سؤل احد كبار الصحفيين والمفكريين البريطانين في احدى الندوات " ماهو الشئ الذي يحدث لنا الان وسوف يستعجب احفادنا عن كيفيه تعامله وتقبلنا له وعن سذاجتنا في تقبله ؟؟ قال الحلف باليمين امام المحكمه – قالوا للحرامي احلف – العبد لله مش حيروح لبعيد اوي كده واقول بان احفادي حيسألوني عن الاشياء اللي كنا نتعامل معها بسذاجه وتقبلنا لها بسهوله دي اولادي هي اللي حتسألني ازاي يابابا كنتم راضيين بالذل والفساد والمحسوبيه وانعدام الراي وشويه حريه والقابليه للاستحمار !!!؟؟؟– لو عنك اجابه ارجوك قلها لاني معنديش اي اجابه – على اي حال الحمد لله انتهت الفقره الثوريه وحان وقت الفكره والعمل والاجتهاد فانا اظن بل انا متأكد ان احنا المصريين الجدد لم نعد زي زمان وانا متأكد ان الاطفال اللي طلعوا مع اباءهم شيلنهم على كتفهم ويقولوا" هو يمسي مش حنمسى ( بالسين مش بالشين) " وزرع في نفسهم بذره الامل وقول الحق وحب وعشق تراب هذه البلد ويكبر معاهم هذا الانتماء وهذا العشق ويفتخر ويقول باعلى صوت "انا مصــــــــــري" وتصبح مصر ام الدنيا وابوها كمان برغم انف اي حد اما احنا ياكبار فلم نعد نقبل اي شئ احنا مش عايزينه ونقدر نقول باعلى صوت لآلآلآ ومنخفش من اي شئ وكفاااااايه كلمه" يا عم ما ينفعش نعمل كده دا إحنا عايشين فى مصر" !!!يامصري دي بلدنا احنا ولازم نبقا عارفين ايه حقوقنا وايه واجباتنا وبقا مفيش اي حجه للاصلاح والعمل وخصوصا العمل والاحصائيات اللي كانت بتقول ان معدل عمل المصري هو 26 دقيقه في اليوم !!! لازم تتغير وكل واحد فينا يعمل بجد واجتهاد ويراعي ربنا وضميره في لقمه عيشه وكفايه "انتخه" وانك تروح اي مصلحه حكوميه ويتفننوا انهم يقرفوك في عيشه اللي جبوك وعلشان تخلص نفسك لازم تتدفع الشاي وكل واحد على قد شايه ففي بيشرب شاي العروسه وفي بيشرب شاي ليبتون!!! ونتعلم ونقرا مش ممكن نكون امه اقرا ولا نقرا!!! ونرفع شعار "القراءه حياه فلكي تكون قائد لازم تكون قارئ مش لازم تكون قائد دوله بس كون قائد في عملك ده اقل معدل للثقافه هو قراءه كتابين في الشهر انت بقا بتقرا اد ايه ؟؟؟ وكمان لايليق بنا كدوله علمت البشريه من فجر الحضاره الانسانيه ان يكون معدل الاميه 30 % !!! اما المرور ياريت الشرطه تصدق في وعدها في انها حتعمل لنفسها اعاده هيكله في تعاملها معانا وتحل مشكله الزحام المروري وادينا اهو عرفنا ننظم نفسنا ايام الثوره العظيمه بدون عسكري مرور واحد يوحد ربنا وكفاااااايه الوقفه الغير ادميه اللي احنا لينا حق الامتياز فيها وحصري بس في الشارع المصري الحراسه بتاعه الرئيس والساده الوزراء دول ناس زينا زيهم واذا كانوا هم عندهم مشاغل ومصالح احنا برده والله مش بنلعب وعندنا مصالح ... اما الشئ الاهم اللي بتمنى اننا نحافظ عليه زي عنينا هو الوقــــــــت "فالوقت كالسيف ان لم تقطعه قطعك" فلازم يكون الوقت عندنا زي السيف الحاد مش سيف تلم يعني لما نعطي مواعد لحد تبقى محدده مش مفتوحه يعني لما اسأل حد واقول له حشوفك امتى يرد ويقول بعد العشا !!! وطبعا العشاء ممدوده ..... لازم نتستفيد كلنا من حاله الرضا والفرحه والنشوه اللي بنعشها ايام مابعد الثوره ونستفيد منها ونستغلها احسن استغلال ونبين لنفسنا وللعالم ان احنا اهو المصريين الجدد
ليست هناك تعليقات:
إرسال تعليق