درسنا كلنا في ابتدائي في العلوم ان الكون ده كله بطوله وعرضه بيسبح فيه تسع كواكب بتدور كلها حول الشمس وان لكل كوكب خصائصه التي تميزه عن باقي الكواكب الاخرى ولكن كلهم بيشتركوا في سمه واحده وهي ان كل الكائنات اللي على كل كوكب - اي كان نوعها - عايزه تعيش على مزاجها J ، وبما ان التقمص بيكون عالي اااوي واحنا صغيرين فتقريبا كل واحد فينا حب يكون كوكب من الكواكب دي وينفرد بنفسه عن باقي العالم ويكون له عالمه الخاص سواء في اسلوب الحياه او في الاهتمامات ، وكل ده عادي وطبيعي ومشروع كمان ، لكن اللي مش عادي ومش مشروع خااالص ان الامر وصل انه بقى بيحارب اللي بيختلف معاه ! وشايف ان طريقه معيشته هي الافضل من اللي حوليه وبيسعى الي انه يفرضها على خلق ربنا بالعافيه! ، ومش واخد باله بان لكل كوكب – انسان يعني – عالمه اللي عايش فيه ملك ؛ بمعني اوضح يعني الاخوه السلفيين علشان يفرضوا رايهم فيقولوا ان كل ليبرالي كافر !! طيب ده علشان هو بيعلي من الحريات الشخصيه للناس اللي بتيجي على طوووول في دماغهم حريه الجنس !ولا علشان الجنس في مجتمعنا مكبوت !؟ ولا يمكن علشان الحريه بتحتاج مسئوليه والناس في بلدنا بيخافوا من تحمل المسئوليه لان فيها مسائله وحساب !؟، طيب وليه برده الليبرالي بيقول ان كل سلفي متخلف ! مع انه عايز يحافظ على قيمه اللي اتربى عليه ، وده مش عيب بس العيب انه عايز يفرض تربيته وقيمه اللي اتربى عليها دي على اللي حوليه وبيحارب الحريه لانها بتساوي عنده " الابحاحيه" !. اما بقى المجلس العسكري واللي بيعمله فينا فهو متربي على طاعه الاوامر وانك لو عصيت الاوامر تقدم لمحكمه عسكريه وتوقع عليك اقصى عقوبه ويمكن تتشنق كمان ! ولكنهم فوجئوا بان "مفيش اوامر" في الحياه المدنيه وفوجئوا ان هناك فرق كبير يصل الي 72 مليون كيلو- هي المسافه بين كوكب الارض والمريخ - بين الحياتين ! وبرده عايزين يفرضوا شكل حياتهم على حياتنا "بالعفيه" ! .
احنا بقى مابنفكرش وننتقد "ونشغل مخنا اللي توقف "اكلينيكيا " من الالف السنين !، وبقينا عاملين زي اهل الكهف انغلقوا على نفسهم في كل شئ وبقت حياتهم حياه كئيبه ومش عايزين يخرجوا لسبب واحد انهم خايفين من التغيير اللي بقى حواليهم ! ولما اجبروا على الخروج من كهفهم - نتيجه اي عامل من عوامل الطبيعه - وجدوا اشياء عاجزين عن فهمها فبقوا اما انهم بيحاربوها بكل شراسه فقط لانهم مش عارفين يتعايشوا معاها ! او يفرضوا نمط حياتهم اللي ميخص حد غيرهم على غيرهم ! الحل بقى سهل وبسيط ان محدش يفرض اسلوب حياته على الاخر ويعتبر ان فكره واسلوبه "سنه" يعني لو عملها الاخر يبقى خير وبركه ولو معملهاش يبقى هو حرJ لان كلنا عايشين في الحياه دي بااختلافنا عن بعضنا ولكن بندور كلنا حول بلدنا اللي هي "قلب العالم "كله ولو مات القلب مات البني ادم .
ليست هناك تعليقات:
إرسال تعليق