خـــــــليك في حـــــالك !

لما تشوف امثال زماااان تستشف وتستنتج منها ان "نينه وجدو" كانت عندهم حكمه كبيره وخبره عريقه في الحياه تفوق خبره وفلسفه "ارسطو" في زمانه ! فتلاقي كلامهم فيه الشفا وهما كلمتين ورد غطاهم بس ايه في الجوووول فتسمع مثل " ياداخل بين البصله وقشرتها ماينوبك الا دمعتها" ! ، " ماينوب المخلص الا تقطيع هدومه "! وغيرها من الامثال العبقريه اللي تدعوك الى انك تخليك في حالك ومتدخلش في شئون الناس بمعنى :-

1- خليك في حالك وسيبك من ان.... فلان ده بيقبض مليون ولا حتى مليار وتقعد تبصله في رزقه ! طالما كسبهم من مجهوده ومن موهبته وشطارته اللي ربنا اعطاها له ولم يضرك يبقى سيبك و" ميخصكش" اللي يخصك هو انك تدور جوه "نفسك" بنفسك عن مميزات نفسك !! وتحقق احلامك "انت" بدون ان تقارن نفسك بنجاحات الاخرين فقط استفيد من تجربتهم في تحقيق احلامك واهدافك .

2- خليك في حالك وسيبك من ان .... فلان ده مسيحي او هندوسي او بهائي او حتى بوذي وتتريق على ممارسه عقيدته بمنتهى الاستهزاء والسخريه اللي ينتج عنها انه يكرهك وينتفى وصفك كمسلم  اللي "يسلم الناس من لسنانه ويده ! " فعقيده الاخر دي مش حتأذي حضرتك في حاجه ولا حتزودك ولا حتنقصك في شئ هو "حر" " فَمَن شَاء فَلْيُؤْمِن وَمَن شَاء فَلْيَكْفُرْ " سورة الكهف الآية (29) ، وفي ايه وسوره اخرى "لَكُمْ دِينُكُمْ وَلِيَ دِينِ " يبقى حضرتك مالك بقى تتكلم معاه ليه في حاجه هو مقتنع بها اااااشد الاقتناع  انت بقى شايف غير كده ميخصكش ! .

3- خليك في حالك وسيبك من ان.... فلانه قلعت الحجاب او لبسته هي " حره" هو يعني ربنا حيحسبك معاها ويقولك انت ليه معترضتش بالعكس ده ممكن باعتراضك واسلوبك اللي بنجده في كثير من الدعاه الجااااهورين -(مره صديقه قالت بانها سمعت شريط عن الحجاب لاحد الشيوخ دول قالت لي بعدها " انا مش حفكر اتحجب ولا اتهبب بالطريقه دي وبالوصف ده!! (اصله كان بيوصف النقاب مش الحجاب!) - يبعدها اكثر واكثر عن الحجاب حتى لو كانت عندها نيه الحجاب فمش حتتحجب علشان الاسلوب ده! ويكرها في اي واحده محجبه! ثم ليه حضرتك مهتم ااااوي بهدايه البنات بالذات !! اللي يخصك هي مراتك وبنتك "فكلكم راع وكلكم مسئول عن (رعيته)"! .  

4- خليك في حالك وسيبك من ان... فلانه دي ليه متجوزتش لحد دلوقتي متأثرا بخالتي بهانه على الشلته وتقول "هي ليه ممتنعه عن الزواج!" هو يعني حضرتك مستعجل على جوازها وشاغلك قوووووي الموضوع ده علشان "حته" الجاتوه ! طفاسه صحيح ! ده حتى المثل بتاع "نينه" بيقول " امشى فى جنازه ولا تمشيش فى جوازه"! .

5- خليك في حالك وسيبك من ان فلان ده بيصلي او مش بيصلي فالصلاه هي العلاقه بين العبد وربه والتي من "المفروض" تنعكس على المعامله بين البشر وبعضهم فالصلاه يؤديها العبد في الدنيا ويحاسبه عليها "ربه" في الاخره مش يؤديها العبد للعبد في الدنيا ويحاسبه عليها ويقوله " انت مبتصليش لييييييييييييه "!! .

مما سبق اظن اننا بنتدخل في شئون الناس بسبب وبدون سبب لنزعه داخليه اننا عايزين نشوف الكون افضل واحسن لكن بتختلف النوايا وبيختلف الاسلوب في ابداء النصيحه مع ان "مش كل من اشترى جمل بقى جمال ولا كل من عنده شويه زيتون وجبنه بقى بقال !" يعني في ناس متخصصه في الاصلاح وليس كل من هب ودب يتكلم في الدين والدنيا ويفرض وصايته على الناس في اعتقاد منه ان اللي بيعمله ده هو الصح بدون علم ولا دراسه فقط اجتهادات شخصيه قد تكون خاطئه!! واظن برده اننا فاضيين ومفيش شئ بيشغلنا الا حال فلان وعلان وترتان ده حتى مسبناش حتى الراجل اللي كان واقف ورا عمر سليمان ! وان ايضا كل واحد باصص للناس وسايب نفسه باخطائها بسلاطتها بباغنجها وبيحاسب الاخرين! شكسبير بيقول " في النصف الاول من الليل اراجع اخطائي وفي النصف الاخر اراجع اخطاء الاخرين لكي اتعلم منها اذا تبقى لي شئ من النصف الاول! " ويقول احد الصالحين " مالي ومال الناس خلقت وحدي وعشت وحدي وسأموت وحدي وسأبعث وحدي وحؤحاسب وحدي فمالي ومال الناس "! فمما سبق برده اتمنى اننا زي ماتعودنا نسمع كلام اللي اكبر منا فسمع كلام " نينه وجدو " وهم بيقولوا لك "من تدخل فيما لايعنيه سمع مالايرضيه"! سلامات

المقال في مجله كلمتنا عدد يناير 2012