الدكـــــــر القـــــــادم !

"الاعور وسط العمي ملك " المثل ده كان محفز ليا لما نزلت من بتنا في الانتخابات الرئاسيه 2005 وانتخبت "ايمن نور" - لانه كان المرشح الوحيد الصادق في المسرحيه الهزليه "مسرحيه الديمقراطيه في بلدنا" بس زي ماقال السادات "الديمقراطيه لها انياب" فهي "عضته" بانيابها لكي يكون عبره لغيره من من تسول له نفسه يترشح امام سيد المخلوعين ! - في حين ان كان في ناس تانيه وقفه جنبي تقول " اللي نعرفه احسن من اللي منعرفوش ياخويا ، مبارك احسن من غيره على الاقل مش حيسرق تاني وانه شبع !" دلوقتي وبعد 7 سنوات من الانتخابات " المسرحيه " دي اللي كانت نتجتها ساعتها اعاده لسماع  اوبريت " اخترناه وبيعناه ، وانجازاته ماشاء الله واخترناه اخترناه"! وانتصار سااااااحق للمخلوع  ب99.9% ! اصبح عندنا اختيار وانتخابات بحق وحقيقي مش "تمثيل"! انتخابات نقول فيها عايزين ده علشان كذا وكذا ، ومش عايزين ده علشان كذا وكذا بقى عندنا من كل بستان زهره - اكيد مقصدش المرشحين اللي جاين يهزروا من البوابين اللي فاكرنها انتخابات رئيس اتحاد الملاك ، او عامل نظافه فاكرها انتخابات رئاسه الحي ! - بس الدكر القادم قبل لما يجي ويتولد بينا ومننا لازم "نأذن" في ودنه بكلام يحطه حلقه فيها لان اللي اوله شرط اخره نور J وهو كالتالي :-  

·         احنا الجيل اللي قال "لا كفايه" يعني مش معارضته حتكون خروج على الحاكم ، او قله ادب ! دي حريه تعبير عن الراي اللي كفله لنا الدستور في الماده الثالثه ! يعني طالما قبلت انك تكون شخصيه عامه ونازعت وحاربت على كده يبقى " اللى عاجبه من الكحل يتكحل و اللى مش عاجبه من البلد يرحل"J فالرئيس ده طلع مننا يبقى لازم يحقق طلبتنا ويراعي امرنا ، احنا جيل مبنخفش وشعارنا " اللي يخاف يروح مش من خاف سلم !".  

·         اغلب او تقريبا كل اللي مترشحين "كبار السن" يعني بالنسبه له اللي عنده 45 سنه لسه عيل مابالك بقى اللي في العشرينات او الثلاثينات يبقى لسه متولدش اساسا ! ، لازم الرئيس القادم يهتم بالشباب اهتمام حقيقي ويكون لهم تمثيل في كل اجهزه الدوله تمثيل بحق وحقيق "مش تمثيل" في مسلسل تاريخي لدور ثانوي ! والموضوع مش بالسن لان الحمد لله التكنولوجيا عملت " طفره عقليه وسنيه" تخلى اللي عنده 25 = اللي عنده 60 ويمكن احسن كمان J لان الخبرات اصبحت متداوله بين كل البشر لان العالم كله اصبح " حجره واحده" ، ولو اخذنا اليابان مثلا حتلاقي كبار السن فيها بعد سن الستين يبقوا مستشارين او رؤساء لشركات صغيره يكّبروها بعد ان كانوا مديرين تنفيذيين لشركات كبرت وقادت العالم بمنتجها يعني بيدوا فرصه للشباب وده حقيقي مش حبر على ورق اما هنا في بلدنا " الحياه تبدأ بعد الستين "! .

·         الرئيس ده موظف في الدوله له مهام يقوم بها واحنا برده موظفين او عاملين وعندنا مصالح يعني مش علشان عنده مهمه او مصلحه يقوم يوقف الشارع والشوارع اللي بعد بعدها لان "الجبانه مش ناقصه قتله " لان الشوارع مشغله دائما اغنيه عدويه "زحمه يادنيا زحمه زحما وماعدش رحمه مولد وصاحبه غائب L ؛ فهي دي طبيعه شوارع بلدنا زحمه ومفيش رحمه وبتفكرني باعلان لبن نيدو " الحجم كبر والسعرهو هو !" يعني الشوارع اللي كانت بتشيل الف نفر بتشيل دلوقتي مليون وهي هي ! زياده على كده عربيات وبائعين ! ؛ لأما يحل المشكله دي بانه ينسف هيئه الطرق "والمجاري" - الكباري سابقا -  ويأمر باعاده هيكلتها بالتنسيق مع هيئه النقل العام اللي عايزه قنبله وتولع فيها ! لأما يقبل بلدنا كده بعبلها وبرده مش حنسيبه الا لما يحل المشكله دي والا ستصبح بلدنا جراج كبييييير !!.   

دي كانت الكلمات اللي عايز اقولها للمولود الجديد في بلدنا اللي "رضعت" كل حضارات العالم وتأقلما على العصر الجديد يبقى يحط في "MP3" اغنيه "مطلوب زعيم .. مطلوب دكر"

مطلوب زعيم

ميقولش على الخوف حكيم ..ويكون كمان سمعـــــه سليــــــم
يسمــــع لنبضــــه قلبنــــــا..ويكون مكانه فى وسطنــــــــــــــا
ما يعيشي ابدا في القصور...والبعض منا للاسف ساكنين قبور
يشـــــــرب و يــــــاكل اكلنـــــــــا....ويعيش كاواحــــد مننـــــا
يسمعلنا ويشور وياخد راينا...وقت الخطر نتلم حواليه كلنــــا
ونضحى وياه بعمرنا
مطلوب زعيم
على المسؤليه يكون امين...ويكون جرئ ويكون شجـــــــــاع
يمشــــــــى على خطــــــــه دافع...يعرف يقول للظلــــــــــم لا
ويموت ولا يفرق فى حق
مطلوب زعيم
نقدر نحاسبه بالقانون ..اونعزله لو للامانه يوم يخون
لا يشتـــــــرط للشكـــــل ايه...لا يشترط للسن ايـــــــة

لا يشترط للمله ايه..شرطه الوحيد يكون بشـــــــــــــربالاختصار "مطلوب دكر "