بــــــــلدك بيـــــك ااااااااااولى

طبعاااا قبل ثورتنا المصريه كان طموح كتييييييير مننا انه يسافر "بلاد بره" والسبب في تسميتها بلاد بره انها "باره " باولادها وكان شعارنا هو " نحكم عقلنا نهاجر كلنا " لان الواقع كان درامي جداااا يمكن الدراما ممتعه على شاشه السينما لكن في بلدنا كان اشد باسا وألما وراح ضحيه النظام الفاسد اللي " طفش" الشباب من البلد ارواااااح كتيير راحت على شواطئ ايطاليا ولما اتعمل حوار مع اب من اهالى ضحايا الهجره الغير الشرعيه قال "انا حودي ابني الثاني يهاجر هو كمان" !! كل ده كان له مبرر قبل الثوره والتغيير اللي بدا يظهر على السطح ومشارف المستقبل وبدا بوادر الامل في البلد اللي الواحد كان فاكر انها خلاص اصبحت من دول العالم السفلي !! بس حقولك حاجه اللي ميعرفش قيمه " امه " حيعرفها لما يشوف مرات ابوه ! يعني استحمل " رخامه " بلدك ام الدنيا وابوها كمان وتكيف مع ظروفها وخلى عندك اصرار انك تنجح فيها ومتعلقش حياتك كلها على السفر وترفع سقف التوقعات بانك حتسافر وحتحقق كل الامال اللي بتحلم بها هناك وترجع بالمروحه و الراديو " الترانزستور" ! لانك لو انت عندك اصرار وعايز تنجح حتنجح في اي بلد وحتتكيف مع اي وضع العبره بقا انك في بلاد الغربه اللي هي كربه اصلا مش حتدي لنفسك مساحه من الفشل وحتبذل كل جهدك في العمل وحتجيب الفرصه حتى لو في بلاد الواك الواك . طب متجبها في بلدك احسن .

ولان الرزق يحب الخفيه ! وربنا قال في كتابه العزيز ( هو الذي جعل لكم الارض ذلولا فمشوا في مناكبها وكلوا من رزقه واليه النشور) يعني ممكن تسافر بس لما تكون عملت اللي عليك كويس جداااااااا في بلدك وخلاص حولت كتييير وبرده مفيش فايده واقرا الحكمه دي كويس جداااا " لاتبحث عن الفرص البعيدة إلا بعد أن تنتهي تماما من استغلال جميع الفرص الموجودة بين يديك – جيري جونس . يعني لا تستسهل .

وعايز اقولك حاجه من خبرات ناس كتييير نجحوا وحققوا احلامهم بان النجاح في بلدك له طعم خاص طعم ممزوج بالفرحه والفخر والمحبه من الاهل والاصدقاء . وياما ناس كتير سافرت ورجعت يامولاي كما خلقتني وده لان العقل اللي بتفكر به وعايش به في بلدك هو هو اللي بتسافر به اي دوله اخرى ولو معندكش القابليه للمرونه والتكيف مش حتنفع ولا هنا ولا هناك !

وانا معاك ان السفر له فوائد كتييييييره ومن اهمها التعرف على ثقافات اخرى والانفتاح على العالم واكتساب اخلاق وعادات حسنه وزياده خبرتك سواء الحياتيه اوالعلميه اوالعمليه وايضا تعلم لغات جديده بس كل ده لما يكون سفر "مؤقت" مش هجره دائمه يعني روح اشتغل واتعلم وارجع تاني يعني تاريخ مصر الحديث اللي كان برعايه " محمد على باشا " كان من اهم مااهتم به هو البعثات الي اوربا وتحديدا الي فرنسا ليتعلموا هناك ثم ياتوا ليفيدوا بلدهم وعلى راسهم رفاعه الطهطاوي الذي اقنع الوالي بعد عودته من فرنسا بأمرين كانا بالغي الأثر على مستقبل مصر.. الأول إنشاء صحيفة علي نمط الصحف الفرنسية، والثاني الاهتمام بتعليم اللغات الأجنبية، واقتنع الوالي بالأمرين، وجعله رئيسا لتحرير جريده الوقائع المصرية، وناظراً لمدرسة الألسن. وايضا اليابان لما " ادكت " بالقنبله بتاعه هيروشيما ونجازاكي اهتمت بالبعثات والتعليم وارسلت بعثات الي امريكا و اوربا ليعودوا مره اخرى يفيدوا بلدهم . ارجوا انك تحكم عقلك لان العقل زينه ولان بلدك محتجالك في اشد اوقاتها الان لان دلوقتي بلدك بيك ااااااااولى  .

مقال متصل عن العمل الحر وانك ازاي تستفيد من الفرص اللي في بلدك وتكون بيك اولى بجد وتفيد وتستفيد
http://mohamedkamalblospotcom.blogspot.com/2011/04/blog-post_17.html

مفيش حاجه اسمها "حـــــــــــل" !!!

منذ قيام ثوره 1952 وفي عامل مهم مشترك في العهود الثلاثه للرؤساء عبد الناصر ، السادات ، مبارك ( المخلوع ) بالرغم من اي ايجابيات حدثت في عصورهم  الا ان العامل ده كان مشترك بينهم وهو " قمع الحريات " حتى جاءت ثوره 25 يناير وثارت على قمع الحريه واصبحت الناس تنادي بالحريات والحق في التعبير عن الراي ونقد اللي شيفينه يستحق النقد وغيرها من اشكال الحريات  وبسبب الحريه دي ظهرت جماعات كانت بعيده اصلا عن العمل السياسي حتى انهم افتوا بحرمانيه قراءه الجرائد !!! ودلوقتي طلعوا من ينادي ويقولوا ان السلفيه هي الحل  ، ومن فبلهم طبعا اللي كانوا ينادوا ويقولوا الاسلام هو الحل ! وبرده الليبرالين طلعوا ونادوا بان الليبراليه هي الحل – صحيح مش صراحته بس اقوالهم تدل على كده - والمفاجاه بقاااا ان مفيش حاجه اسمها بان هذا او ذاك هو الحل !! لان الحل الوحيد هو اننا نترك الكل يعتنق مايريد وما يتوافق مع افكاره ومذهبه في الحياه سواء الديني او الفكري. ليه مطالب مننا جميعا ان نكون واحد!!؟؟ مع ان ربنا قال في القراءن " ولو شاء ربك لجعل الناس أمة واحدة ولا يزالون مختلفين "( سوره هود ) ليه بقا عمالين نلت ونعجن ونحارب بعض ونحارب سنه وقاعده اساسيه ربنا وضعها في الحياه وهي " الاختلاف " ليه  لما تحصل اي حاجه تطلع كليبات اقل ماتوصف انها " هبله " لاتعبر عن اي نضج سني او عقلي ويتعمل منتاج سخيف ويقول معااا لفضح كذا وكذا ! ده غير الصفحات اللي على الفيس بوك واللي لاتقبل اصلا الاختلاف مع الاخر وتقبل اللي يتفق معهم ويجاريهم في الشتائم والسب !! مع ان الاختلاف في الراي لايفسد للود قضيه طيب ليه متكونش في ارضيه متفقين عليها وهي ان مصلحه بلدنا فوق كل شئ ولا هي شعارات وهميه ! وبصرف النظر عن اساليب كل فكر المهم نتفق على قواعد عامه وقوانين تطبق على الكل وتحقق مصلحه بلدنا يعني سيبنا من التفاصيل اللي ولا بتودي ولا بتجيب بتودي في داهيه فقط !! واليكم مثالين يعبران عن وجهه نظري اللي ياااارب توصل وهما : يثرب ( المدينه المنوره ) اثناء الرسول صلى الله عليه وسلم ، والولايات المتحده الامريكيه في العصر الحديث اما عن المدينه المنوره فكانت بتتكون من المسلمين وغير مسلمين فعندما انتقل الرسول الي يثرب فكان بيعيش فيها قبيلتين من العرب هم الأوس والخزرج وثلاثة قبائل يهوديه هم بنو قريظ وبنو النضير وبنوقينقاع ولم تسلم القبائل اليهوديه - وإن كان بعضها اسلم - ثم انشا معاهده حلف وسلام بين المسلمين واليهود في المدينه وكانت رغبه الرسول من كده هو التعايش في سلام مع اليهود ، وعندما قدم وفد نصارى نجران وكان في الوفد ساداتهم وكبار القساوسه أحسن رسول الله صلى الله عليه وسلم أستقبالهم وتناقش معهم في أمور الدين ولكن لم يجبرهم على الأسلام ولكن أمنهم على أرواحهم وأموالهم وكنائسهم . كل ذلك كان لسبب واحد وهو الرغبه في التعايش مع الاخر وان مصلحه البلد فوق كل شئ .

اما الولايات المتحده الامريكيه فأنها واحدة من أكثر دول العالم تنوعا من حيث العرق والثقافة، وجاء ذلك نتيجة الهجرة الكبيرة إليها من بلدان مختلفة ويكفل دستور الولايات المتحدة حرية ممارسة الدين، ويمنع إنشاء أي حكومة دينية.وطبقا لدراسة عام 2010، قال 88.4 ٪ من البالغين بأنهم مسيحيين والديانة غير المسيحية المنتشرة هي الديانة اليهودية (0.7 ٪) البوذية (0.1 ٪)، الإسلام (0.6٪)، الهندوسية (0.4 ٪)، وبرغم كل هذا الاختلاف الا انها من اقوى بلاد العالم سواء على المستوى الاقتصادي او العسكري حيث يعتبر الاقتصاد الأمريكي أكبر اقتصاد وطني في العالم، حيث يقدر إجمالي الناتج المحلى لعام 2008 بنحو 14.3 تريليون $ وكل ذلك برده لسبب مهم وقوي جداااااا وهو " الرغبه في التعايش مع الاخر وان مصلحه البلد فوق كل شئ " . اللي عايز اوصله ان مفيش فكر يصلح للكل لاننا وختلفين وحنزال مختلفين الي يوم الدين المهم اننا نتفق على الاسس العامه كل واحد يشوف هو ايه في ايده ممكن يعمله للنهوض ببلدنا وازاي حيشارك في النهضه وفي الاخر ضع الخلق للخالق وياريت نبطلع كلام كتييير علشان منكونش يجد زي ماقال نتنياهو  " باان لعرب ظاهره صوتيه " واننا لازم نعرف حقيقه مهمه جداااااا وهي ان مفيش حاجه اسمها فلان او علان او الراجل اللي واقف ورا عمر سليمان هو الحل .الحل هو التـــــــــــــــعايش

ان فـــــــاتـــك المــــــــــــيري.... افـــــــــــــــــرح

صرح د.سمير رضوان وزير الماليه انه حيقوم بفتح باب التقديم على الوظائف الحكوميه وفجاه انهالت الطلبات على المؤسسات وكان طاقه القدر انفتحت وده يرجع لسبب واحد اتربينا عليه طبعاااااا وهو ان فاتك الميري اتمرمغ في ترابه مع ان العمل الميري حتسف به التراب طبعااااا لان المرتبات حالتها حاله مستعجله وميؤوس منها يعني لما يكون دكتور في مستشفي حكومي طلع عين تييييييييت سبع سنوات وفي الاخر يقبض 200 جنيه !! يبقى ازاي الميري حياكل عيش ! ويقتح به بيت ده بكده حيفتح دماغه من كتر التفكير وعلى راي هاني رمزي في فيلم الرجل الغمض بسلامته " ازاي بمرتبي ده اعرف اتجوز وابوس ده لو بست ايدي وش وظهر يبقى كويس " !! الناس دي فاكره ان المرتبات حتزيد وحتكون 1200 جنيه!! وطبعا لاننا دوله ناميه يعني اللي حتديهولك الحكومه باليمين حتاخذه بالشمال لان المصدر الاول عند الدول الناميه هي الضرائب يعني تاني يوم حتلاقي الاسعار في الطالع والبنزين يغلى وهو سلعه استراتيجيه كل حاجه مرتبطه بها يعني تلاقي بتاع العسلايه يقولك العسليه غليت علشان البنزين!!! وفي قاعده اقتصاديه مهمه تقول " ليس هناك اهميه من زياده المرتبات وزياده الاسعار " !! ولان كل واحد عنده منطق في تصرفاته وكل واحد بيحب يمشي بدماغه فحبيت اعرف طب ليه الميري والوظيفه عنصر جذب !!؟؟ واليكم الاجابه لان عندما يعرف السبب يبطل العجب هو مش عجب ااوي لانها اسباب وكلنا عارفنا انا حبيت بس افتح واكشف الجرح :1- لان الوظيفه الحكوميه او الوظيفه بشكل عام مفيهاش اي تعب ولا مجهود ولا مخاطره ولا فلوس تخسرها ولا ازمه عاليمه ولا ثوره ولا يحزنون يعني منطق ابعد عن الشر وغنيله !! وخلي بالك بان هناك علاقه طرديه بين العائد والمخاطره 2- المعاش والتامين يعني الشاب مننا يضحي بعمره وشبابه ومستقبله علشان معاش الشيخوخه اللي مش ضامن يوصلها اصلا !!! 3- الخوف من الفشل والخطوات الاولى مع ان تكمن الصعوبه في اي عمل في مجرد بدايته . 4- الاكتفاء بالقليل وادي الله وادي حكمته . 5- ياعم الفلوس دي مع الحراميه وانا مش حرامي !! 6 – الفلوس مش كل حاجه واغلب اللي بيقول كده تلاقيه بيقول كده من همه ويقول لك انا زاهد عن الحياه مع ان قمه الزهد لما تكون غني وتزهد لانه حيكون بمزاجكك لكن بفقرك زاهد !!! يعني عثمان بن عفان – الصحابي الجليل واحد المبشرين بالجنه -  بمثلنا المعاصر كان بل جيتس العرب وكان زاهد في الحياه .

لو عايز نصيحه بجد وتكون سعيد وتسعد نفسك واهلك وبالتالي الناس اللي حوليك فكر في مشروعك الخاص يعني " الحريه " – صوت الحريه بينادي - سواء الماليه او حريه الوقت في كيفيه استغلاله لصالحك وتعمل فيه اللي انت عايزه وتستمتع بعمل معاه مش حتحس بالوقت والملل ومش " حتقتل وقتك " فيه. واي مشروع علشان يكون ناجح لازم من وجود فرصه لاستغلالها او مشكله بتقف في وش الناس وانت تيجي بدور المنقذ لحلها يعني مثلا بيل جيتس كانت الناس بتستعمل نظام الدوس وكانت له مشاكله فادخل نظام الوندوز واصبح من اغنى اغنياء العالم  ، ويليس هافيلاند كارير مخترع التكيف  فلما كانت مشكله الرطوبه وارتفاع درجه الحراره فدخل وحل المشكله دي بصناعه اول تكييف وانشا شركه واصبحت من اهم شركات التكييف في العالم . ، يعني اللي عايز اوصله انك ابحث عن " المصائب " واستغلها مش في ثراثنا العربي بيقولوا" مصائب قوم عند قو فوائد" خلاص دور على المشاكل وحاول تحلها مش تدور على المشاكل"وتولول "جنبها يعني مثلا في بلدنا ام الدنيا وابوها عندنا مشاكل بالعبيط منها مشكله القمامه اللي ماليه الشوارع شوف ازاي تحل المشكله دي وبدل صناديق الزباله صغيره الحجم اللي محطوطه في الميادين والشوارع فكر ازاي تعمل شركه نظافه مثلا وتجيب سله مهملات كبيره وتعمل صفقات مع الاحياء ! مشكله زي المواصلات اللي عايزه قنبله ويتولع فيها شوف انهى مناطق عليها ضغط في عدد السكان وتقدر تعمل شبكه نقل تنقلهم بها خاصه في القري . المهم خلي عنيك على المشاكل وفكر في الحلول يقول اينشتين " ليس الامر اني عبقري كل ماهنالك اني اجتهد مع المشاكل لفتره اطول ".

وعايزك تعرف حاجه في جيل لازم يتعب بمعنى لايما انت تتعب لاما اولادك يتعبوا يعني لو انت متوسط الحال او فقير يبقى ابوك متعبش ! واستغل سن العشرينات في الجد والاجتهاد والعمل والعلم والقراءه واستغلاله في المفيد يعني ميعديش عليك يوم الا وانت مستغله في هدفك ومشروعك ودور ازاي تحل مشاكل انشاءه من تمويل واوراق وتصاريح وغيرها ومعروف في تراثنا  ان الله وضع تسعه اعشار الرزق في التجاره ييييييبقى خلاص يامعلم ولا احنا بنحب نعمل السهل في الدين والصعب نقول لالالالا . اعمل اللي عليك واجتهد ولو اجتهدت ولم تصب فلك اجرين حااااول فعلى المراء ان يسعى ولكن ليس عليه ادراك النجاح والنجاح والتوفيق ده من عند ربنا وربنا مش حيديلك حاجه الا لما تكون تعبت فيها " ان الله لايضيع اجر من احسن عملا" ولو مشيت واتخبط فدي خبره وحاول تستفاد منها في المرات القادمه . فلو فاتك الميري ......افرح

مقال له علاقه بهذا المقال " ابداع مابعد الثورات "
http://mohamedkamalblospotcom.blogspot.com/2011/04/blog-post_10.html

ابـــــــداع مــــابعد الثــــــــــــورات

هناك قاعده حتميه موجوده من فجر التاريخ واثبتت صحتها على مر العصور وهي" ان الابداع يتناسب تناسبا طرديا مع الحريه"فلما نرجع مثلا الي عصور الظلام في اوروبا لما كانت الكنيسه مسيطره على حريه الابداع هناك حتى ان العالم الشهير جالليو حارب في اثبات صحه نظريته بان الارض تدور حول الشمس حتى انه كان حيفقد حياته في اثبات النظريه واضطر الي قول اللي عيزينه في ان الشمس بتدور حول الارض! وهو غير مقتنع وقال في سره ولكنها تدور!! وبعد ذلك تخلصت اوروبا من سيطره الكنيسه وقمعها للحريات مما ادي الي بدايه ظهور ونشاه العلمانيه وبكده اصبح الافراد احرار وبدات الثوره الصناعيه واصبح الغرب كما نعرفه الان مش بس اصبح مبدع ده تخطا المرحله دي ويعيش الان مرحله مابعد الابداع!!.اما في بلدنا ام الدنيا وابوها كمان مصـــــــر بعد ثوره يولو 1952 حيث تخلصت مصر من الاستبداد والفساد والافساد واستغلال ثروات البلاد والقمع والظلم – سبحان الله كاني بوصف عصر مبارك - وكان للحريه دي اثر كبييير على حركه الابداع في الوطن والتي تمثلت في الادب والشعر والموسيقى والاغاني والافلام السينمائيه والنهضه الفكريه والاقتصاديه حيث ظهر نجيب محفوظ اللي لف بحارتنا وتراثنا المصري العالم كله ، واغاني عبد الحليم اللي كانت تشعل قلوب وحماس الملايين  وكان ذلك كله هو وقود لعمليه النهضه اللي كانت بتشهدها البلاد في الوقت ده لوجود " حلم وطني" مسيطر على كل الناس وملتفين حوله صحيح ماكنتش حريه بالقدر الكافي الا انها ساهمت في الحركه الابداعيه في البلاد! ...واظن بل انا متأكد ان بعد الفتره "الوسخه " اللي عشناها واللي مبارك واولاده بصحبه الست مراته اللي كانوا الرعاه الرسمين للقمع والاذلال وفقر الناس اللي كان وصل لحد الكفر !! بعد ده كله حتشهد بلدنا طفره في الابداع بس مش ابداع من عينه شهداء يناير راحوا في احداث يناير !! او افلام السبكي "بتاع اللحمه "!! لالالا ابداع زي بيل جيتس في السوفت وير ، ابداع وران بوفيت في الاستثمار ، ابداع بيتر دراكر في الاداره ، ابداع وليل سميث في التمثيل – محدش يقدر ينكر اننا عندنا مبدعين لان مصـــــر ولاده ولكن نسبتهم قليله جدااا ونسبتهم لاتتناسب مع مكانه بلدنا وتاريخها الحضاري - وكل تلك الابداعات اللي تخطت مرحله مابعد الابداع وذلك لاهتمامهم بالتعليم والتطوير ومعرفه قيمه الانسان واعتباره "مورد " يمكن ان ينفذ لو لم يتم الحفاظ عليه وتنميته ! والابداع ده مش بيجي من فراغ لالالا والف لالا ده بيجي بالجد والاجتهاد والمثابره والقراءه القراءه القراءه والتعلم والاستفاد من خبرات الاخرين فتعلم من مقوله اينشتين " ليس الامر اني عبقري كل ماهنالك اني اجتهد مع المشاكل لفتره اطول ".وشوف انت موهوب في ايه فمعادله الابداع بسيطه هي : موهبه + تعلم وتطوير + عمل واجتهاد = ابــــــــــداع . يعني شوف انت موهوب في ايه بالظبط فممكن يكون صوتك حلو فتبقا مغني عبقري تلهم وتحمس قلوب الملايين ، ويمكن تكون قارئ للقرءان تقشعر منه قلوب المؤمنين ، ويمكن عندك موهبه التحليل فتكون محلل اقتصادي او سياسي يستفيد منك الملايين ، ويمكن تكون فنان ترسم برشتك ملامح المصري البسيط الجدع ، ويمكن تكون مخرج مبدع تجمع الناس في كادر واحد ، ويمكن تكون كاتب موهوب تنور الناس وتضئ لهم الطريق . مواهب ومواهب المهم انك تشوف ايه موهبتك ومتكونش نموذج وصوره من حد كن نفسك كن نفسك كن نفسك لان المرحله اللي جايه مش حتسمح باي "بهلونات" يتخيلوا انهم بيصنعوا خيرا وهم في الحقيقه بيساعدوا على التفاهه . في الختام  اقول بان كل ده بيجي نظرا للحريه اللي بتعشها الناس بعد اي ثوره يعني هو ابداع مابعد الثورات.

انا زملكاوي واقولها لو اتسأل....زملكاوي بكل فخر

انا علاقتي ومعرفتي بالكوره زي كده علاقتي باللغه الصينيه اللي كل اللي اعرفه عنها انها تتكون من47035 حرف يعني كانت كل معرفتي بالكوره انها شئ مدور وفيه نقط سوداء ! ولما بحثت ورجعت بالذاكره للخلف عرفت السبب اللي ابطل العجب ولان علماء النفس بيقولوا بان كل المشاكل النفسيه بتتكون عند الانسان من طفولته فوجت العداء والجهل الكروي ده كان سببه اصحاب الطفوله المشرده لما كنت بلعب معاهم يعني مثلا كان في العرف "الشوارعي" ووفق المعاير الطفوليه كانوا بيوقفوني حارس مرمى  ومخك ميروحش لبعيد وتفتكرعلشان مهاراتي الكرويه لاسمح الله ولكن لبدنتي وقله الموهبه وكتييييير للزن " عايز العب معاكوا"!! وفضل الشعور ده يكبر وانا اكبر وراه وبقيت اتسال " قولي ياابوا الكباتن انت بتشجع ايه ؟؟؟ كنت عامل زي الست اللي مش عايزه تقول سنها !!!؟؟؟ ومش عايز اقولك كم الموااااااقف المحرجه اللي اتحطيت فيها يعني كنت راكب مع سواق تاكسي وكان اهلاوي متعصب اعد طول الطريق  يتكلم معايا عن الكوره لغايه لما جبلي صداع وفضل يتكلم عن تاريخ النادي واضاف ليا معلومات كتييير والظاهر انه مذاكر كويس اااوي وفضل يتكلم عن ازمه النادي بعد رحيل جوزيه الي اخر المشاكل وكنت قرات كام كتاب عن الكوره زي مصر بتلعب لمحمد توفيق ، زملكاوي لعمر طاهر ده غير شويه معلومات من اصحابي واتكلمت معاه شويه وانا اصلا لااعرف عن لعيبه الكوره الا ابو تريكه اللي غناله حماده هلال ابو تريكه اللي بيلعب في الاهلي جوه النادي الاهلي ! واحتراف هاني رمزي في المانيا وسمير كمونه اللي الاكل بيحتاجه على راي طلعت زكريا في فيلم سيد العاتتتيفي ! ومره واحده لقيت ان الكوره بقت الانتصار الوحيد للبلد وانك علشان تكون مصري اصلي ويسعدك المنتخب بانجازاته – كويس اهو ربنا جابه الارض احسن - ويملك الحق الحصري لفرحه الشعب المصري زي ماقال ابوتريكه انك تشجع مصر وهي بتلعب في كاس الامم الافريقيه – وزي ماقاسم امين حرر المراه حسن شحاته كمان حرر المراه برده وخلها تشجع تراتا تي مصر تراتا تي مصر يعني اشمعنا دي هي مش بقت وزيره يبقى خلاص تشجع حتى دي مشسيبنا في حالنا فيها عاااااااا !!!- ماعلينا خلينا ناكل عيش احسن!  كنت بعيد عن كاس الامم تماماااااا وبرده معرفتي به زي معرفتي باللغه الصينيه ! وكاني عندي الحصبه كل اللي يعرف اني مش بشجع يقولي لا حول الله وده يابني من ايه ! لغايه لما قلت خلاص انا لازم اتغير وامحي الاميه واتعلم اللغه الصينيه ءءءءء قصدي الكرويه  واكون انسان جديد وبعد ثوره يناير خلاص حشجع فريق وزي مابيقولوا اللي خلف ممتش فانا قررت اكون زي ابويا اطيب زملكاوي ممكن تعرفه وبسيط وعلى قد بسطه ملك وزي مااخذت منه حاجات كتييير اخذت منه تشجيعه لنادي الزمالك الوافي لتشجيعه وهو ليس وافي لمشجعينه وكتيييير قلتله قبل المباراه لازم تاخذ دوا الضغط احنا عيزينك وبرده مش بيسمع الكلام ! لكن انت ممكن تقولي ان في ابهات كتييير زملاكويه وابناءها اهلاويه اقولك يابرنس سبحان الله يخلق من ظهر العالم فاسد !!! حتقولي انت بتشجع فريق خلى شكلنا وحش ااااوي امام العالم اقولك جمهور الزمالك ده ابويا وابوك ابن عمي وابن عمك! - اطمن -  !!والجمهور ده اكيد زي اي جمهور يتكون من بني ادمين فيهم الكويسين وفيهم الوحشين وولاد الجنيه وتشجيعي للزمالك يثبت صحه النظريه دي!! ويمكن تشجيعي للزمالك يكون سببه اني بحب اكون مختلف ! ويمكن يكون التشجيع ده نابع لحبي لعراقه النادي وانه ضم البشوات والبهوات واللي تراسه مجلس ادارته ، ويمكن نابع من ان الناس اللي بحبهم بيشجعوا الزمالك وعلى راسهم ا.ابراهيم عيسى .احتمالات واحتمالات بس اكثرهم اقرب الي الصواب انه حب نابع من الجينات الوراثيه اللي تنتمي جزء كبيييير منها الي ابويا رغم الاختلافات الفكريه بينا علشان كده انا زملكاوي واقولها لو اتسال يعني بكل ثقه زملكاوي بكلا فخــــــر.