راجـــــل كومبـــــــو!!

قال ديل كارنيجي في كتابه دع القلق وابدا الحياه "ان خير معلم في الحياه هي التجربه "، ومن اجل حكمته دي هو حب يجرب الموت بنفسه فمات منتحر -(او هكذا يشاع مع انه معروف انه مات بالسرطان)-! انا مع ان الواحد يجرب كل شئ ليميز كل شئ بادراكه ووعيه الخاص علشان يطلع حكمه ورأيه الخاص  بس مش كل شئ ينفع يتجرب لانك ممكن تستفيد من تجارب الاخرين "فاستقراء المستقبل يتوقف على مدى تعلمك من خبرات الاخرين"، ومنعا للرغي الكثير واللت والعجن فانا بتكلم عن تجربه الجواز وان الاهل على مدى سنوات طوييييييله متمسكين بشكليات لاتثمن ولا تغني من جون ! وحاجات عفى عليها الزمن ومش عارفين ان الزمن اتغير -عاملين زي الجيش "ممنوع الاقتراب او التصوير" مع ان لو حضرتك قاعد في بيتك ممكن تشوف اصغر عسكري وهو قاعد في الحمام من جوجل ارث ! - ومشكله الجواز ومتطلباته سواء طلبات العروسه او الاهل سطحيه وغير جوهريه ومع اننا "بنمثل" اننا متدينين فالرسول قال " من جاءكم تردون دينه وخلقه فانكحوه ، والا تفعلوا تكن فتنه في الارض وفساد كبير" يعني لم يقل من جاءكم من عنده كذا وكذا لأ بص في الجوهر وحضرتك قبل لما تقولي الكلام ده زمان وقول للزمان اركع يازمان ! والزمن اتغير حقول لحضرتك ان في شئ في الاستثمار اسمه "الاستثمار في القيمه " يعني عندما تستثمر في شركه او سهم لاتنظر الي سعره الحالي ولكن انظر الي جوهر الشئ المستثمر فيه ومستقبله ! وحقول لحضرتك/ ولحضرتك انت بالذات عده حكايات يمكن حد يتعلم ولا ينفذ نصيحه "خير معلم في الحياه هي التجربه" لان التجربه دي بالذات خسائرها هي العمر "والعمر مش بعزقه" ! :-

1- عبد الرحمن مهندس بترول من اسره متوسطه الحال واخواته كلهم متعلمين وبعرفنا الاجتماعي من كليات القمه ! مرات صاحبه اللي لسه متجوز جديد اقنعت زوجها انه يشوف صحبتها مع انها لم تكن مواصفتها تعجب "مزاج" صاحبه ! وعلى اي حال اتفقا على موعد للرؤيه والحوار وتم اللقاء والبنت طارت من الفرحه وقالت "يارب اعجبه هو ده اللي كنت بدور عليه من زمان " وعبد الرحمن تغاضى عن اشياء كتير كان بيحلم بها في فتاه احلامه وقال " محدش بيأخذ كل شئ" المهم مكذبش خبر وراح تقدم لاهلها وجاوب على كل الاسئله المعتاده في المقابله الاولى مع الاهل للتعرف بشخصيته ومستقبله وعدى عبد الرحمن بنجاح ساااحق من كشف الهيئه ، وتوقفوا عن نقطه كانت هي نهايه اللقاء سألوه " انت شقتك فين " جاوب على السؤال ويبدوا ان المنطقه اللي فيها الشقه  معجبتهمش فقالوا لالالا طبعا قالهم دي مجرد بدايه قالوا لا من هنا لهنا ومع كثير من المفاوضات اللي انتهت بالكلمه الاكثر شهره في السيما وحياتنا الاكثر دراميه " الجواز قسمه ونصيب" ! تماسك عبد الرحمن وقال "خيرها في غيرها" تقدم لبنت اخرى وحدث نفس السيناريو بتاع المقابلات الاولي ولكنه في المره دي تجاوبوا معاه واعطوا له حلول بدلا من زياده المشكله والطين بله ! وفي ظرف شهور تزوج ، والبنت الاولى فضلت تستنى الشقه - هي واخر واحد في عيلتها اخوها الصغير لان اهلها اللي جنوا عليها تركوها لوحدها - اللي يرمح فيها الخيل في حي الاشجار والتي لم تأتي !عدت الاربعين من عمرها وكلها امل انها تحصل على الشقه وليس الرجل مع ان من الصعب اننا نلاقي شريك الحياه اللي نرتاح معه كتير ومع ذلك فقد ضحت بالغالي مقابل الرخيص ! .

2- احمد عبد الصبور كاتب وسيناريت لسه في بدايه حياته عنده كل متطلبات الزواج اللي "يفتح "! بها البيت تقدم لخطبه شيرين مسعود بنت جميله ورقيقه لاتملك في الحياه سوى جمالها وذو عقل متفتح ومثقفه وفوق كل هذا متدينه ، شدت انتباه احمد في احدى حفلات الزفات وتعرف عليها وتقابلا عده مرات حتى نشأ بينهم انجذاب واعجاب وراح يتقدم لاهلها وتعرف عليهم وعرفهم بنفسه وعمل كل شئ زي ماالكتاب مابيقول نجح في كشف الهيئه وكل شئ وجم عند الشبكه قالوا لالالا شبكه بالثمن ده مينفعش والظاهر ان الثمن كان ضعيف رد وقال انا حعوضها بعد كده خلونا نفرح والمركب تمشي قالوا لا مش حنمشي الشبكه اولا ! بعد مفاوضات وكلام رايح جاي قال دي امكانياتي ياجماعه وانا مقلتش مش حجيب شبكه بس دي بدايه "ومااعظم النهايات التي بدأت بدايه متواضعه" صمموا وركبوا دماغهم تدخلت ام احمد لكي تهدئ من شده الموقف وكان احمد زي الحاج احمد ! قالت لهم طيب ربنا يرزقها بابن الحلال اللي يكفيها ويكفيكوا . بعد شهر تعرف على صديقه اخته وتزوجها وبعد سنه انجب بنت صغيره شديده الجمال وعندما دخلت تلك البنت الجامعه كانت شيرين مسعود مازالت تبحث على العريس اللي يجيب لها شبكه تليق بها !. 

المشكله ان البنت ووراها اهلها مش عايزين راجل بس دول عايزين "راجل كومبو" والراجل الكومبو عزيزي القارئ - ده لو كنت وصلت لحد الكلمه اللي بكتبها دي - هو الراجل الكامل - مع ان الكمال لله وحده - من مجميعه زي كده كامل كمال الكامل في فيلم "الزواج على الطريقه الحديثه" راجل معاه كل شئ بحجم لارج ! وده مش في زماننا دلوقتي ، الزمن اللي فرض علينا كلنا اشياء احنا كنا في غنى عنها اصلا يعني اذا كنا حنتنازل عن كل شئ في سبيل المديات ونرفع باعلى صوتنا ونقول "الجنيه غلب الكارنيه" خلاص خلي بقى نسبه العنوسه تزيد والفحشاء تزيد وكله يبقى مليطه ! وكفايه تمثيل ديني بقى وندغ لبانه العادات والتقاليد اللي المجتمع صدعنا بها ولم تاتي لنا الا بكل خراب ! . فاياريت الاهل قبل ان تأتي الفاس في الراس يعرفوا ان لكل زمن طلباته واحتياجاته وتجربته الخاصه به واللي ينفع زمان مش حينفع دلوقتي واللي عايز يرجع لزمان يقول للزمان ارجع يازمان بس قول وهو مش حيسمعك لانه مش حيرجع هو فقط ماشي وان واي ! .