا لحمو وسيبكوا من البرادعي اللي الناس بتردد عليه كلام اهبل انه ترك ذقنه علشان تحالف معاهم !!! ارحمي يارب ضغطي خلاص بقا 150 وانه عايز يخلي بناتنا تمشي عريانه في الشارع ده بالزمه كلام ناس عاقله ده بيفكرني بفيلم "صراع الاحفاد " بتاع نور الشريف وصلاح السعدني لما نور الشريف – الامي والجاهل - حب يكسب معركه الانتخابات من ابن عمه الكاتب المسرحي – المثقف المتعلم - راح روج انه بيكتب مسرحيات خارجه وتسب الذات الالهيه ومكنش من الناس الغلبانه الا انها ضربته وطردته وكسب نور الشريف المعركه الانتخابيه!!! ... طيب السؤال اللي محيرني هما كانوا فين قبل الثوره ( الجماعه السلفيه )؟؟؟ ارد عليك يانجم ياباشا كانوا معتكفين ومنغلقين على نفسهم وكأنهم عايشين في بلد اخرى وكل هدفهم هو هدف ديني "اناني " يعن ازاي تنجي "نفسك" من النار وكل اهتمامهم منصب على "ارضاع الكبير" "وبول الرسول " ياااااااا خلاص دينا الدين العظيم حسرتوه في العبادات والحاجات دي طيب فين مقاومه الظالم !!!؟؟؟ فين مقاومه الفساد !!!؟؟؟اللي كانوا بيطبقوا ربع حديث الرسول "فان لم تستطع فبقلبك وهذا اضعف الايمان" هما بقا اختاروا اضعف الايمان ودلوقتي بعد نجاح الثوره عايزين يعملوا اقوى الايمان ويستغلوا "وينطوا"  طيب هو مش "النط" حرام برده وانه لازم كتب الكتاب!!! بالاضافه الي انهم بيقولوا عايزين نقيم دوله اسلاميه طيب انهي اسلام اسلام  محمد يعقوب ولا عمرو خالد ولا مين بالظبط!!!؟؟؟ طيب احنا كده خرجنا من قمع حريه بالقانون والدستور المدني حندخل في قمع حريه بالدستور الرباني اللي يحتمل تأويلات كثيره شيوخنا حيطبقوه كما يحلوا لهم برعايه الفكر الوهابي اللي هب ريحه علينا منذ السبعينات !!! وممكن حد يقولي انهم كانوا ممنوعين بامر امن الدوله اقولك ان المنع ده كان على الكل الفرق بقا هو الاستسلام او عدم الاستسلام !!! ياريت الكل يرجع الي مكانه ويكون اهل الدين اهل دين واهل السياسه اهل سياسه لان السياسه تفسد الدين والدين يفسد السياسه لانهم مش وجهان لعمله واحده لانها عمله مزوره.

وثـــــالثنا القـــــــلم

طبعا احساس جااااامد جدااا تجريه انك تقول رايك بمنتهى الحريه لاول مره بدون ان تجد بلطيجه واعداء الحريه بتوع الوطني او ماينوب عنهم- صحيح ذيولهم كانت موجوده لان ديل الكلب عمره مايتعدل لكن تأثرهم كان محدود - وطبعا كان عيد لكل المصريين كان فاضل بس نشغل اغنيه الفنانه فاطمه عيد وهي بتغني للعيد الليلادي عيد او الاغنيه المعتاده لصفاء ابو السعود العيد فرحه واجمل فرحه تجمع شمل قريب وبعيد .احساس رااااائع انك تأخذ ورقه التصويت "وتختلي " بها بدون "محرم " وراء الستاره وتكتب بقلمك رايك ب لالالا او نعم بدون اي منغصات واللي لو رايت احد بيفرض عليك رايه كنت ممكن تبلغ عنه الجيش ويأتي ويضع في يده" الكلابوش" – حد يقرصني لاني مش مصدق كأني بحلم -  احساس رااااااائع  انك تلاقى الناس كلها لاول مره بتجمعها حاجه عدله بدل الكوره وتصرحات اللعيبه المستفزه ان المنتخب هو من يملك الحق الحصري لفرحه الشعب المصري – انا نفسي اغنيلهم اغنيه لسه فاكر .... كان زمان بتاعه ام كلثوم – واصبح نجوم المجتمع الاستاذ ابراهيم عيسى واحلام البنات واحد زي د.عمرو حمزاوي بشعره المنكوش!!! شعور راااااائع انك تلاقي سيده بسيطه بس على قد بسطتها واميتها – على حد قولها- الا انها كان عندها منطق مشفتوش من استاذ جامعه فسألتها حضرتك قولتي ايه؟؟؟ قالت لالالالا طبعا ومن قلبي كمان وعن اقتناع تاااام قلتلها ايه السبب؟؟؟ قالت " مينفعش يكون الجرح ملوث ونروح نخيطه " – منطق بسيط ومقنع - احساس راااااائع انك تلاقي اطفال جايه مع امهاتها وبيحضروا التجربه الرائعه دي لان المثل بيقول" التعليم في الصغر كالنقش على الحجر " فدول كده خلاص اتعلموا -واتعلم عليهم- يعني ايه حريه ويعني ايه صوت انتخابي ويعني ايه مشاركه وانك لازم تشارك وان اللي مش لون صوابعه مش بامبي يبقى سلبي وانك لازم ترفع صوابعك فوق لانك مصري باللون البامبي علشان صوتك حيخلي الحياه لونها بمبي او اسود حسب اختيارك انت ده انا حاسس ان الصندوق كان حيعيط ويقولي فييييينك من زمااااااان !!! وسواء كانت النتيجه بنعم او لالالا مش مهم المهم ان الناس خلاص اصبحت عارفه ان صوتها امانه – مش امانه الحزب الوطني واللي كان بعمله -  وانه ممكن يغير مصير البلد وشعرت بالمسئوليه وان البلد بلدها وان فعلا مصر بتتقدم بينا تجربه رائعه بكل المقاييس وتجربه ديمقراطيه- صحيح احنا لسه في سنه اولى – رائعه لان على راي عمنا احمد فؤاد نجم "  طلطي راسك طاطي طاطي انت في بلد ديمقراطي " لان ده كان منطق الديمقراطيه في العهد القديم فكانت الديمقراطيه عندهم قول اللي انت عاوزه واحنا نعمل اللي احنا عايزينه لانهم كانوا فاكرين الشعب لسه "نغه " ولسه" بالبامبرز " وكانت فكرتهم عن الديمقراطيه بتفكرني بمسرحيه المتزوجون لما قال الفنان جروج لنجاح الموجي " قولي ياواد يامزيكا يعني ايه سياسه الوفاق فقاله يعني توفق راسين في الحلال فقال جورج : دي سياسه امـــــك !!!! فانا مبسوط جدااااا لان لاول مره بكون انا والصندوق وثالثنا القلم.

بعد سنين كتييير اخيرا الشعــــب حيقول رايـــــه بحريه

مــــش بالتــــزييف والفســــاد وشغــــل البلطــــــــــجيه

احنــــا عايزين البرلمــــــــــان زي اي دولــــــه اوروبيه

هواللي يحكم بالقانون والشرف وباخلاق رجال العسكريه

يعني الرئيس تكون صلاحياته على القد ولها برده اهميـه

وكفايه تمجيد في الحاكم ده زينا من ثروه مصر البشريـه

ياخوانا دي بلدنا جميلـــــــه وليـــــها مميزات تنافسيــــه

اصلها ذكرت في القران اكتر مـــــــن اي دوله عربيـــــه

مسلـــــمــــسيحـي

اللي يشوف الكلمه من اول مره يقول ان في غلط وان لازم يكون في مسافه بين الكلمتين على شان تعرف تقراها صح مسلم – مسيحي ولكن ده على الورق ولكن الواقع بيقول غير كده لاننا بنعبد اله واحد وعايشين في وطن واحد وبنتكلم لغه واحده وتاريخنا واحد ومصيرنا واحد ولازم نعرف ونفهم  كده كويس جدااا ونضعه في الاعتبار في اي قرار نأخذه في ان مصلحه بلدنا فوق كل شئ فالعدو اذا دخل بلدنا مش حيفرق بين مسلم ومسيحي ولينا في العراق ، وفلسطين، وجنوب السودان عبره من كده وحنروح بعيد ليه فثورتنا خير دليل "فرصاص" الامن المركزي السفاح لم يفرق بين مسلم ومسيحي حتى تاريخنا بيقول ان من حوالي 92 سنه - يعني اثناء ثوره 1919 - الاحتلال الانجليزي كان عايز يفرق بينا بحجه حمايه الاقباط لكن الشعب فطن وفهمها وهي طايره وطلع خطيب الثوره القمص سيرجيوس الذي وقف خطيبا في الازهر وقال " اذا كانت ذريعه الانجليز لاحتلال مصر هي حمايه لرقباط فليمت الاقباط وليعش المسلمون احرارا" ولا يقل احفاده الان عنه وطنيه وذكاء لان المسيحين خرجوا بعد الحوادث اللي حصلت في اسيوط " فقالوا شعب واحد ودم واحد " فدائما دور على من له المصلحه فالهدف من كل التفرقه دي هي السياده على غرار المثل العربي " فرق تسود " فالسياده في المنطقه للعدو الاول وهي اسرائيل لان كل اللي بيحصل ده اجنده- بجد مش اجنده خيبانه زي بتاعه التليفزيون المصري- امريكيه اسرائيليه - بجانب طبعااا"المتخلفين " اللي مش فاهمين حاجه وبينفذوا تلك الاجنده بدون وعي ولا عقل بجانب اصحاب المصالح اللي مش عايزين البلد ينصلح حالها - وكل ده لبث السموم في جسد بلدنا لانها مش عايزانا ننهض لان الديناصور لو فاق حيأكلها وتروح فطيس ويجهد حلمها اللي بتحارب علشانه من سنين فتأمل خطاب التوديع - كما يسمي في المخابرات الاسرائيليه- اللي اتنشر في احدى الجرائد الاسرائيليه ان المخابرات الاسرائيليه انفقت الكثير في حدوث الفتنه في مصر و الشحن بين المسلمين والمسيحين حتي يفشل اي رئيس في اصلاح تلك الفتنه!!! فلازم نفوق ونتحد وبلاش الكلام  الغير عاقل الخيبان  اللي لايودي ولا يجيب بتاع الاغاني ده لاني بعتبر ان دي كلها شعارات وحماس زائد وكله كلام في الهواء ... ليكن مافي القلب في القلب المهم المعامله مدام بنعامل بعض كويس يبقى ايه المانع من التعايش سويا في بلد واحده بدون مشاكل بلاش تكون نظرتنا ضيقه ونبص على بلدنا من "خرم" ضيق لازم نشوف الصوره كامله والوضع علشان ميبقاش الوضع " كل الاوضاع "!!! وبلدنا مش في حمل اي مشاكل ده مش بيعدي يوم الا ومشكله بتحصل وتلاقي البرامج السوداويه تبتدي تشتغل وهي اساسا بتحب جنازه وتشبع فيها لطم – علشان طبعا الاعلانات ونسبه المشاهده -  وكله في الاخر على حسابنا وعلى حساب مستقبل اولادنا ولو مفقناش من النوم والهبل اللي احنا فيه يبقى ثورتنا وشهدائها راحت "فطيس " وكأنك يابو زيد ماغزيت واحنا بس بننسي لان افه حارتنا النسيان زي ماقال عمنا نجيب محفوظ يعني ازاي ننسى المسيحي اللي كان بيحمي اخوه المسلم وهو بيصلى والعكس كان بيحصل !!؟؟؟ وازاي محصلش اي سوء لاي كنيسه اثناء الثوره !!!؟؟؟ مع ان لو كان حد عايز يعمل اي حاجه كان عملها ومحدش كان حيقوله انت بتعمل ايه ... المهم التاريخ بيبص علينا ولن يغفر لنا اي شئ احنا بنعمله في نفسنا وفي بلدنا والطلبه لما يدرسوا التاريخ يشوروا ويقولوا العبيط اهو بلاش كده لاننا واحد و جسد وحلم واحد وانسان واحد مصري ده حتى مشتركين في حرف واحد " الميم " والميم يعني" مصري مسلمسيحي" .

 يامصري انت عندك عقل والعقل في الانجيل والقـرءان

ويــــــاريت نبطل تعصب لانه من اعمــــال الشيطــــــان
وتــــــــــرجع شهمتنا تــــــــاني زي ماكانت زمــــــــان
نشتغــــــــل وننتــــــج ونغيـــــــــظ اعــــداء الســـــلام
وتـــــــــرجع مـــــــــصر ام الدنيــــــــا وابوها كمـــــان
نصبـــح كلنــــــــا واحـــــــد وشعبنا يكون قوي البينيان

هاااااااا مـــين هناك!!!

من المعروف ان الشعب المصري "ابن نكته" وبيطلع همه في ضحه وبسيط وعلى قد بسطه ملك على راي عادل امام في الاعلان لكن انه يستخدم خفه دمه في ثوره مش بس حتغير مستقبل مصر دي حتغير مستقبل العالم كله  فهى دي العبقريه فمثلا الثوره دي رجعت حلم قديييييييم عندنا وهو ان عمو وانت صغير كان يسألك ويقولك "قولي ياحبيب عمو تحب تطلع ايه كنت ترد وتقول ضابط شرطه !!! بعد سنييييين كتييير تحقق الحلم ده – طبعا لان الحلم ده كان للي معاه فلوس لدخول كليه الشرطه بالرشوه او الواسطه !!- وتجسد في اللجان الشعبيه يعني بعد ما"انسحبت " الشرطه وطبقت الشعار القائل بان الشرطه في "خيانه " الشعب ماكان للناس الا ان يحموا نفسهم فتكونت اللجان الشعبيه وظهرت خفه الدم  واصبحت في مبالغه في الحمايه كمان فشارع مثلا عليه حوالي عشره لجان وكل لجنه تعمل نفس اللي بتعمله اللجنه اللي قبلها فيسألك مثلا ايه كلمه السر تقوله " ابو كرتونه " ثم يتركك تعدى في سلام وامان ثم يعطيك كلمه السر اللي تعدي بها على اللجنه اللي بعدها اللي بعيد عنها بثلاثه متر – مش بقولك حلم وطموح– المهم يبص على بطاقتك ورخصتك ويبص في وشك ويتأكد وطبعا من حقه بس الغريب انه واحد وجد الرخصه منتهيه فقال لصاحب العربيه دي الرخصه منتهيه قام صاحب العربيه قاله طيب اديني الوصل ياروح تييييييييت !!! حتى الاميه-" نحو" الاميه- لعبت دور كبير في اللجان دي فواحد وقف عربية معدية وقال لصاحبها الرخص فين الراجل ادالوا الرخص راح مديها لواحد تانى بيقله خد اقرئهالى!!! لآلآ شوف الافظع واحد داخل على اللجنه فواحد و قفه و بيقوله رخص العربيه و البطاقه فالراجل طلع البطاقه ولسه بيدور ع الرخصه بيبص لقه الاخ اللي في المقاومه الشعبيه بيبص في البطاقه و رايح يبص على نمرة العربيه فقاله انت بتعمل ايه قالو بتاكد ان العربيه دي بتاعتك!!! لالا واللي زاد وغطا ان واحد وقفوه في لجنة شعبية و بعد ما تاكدوا من كل حاجة سالوه علي الطفاية!! وشرفك مابهزر تم ترا رارم تمتم .... لا وخد عندك لجنة شعبية كانت واقفة و عديت عليها عربية جيش و قالولهم يا جماعة في عربية جيش اتسرقت  خلى باللكم أي حد يعدي بعربية جيش لازم تتأكدوا منه الجماعة ماكدبوش خبربعدها على طول كانت معدية" دبابة" قوم ايه صحابك يوقفوها ويقول للرائد اللي راكبها بعد ما طلع راسه من جوة الدبابة مبتسما : في ايه يا جماعة حصل ايه!!؟؟ اللجنة : انزل و بعدين نتفاهم وطلع كارنيهك الراجل طلع الكارنيه بكل احترام : اتفضلوا الجماعة احتاروا الراجل ورقه سليم طب يعملوا إيه فكروا شويه وطلعوا بفكره عبقريه – ماهو المصري مشهود له بالعبقريه لحد سن 6 سنوات – فقالوا له ورينا رخصة الدبابة!!! كان فاضل بس يسألوه عن الطفايو وحزام الأمان!!!ده غير ان الشرطه خدت نصبها من التريقه والمسخره – الصراحه يستحقوها وعن جداره - فيعني ايه لجنة شعبية ؟؟؟ يعني تبقا قاعد طول الليل تحشش ويعدي عليك" البوكس" تقوم مفتشه أنت!!! لا ومره ضابط كان معدي ووقفته لجنه شعبيه قالولوا ورينا رخصك والبطاقه بعد لما شفوها قالوله خمسين جنيه قال  ليه!!؟؟ قالولوا هي كده – احسن يستهلوا- لآلآلآ واللي يضحكك اكتر واكتر ان اللجان دي اتعلمت من الافلام الاجنبيه - المأخوذه من الوصله- وعند وزاره الداخليه ان الكلاب طبعا لها دور قوي في الحالات اللي زي دي فقام الناصح جايب كلب بلدي وعمال يلف حول العربيه علشان يشمها !!! بس ياترا حيشم ايه اللحمه ولا الفراخ!!!! لا ومع اول يوم في "هروب " الشرطه ظهر افتعال الاحداث فتلاقى الناس قاعده في امان الله تحرص بيوتها وخايفه على نفسها ويبدا سيناريو التخويف والاشتغالات ويقولك خللللي بالك في ناس جايه علينا من ورا وهو ولا في حد جاي ولا يحزنون!!! لا وكل واحد من اهل المنطقه ليه علامه مميزه يعني اللي يحط شريطه حمرا واللي يحط شريطه بيضه واللي يحط شريطه سوداء بس المهم انهم كلهم اذا تجمعوا بجد حيكملوا علم مصر وهذا هو اول شئ جميل بداته الثوره وعملته انها قربتنا من بعض واصبح عم صلاح المكانيكي يجلس ويتحاول مع دكتور نبيل دكتور الاقتصاد في الجامعه ده – انا حاسس ان تامر امين طفح عليا بكلامه - كمان بجانب انها قضت ومحت من قاموسنا شئ اسمه الفتنه الطائفيه فكانت ام مصطفى تنزل الشاي وام جرجس تنزل البقصماط ده غير اللب وغيره من المسليات اللي تحتاجها السهره في حراسه البيوت وكل ده وهم مستمتعين وكسرين قوانين الحظر وده لسبب واحد تفتكر ايه ياترا ان "ساعه الحظر متتعوضش !!!" وفي طبعا اللي بيحب السيما اااوي ومتقمص دور احمد السقا في فيلم الجزيره ويقول من النهارده مفيش حكومه انا الحكومه " اوفر ..اوفر اااوي !!! لا وفي الاحياء الشعبيه وماادراك اصبحت كل حاره عباره عن نقطه شرطه لآ ويسموها باسم حارتهم كمان يعني يسموها نقطه شرطه حاره عم شكر !!! وكانوا بيقولوا هاااااااا مين هناك

يــــاخــــوفي يـــــابــــدران

يقول احد المفكرين البريطانين " من لم يتعلم من تاريخه فسوف يكرر نفس الاخطاء " فلما نشوف موقف مبارك "المخلوع" لما مسك الحكم في 1981 نرى ونسمع انه كان يقول بانه لن يترشح الا لفتره واحده وانه جاء ليخرج ويعبر بمصر من محنتها بعد الحروب وقتل الرئيس السادات وكان يتمتع بحماس شديد وهو حماس طبيعي يتناسب مع المنصب الجديد لاي انسان يشغل وظيفه جديده يعني مثلا "امين المخازن" لما يعين في وظيفته فيحاول انه يعمل بجد ويكشف الفساد ويحاول ان يثبت ولاءه لمديريه ورؤسائه فحماس السيد المخلوع كان طبيعي وفي محله لكن الرئاسه لها مذاق خاص- تأكل شعبك وراه- واللي يذوقه لايقدر على فوراقه يعني السيد المخلوع بعد ان ذاق حلاوه المنصب مقدرش يتركه وجاء الطبالين والمنتفعين والغوغائين وقالوا بان" الشعب يريد سيادتك رئيسا للبلاد" ونحن نحمل توقيعات بالدم لمبايعتك فقال خلاص خلاص "انا فهمتكم " وانا هنا برغبه هذا الشعب خلاص كلمتي حتنزل المره دي بس اعملوا حسابكوا المره التانيه لآلآلآ المره الثالثه لآلآلآلآ اقولك متعملوش حسبكوا خالص ان كلمتي لايمكن تنزل ابدا !!!! تخوفي هنا من كلام السيد عمرو موسى واي شخص اخر مثله يعني الكلام واحد والظاهر ان في كتالوج بيشرح ازاي تصل للحكم وتجلس على العرش لحد الممات او الانقلاب !!! يعني الكلمات والتعبيرات واحده والناس تدعوا بانه سوف يتم تغيير الدستور بس انتوا روحوا صوتوا والرئيس الجديد حيغيروا انا الصراحه مش قادر اصدق الكلام ده لان الرئيس السادات غير الدستور على مزاجه والشعب لم يفعل شئ ثم تغير مره اخرى في عهد السيد المخلوع مبارك لصالح ابنه جمال مبارك صحيح ان الشعب تكلم بعلو الصوت لكن صوت الفساد كان اعلى وتغيرت الماده 76 من الدستور ماهي ديمقراطيه بقا على راي عمنا احمد فؤاد نجم "طاطي راسك طاطي طاطي انت في بلد ديمقراطي " انا بقا خايف من حاجه اننا نقول نعم للتعديلات الدستوريه ثم يتولى الرئيس اياكان هذا الرئيس ثم نقول يالا بقا ياحلوين نغير الدستور يطلعوا الناس اللي  تعبانه ومستائه جداا من الثوره – زي كده عفاف شعيب وابن اخوها والبيتزا- اللي عايزه تودي حماده الحضانه وتودي توته للنادي ويقولوا حرام عليكوا عايزين ننهض ببلدنا ونشوف حلنا واكل عيشنا ده في ناس بتموت من الجوع يااااا اخيرا عرفتم ان في ناس بتموت من الجوع !!! فيستجيب السيد الرئيس لمطالب الشعب والدستور الجديد يروح "فطيس" ونعمل زي فيلم "امير الانتقام" بتاع انور وجدي لما يزعق ويقول "انا مش طالب عدل انا مش طالب رحمه انا طالب محاكمه " فاحنا ولا حنطول عدل ولا رحمه حنطول حاجااااات تانيه !!! حاجه تانيه مخوفاني فقد حضرت ندوه للاستاذ عمرو موسى في ساقيه الصاوي ومش عارف ليه انه بيفكرني بالرئيس" باراك اوباما"  في وعوده بالتغييرلان ظروف التغيير تقريبا مشابهه بمعنى ان الرئيس اوباما لولا سياسات جورج بوش الخاطئه وان الشعب كان "عطشان" للتغيير ماكان ليتولى الحكم وكان شعار حملته الانتخابيه "التغيير ... نحن نستطيع " فهذا كان المفتاح لتولى الحكم وقد وعد بوعود كبيره وكثيره ولم يتحقق منها سوى القليل جداا حتى الان حتى خروجه من العراق الذي تكلف البلايين لم يفعل فيه شئ!!! اقصد هنا بان كلام الاستاذ عمرو موسى وهو ايضا شعاره التغيير وان كان ليس ظاهرا ولكن كلامه يوحي بذلك فهو معالجه لسياسات الرئيس المخلوع الخاطئه  وانه رد فعل للشعب العطشان للتغيير واخاف بانه لا يقدر على حل اي مشاكل ونروح كلنا "فطيس" بسبب ان في ناس بتنادي به بسبب الكاريزما وانه معادي لاسرائيل طب ازاي وهو عندما سؤل عن علاقتنا مع اسرائيل واتفاقيات تصدير الغاز معها سكت قليلا وقال" بانه لابد ان نركز على اوضاعنا الداخليه اولا ثم نرى الشأن الخارجي" ااااازي يعني دي امريكا اللي اسمها امريكا بتركز على اوضاعها الداخليه بالمحازاه مع اوضاعها الخارجيه لان الاوضاع الداخليه والخارجيه يؤثر بعضها على بعض لاننا في عصر العولمه اللي خلت العالم كله "حجرتين وصاله" ..... النهايه احنا عايزين برنامج انتخابي شديد وقوي ورؤيه لمصر واضحه في كل المجالات ومش عايزين كلام انشائي فانا بقول للاستاذ عمرو موسى اوي اي مرشح يمشى على نفس خطاه ياخوفييييي يابدران .