الليبراليه ...لامؤخذه !!

"تعرف ايه عن المنطق يامرسي؟؟ .. ان الواحد يقع ميحطش منطق هو ده المنطق ولا مش هو !" ده بالظبط حال مهاجمي الليبراليه - (ومنهم من يقول ربراريه! ) - لايعرفون معناها ولا مغزاها هم بس " بيخبطوا " وبيهاجموا ويطلعوا عين اللي خلفونا بتعريفات يعجز عن فهما العاقل ويستطعمها ويستمتع بها الجاهل ! منها مره ان امك تمشي من غير حجاب ! وواحد سلفي اعرفه عرفهالي في بدايه الثوره لما وزع ورق بيظهر فيه الفرق بين الليبراليه والسلفيه -( يعني بيفرق بين فكر صنعه بشر ومذهب   ديني ربنا يعني كده زي اللي بيقارن الخضار بالفاكهه وده لايجوززز لان دي حاجه ودي حاجه تانيه خاص !)- فعرفها على انها " كلمه مشتقه من كلمه لبرالتي اي الحريه ويدعون الي التحرير من العقائد الدينيه والاخلاقيه وتحرير المراه والمجتمع من العادات الطيبه وشيوع الاباحيه والفجور باسم الحريه، ويعادون الاديان لانها تحارب الفوضى والفساد ويحاربون اهلها !!" ولما قلت له اللي بتوزعه ده كذب ومش صحيح قال لي " طيب ماهم بيكذبوا وبيشوهوا صوره السلفيه احنا كمان نعمل زيهم !!"- (مع انهم هم اللي بيسيئوا لنفسهم اكتر من اي حد وراجع مواقفهم والاعتذار الدائم من المتحدث الرسمي لحزب النور نادر بكار واللي بقترح عليه يجيب ماكينة اعتزار بالكهرباء زي كده الشخاره اللي بالكهرباء بتاعه هاني رمزي !!)- حتى لما قامت مناظره لتوضيح الرؤي والافكار بين د.عمرو حمزاوي ،عبدالمنعم الشحات(المتحدث الرسمي بأسم الجماعه السلفية) عن الليبراليه والسلفيه فالشحات لم يتحدث عن السلفيه بقدر هجومه على الليبراليه بدون علم ووعي لانه "شحات" فكريا وقراءه وتحضير للمناظره لان "ابسط" حاجه كان ممكن يعملها انه يدوس على "الكي بورد" ويكتب ليبراليه على الانترنت وحيجي تعريفها على ويكيبيديا كالتالي "الليبرالية من ليبر liber وهي كلمة لاتينية تعني الحر مذهب سياسي أو حركة وعي اجتماعي، تهدف لتحرير الإنسان كفرد وكجماعة من القيود السلطوية الثلاثة السياسية والاقتصادية والثقافية - (ثلاثه لا رابع لهم يعني مافيهمش الدين زي مابيطبلوا ويكذبوا ! )- ، وقد تتحرك وفق أخلاق وقيم المجتمع الذي يتبناها فتتكيف حسب ظروف كل مجتمع، إذ تختلف من مجتمع إلى مجتمع - (يعني كل شيخ وله طريقه ) - ففي السياسة تقوم تلك الفلسفة على استقلال الفرد والتزام وحماية الحريات الشخصية والحريات السياسية والمدنية له ، وبخصوص العلاقة بين الليبرالية والأخلاق، أو الليبرالية والدين،فإن الليبرالية لا تهتم بسلوك الفرد طالما أنه لم يخرج عن دائرته الخاصة من الحقوق والحريات - ( واللي مش هي برده الحريه الجنسيه لحسن اول لما بنقول حريه تيجي على طول  في الخيال حريه الجنس يمكن علشان في حرمان جنسي في بلدنا !! )- ، ولكنها صارمة خارج ذلك الإطار فان تكون متفسخاً أخلاقياً فهذا شأنك ، ولكن أن تؤذي بتفسخك الأخلاقي الآخرين بأن تعتدي مثلا على فتاة في الشارع  فذاك لا يعود شأنك وانك بذلك كسرت القوانين والحريات الاخرى للاخرين ، وأن تكون متدينا أو ملحداً فهذا شأنك أيضا " ، اذا فهي تهتم وتعلي جدااا وتقدس الحريه الشخصيه للفرد.

 يعني من الاخر خليك في حالك وعيش وسيب غيرك يعيش ومحدش يحط منخيره في سلوك الاخر طالما انه ملتزم بالاطار المجتمعي والاخلاقي والقانوني ولم يؤذيك او يؤذي حد غيرك ؛ في ناس حتقولي الدين النصيحه واننا لازم ننصح غيرنا بانهم على خطا حقول لحضرتك ان "مش كل من اشترى جمل بقى جمال ولا كل من عنده شويه زيتون وجبنه بقى بقال !" يعني في ناس متخصصه في الاصلاح من المؤسسات الدينيه الرسميه وتفعيل دورها في المجتمع وليس كل من هب ودب يتكلم في الدين والدنيا ويفرض وصايته على الناس في اعتقاد منه ان اللي بيعمله ده هو الصح بدون علم ولا دراسه فقط اجتهادات شخصيه قد تكون خاطئه!! ومصر اصلا طول عمرها ليبراليه حره مفيهاش عقد وقلقيع الوهابيين اللي من ساعه لما شموا البترول وهما عايزين يمشوا العالم كله على مزاجهم وينشروا فكرهم !! احنا عدى علينا افكار وحضارات اكتر من اي امه في العالم وبما اننا في قلب العالم فاي حد كان يروح الغرب او الشرق يعدي عليا ويقعد "ويريح" عندنا اقل واجب 70 سنه يعني حضارتنا حضاره "فخفخينه" خلقت طابعها وسماتها الخاصه ، وراجع التاريخ كويس - ده لو بتحب تقرا - واقرا الفتره مابين 1907 – 1974 ومن بعدها سافر المصريين الي بلاد اخرى وتخلوا عن افكارهم "للكفيل "! ورجعوا بالمروحه والراديو اللي متبرمج على افكار "شاذه" عن مجتمعنا ليس لها اصل تاريخي ولا حضاري لايمكن ان تطبق الا في بيئتها الخاصه بها . ده كان تبسيط للمعني ومحاوله بسيطه للتوضيح بدل اللبس والتشويه والاستماع الخاطئ لجهله المجتمع يتكلموا فيما لايعرفون لان الليبراليه ملهاش دعوه بامي اصلا تلبس او تقلع الحجاب ! ولو حضرتك عايز تعرف اكثر المكتبات مليانه كتب تعرض لك كل الافكار واقرا واحكم بنفسك بس من هنا لحد ماتقرا فانا اجتهدت وقرات وحقول باعلى صوت تحيا جمهوريه مصر "الليبراليه" .