"ريسنا ريسنا دا بجد احساسنا مانت اللى قلبك علينا ودايما رافع راسنا" ، " اللي ضحا لاجل وطنه لاجل ليعود النهار " وغيرها من الاغاني والشعارات العطره الللي من عينه شلوت سعاتك دفعه للامام ، احلام سعاتك اوامر الي غير ذلك من كلمات النفاق والتطبيل فكان ده موقف الافاقين والمنافقين من الساسه والناس والاعلاميين من الرئيس وهو لسه "بخيره " في الحكم وكل واحد كان الرئيس يقوله "ازيك" كان ياساعده وياهناه وكأنه يريد ان يموت من بعد موقف صباح الخير ده هو حيعوذ ايه تاني من الدنيا!!! دلوقتي الحال اتغير 720 درجه يعني اربع اضعاف واللي كانوا بيسبحوا بحمد الرئيس انبارح دلوقتي كفروا وارتدوا عن التطبيل واصبحوا يطبلوا للشعب ماهما بيرقصوا على اي مزيكا وخلاص ويقولوا نجحنا في اسقاط الطاغيه !!! يااااااسلام هما مين اللي نجحنا!!؟؟ كانوا هما فين في تصريحاتهم المنافقه وقولهم بان الثوار قله مندسه وعملاء بتوع صدر وورك ( كنتاكي يعني) مستخفين بعقول الشعب!!! انا بشبه الناس دي بالمراه العاهره تروح مع اللي يدفع لها اكتر!!! يعني هم دلوقتي مع الشعب لانه اسقط الطاغيه وكله بيأكل عيش هو يعني الريس حينفعهم بأيه دلوقتي !!؟؟ وانبارح كانوا بيقولوا عاش الملك النهارده بيقولوا رحل الدكتاتور رحل الطاغيه !!! انا مش عارف الناس دي عايشه ازاي ومنطقها ومبداها ايه في الحياه !!؟؟ - لو عندك اجابه ياريت تريحني وقولي انا عندي الضغط ومش عارف حيجيلي ايه تاني - وياترا بيعلموا اولادهم ايه !!؟؟ وازاي بيرفعوا عيونهم امامهم !!؟؟ ده الراجل موقف يعني رجلتك من موقفك يعني لو كانوا موقفهم ضد الرئيس او معاه ومتغيرش كنا حنقول ماشي الحال وتعدي ودي حريه راي وتعدد في الاراء وديمقراطيه اللي بنادي بها من زماااااان لكن معاهم معاهم عليهم عليهم!!! انا ليا شعر كاتبه عن المنافقين دول بقول فيه:
"اما المنافقين اللي كانوا بيشتموا وبيتفرجوا علينا من بعيد
يشوفوا الريــــــــس حـــــــيكمل ولا اصــــــرار النـاس حـيزيد
ولما الثوره نجحت انضموا لينا وهتفوا وقالوا ان الشعب يريد
يريـــــــد ايـــــه يـــــامنـــــافقــــــــين يــــــــاولاد التــــــــييييييت
بس حنقول ااايه ادي حــــــال الدنـــيا وان الله فعال لما يـــــريد
بس في ملاحظه انا لاحظتها ايام الثوره وهي ظهور المؤيدين للريس وهم يبكون عليه في حسره "ونحنحه وسهوكه" وكأنه ابوهم بجد !!! مع ان الريس هو مجرد موظف زي اي موظف في الدوله بس الفرق انه عنده صلاحيات اكبر من كاتب الارشيف - روح يانوفمبر تعالى يانوفمبر – وبعدين اللي بيقولوا ان تأيدهم حريه راي وحريه تعبير طيب بيشتموا في المتظاهرين والثوار ليه ؟؟؟ ويقولوا مثلا احرقوهم في ميدان التحرير – راجع موقف سماح انور – او انهم شافوا بنفسهم بيأخذوا فلوس ووجبه كنتاكي – راجع موقف حسن يوسف - ؟؟؟ حريه التعبير بتكون بالادب مش بالشتيمه وبعدين محدش من الثوار طلع وقال اي لفظ سخيف واتحدي اي حد .... ليكن لكل واحد منا موقفه اما عاش الملك اما رحل الدكتاتور وده درس لكل واحد بانه لايتحدث الا عند اكتمال الرؤيه وده اللي علموهلنا علمائنا ومفكرينا .
ليست هناك تعليقات:
إرسال تعليق