تقول الماده الثالثه في دستورنا المصري ان "السيادة للشعب وحده، وهو مصدر السلطات، ويمارس الشعب هذه السيادة ويحميها، ويصون الوحدة الوطنية على الوجه المبين في الدستور" طبعا ده كلام جميل ومعقول ومقدرش اقول حاجه عنه على راي ليلى مراد بس لما احط الماده دي في كفه واحط نسبه الاميه اللي تصل الي 35 % بجانب اللي تحت خط الفقر واللي تصل نسبتهم الي 40% تكسب طبعا الكفه اللي فيها الاميه والفقر يعني احنا عاملين نقول عايزنها دوله مدنيه وديمقراطيه والناس دي بدور بس على "قرص طعميه" وازاي تأكل عيالها ومعندهاش اي فكره عن السياسه وتقريبا مغيبه والدليل الناس اللي طلعت تتخانق وتشتم في المعتصمين في ميدان التحرير وكانت نتيجتها "مزبحه الجمل" مش عارفه اي حاجه هي طلعت لان الناس فهموهم انهم السبب في قطع عشهم ووقف حالهم وهو ده الوتر الحساس !!! يعني احنا بنكلم نفسنا وبيفكرني ده بقصه" جحا والمفتاح" وهي ان مره حجا كان مفتاحه ضايع منه وبيدور عليه بليل فجاله واحد بيقوله تحب اساعدك قاله ياريت قاله هو المفتاح وقع فين بالظبط قاله هناااااك قاله الراجل امال انت بدور هنا ليه !!؟؟ قال حجا اصل هنا في نور وهناك مفيش!!! يعني احنا كده بنلعب في المنطقه الغلط فكتيييير من اصحاب المدونات واللي بيعرفوا يتعملوا مع الانترنت والفيس بوك عندهم الوعى صحيح مش الوعى الكامل بس اهو عندهم برده راي ودائما بيعرفوا ويتعلموا ويطوروا معلوماتهم السياسيه ومطلعين برده لكن هنعمل ايه مع الناس التانيه دي اللي معندهاش حتى تليفزيون!!؟؟ لازم كل واحد يكون عنده الوعي ويكلم ويوعي الناس بانهم يشاركوا ويدوا اصواتهم للناس اللي تستحقها ومتتكلمش معاه في معنى الديمقراطيه بطريقه المثقفين لآلآلآ دوس على الوتر الحساس وهو "الاكل " هي مش مطالب وشعارات الثوره "عيش حريه كرامه انسانيه " خلاص دووووس وتعامل من المنطلق ده وهو حيستجيب لانه عارف انك عارف اكتر منه وحيحترمك لما تبسطله المعلومه وتتكلم معاه على قد عقله وببساطه حيحبك ويسمعلك اكتر... فاحنا بنسوق سلعه ممتازه والتسويق تعريفه هو اشباع رغبات المستهلك ولما يقول لك اي حد يجي وخلاص لما نشوف "حيجبلنا " مين؟؟؟ قول له مش هما اللي حيجبولك انت اللي حتجيب اللي انت عايزه ومختاره على اساس اللي سوف يحققه ليك ولعيالك وهو ده مربط الفرس واللي يهمه يعني انا اتكلمت مع ناس بسيطه وكانت بدافع عن احمد شفيق قبل "اقالته" وقولت له لماذا تحب احمد شفيق !!؟؟ قال ياباشا ده راجل مننا وبسيط زينا والدليل انه لابس "بلوفر" مش بدله ومتعنطز علينا فقولتله برده ده مش سبب فكررت السؤال انت بتحبه على اساس ايه؟؟ قال "بيقولوا" عليه كويس!! قولته طيب انت حتختار رئيس الدوله على اي اساس؟؟ سكت ومردش قلتله انت لازم تفكر بعقلك مش بقلبك وتقول انه بيلبس بلوفر او انه شكله حلو انت اختار اللي يفيدك ويفيد عيالك .. وسألته هو وكل الناس اللي كانت معاه انت قرات البرنامج الانتخابي بتاع مبارك في 2005 قالي لا!! قلتله واغلب الناس زيك لان كان مبررها هو اللي نعرفه احسن من اللي منعرفوش!!! اللي عايز اوصله ان كل واحد عنده دور في التوعيه دي لان الناس البسيطه لو وجهتها صح سوف ترها منها المعجزات ولك في ثورتنا اسوه حسنه فاايه اللي كان مخوف الحكومه من" الاخوان المسلمين" هو انهم وصلين للناس البسيطه دي ولهم قدره "خفيه او ظاهره" على توجههم لانهم عارفين مفتاح التعامل معهم وانهم لهم تأثير قوي على تغيير مسرى الامور.صحيح انهم مش كتيير ولكن تأثرهم كبيييير ومتوغلين في حياه الناس ويتكلمون بقال الله وقال الرسول واحنا بطبيعه الحال شعب متدين - او هكذا يعرف عنا - وبرده خبرتهم في الحياه السياسيه والعمل العام اقتربت على القرن من الزمان وبالتالي سوف يكون دورهم فاعل وقوي وبالتالي فلابد من القوى السياسيه الاخري الاقتراب وفي وقت قصير من تلك الفئه وهي الاغلبيه الساحقه ورايها يقلب الدنيا ويخلى الوزير غفير في ثانيه لازم نركز على الطعميه والاكل والحياه الكريمه واللي بيهم تلك الطبقه واحنا بتكلم عن الديمقراطيه .
حلو اوى فعلا مافيش واعى كفاية عند الطبقة دية لانها منسية اصلا لازام ينزل شباب المناطق العشوائية دى توعى الناس علشان يكون ليهم صوت و راى لانهم مهما كان بشر و ليهم حق الراى بس عن وعى و دراية بالظروف المحيطة و حتى علشان يحسو بوجودهم و انهم مش طبقة مهملة
ردحذف