ممنوع الاقتراب او التدوين !!

ظهر شعار "الشعب والجيش ايد واحده" اول مره بعد رفع الشرطه شعارها بانها في "خيانه" الشعب ! وانسحابها في ذل وانكسار يوم 28 يناير فلم يجد الشعب احد يحميه ويصدقه ويثق فيه الا الجيش فهو المؤسسه الوحيده الباقيه من النظام السابق كله فالتقط الصور التذكاريه مع الشعب جنب الدبابه ! اللي سمح لهم بالكتابه  عليها " يسقط حسني مبارك" لان ده اللي كان يريده الجيش من قبل الثوره اصلا بعد ظهور ملف التوريث - راجع تصريحات جنرالات المجلس العسكري بان التوريث خط احمر- وبالتالي فهو ليس له فضل كبير يعني على الثوره لان كان هناك توافق بشكل ضمني على المطالب واولها التغيير يعني بالبلدي كانوا بيقولوا "كويس اهى جت من عند ربنا "! وبالتالي انضموا لينا وبالتالي بقينا ايد واحده مع ان ايد لوحدها متصقفش !

 وبعد التغيير وتحقيق المطلب الاول من قائمه المطالب التي رفعت في الميدان وهو" خلع الرئيس " وظهور عمر سليمان وهو يلقى بيان التنحى بصحبه الراجل اللي واقف وراه ! فنتقلت كل اختصاصات رئيس الجمهوريه الي المجلس العسكري ليدير شئون البلاد  في "فتره انتقاليه" ها انتقاليه – يعني متحلمش باكتر من كده - وبعد عمل فرح وظيطه وظمبليطه صرح وقال" يالا ياحبايب بابي ارجعوا بيوتكوا في سلام وارتاحوا واحنا حنعملكوا كل حاجه انتواعايزنها " !! وهي دي الغلطه اللي وقعنا فيها - معلش اهو يعيش المعلم ويتعلم برده - وهي اننا تركنا ثورتنا  ووثقنا في من لا يعرف قيمتها ولايؤمن بها ويتعامل معها على انها حركه او مظاهره قامت من اجل اشياء بسيطه ! ويتعامل بمنطق "الاشاعات "في تهدئه الثوار او اشعالهم – راجع تصريحات اللواء الرويني – فكان نتيجه ذلك ظهور الكثير والكثير من الاخطاء والتجاوزات التي فعلها المجلس العسكري اللي كل شويه يجس النبض ويضرب الثوار ويقول " ورصيدنا يسمح لديكم" لحد مانفذ صبرنا  ورصيدنا ولم نتمكن من اعاده الشحن! فظهرت نبره الانتقاد على الاداء "السياسي "للمجلس بشكل تدريجي وطبيعي يتناسب مع كونه الان في مقام رئيس الجمهوريه ولان لكل مقام مقال فهو في هذا المقام عرضه للانتقاد  والقيل والقال كمان اذا لم يلتزم بما قاله او كانت افعاله خاطئه او تناقض اقواله . لكن بقا ليه ولييييييه المجلس ينتقد فهو فوق مستوى الانتقاد !- هكذا يعتقد - ولم يدرك بان الثوره قامت من اجل الحريه والكرامه بس حنقول ايه ماهو في الوقت اللي كان الناس بتعذب في اقسام الشرطه وتتبهدل بسبب قانون الطوارئ كان جنرالات المجلس بيكلموا الرئيس وحرمه واولاده ويقولوا " تمااااااااام يافندم"!! فالمجلس بيتعامل بمنطقه الغريب والقديم واللي عفى عليه الزمن " ممنوع الاقتراب او التصوير "!! في اعتقاد منه انه يحمي اماكنه العسكريه مع ان لو اراد احد ان يصور حمام اللواء الرويني مثلا حيصوره من خلال جوجل ارث !! ولكن منطق المجلس والتخويف "بحجره الفئران" اللي كانوا بيخوفونا منها واحنا اطفال مش حينفع معانا يعني مش كل واحد يكتب راي مجرد راي ليس فيه اي اهانيه يحول الي النيابه العسكريه ( راجع ماحدث مع الاعلاميه ريم ماجد ثم دينا عبد الرحمن وطريقه فصلها من  قناه دريم واخيرا اسماء محفوظ - حتى لو مختلف على اسماء محفوظ فاكيد مش حتختلف على ضروره الغاء المحاكمات العسكريه للمدنين!! - في تدوينه تعبر بها عن راي موجود في الشارع ونقوله لبعضنا كل يوم بان "لو القضاء لم يأت بحقنا ما حدش يزعل لو طلعت جماعات مسلحة وعملت ايه سلسلة اغتيالات طالما مفيش قانون ومفيش قضاء محدش يزعل من حاجة" فالعبارة لا تعتبر تحريضا على العنف فهي "تعبير عن مخاوفها" فقط من حدوث ذلك. ثم يفرج عنها بكفاله 20 الف جنيه في حين ان عائشه عبد الهادي اللي متهمه في قضيه "موقعه الجمل" افرج عنها بكفاله 10 الاف جنيه!! وتتوالى الاستدعاءات !! ده غير الكثير من الثوار اللي مازالوا بيتسحلوا في الامن الوطني (امن الدوله سابقا ) فهو مجرد تغيير اسماء فقط !!) ثم يحاكم محاكمه عسكريه في حين انا مبارك بكل جبروته هو واعوانه بيحاكموا محاكمه مدنيه لكن المجلس "عامل عبيط" وودن من طين وودن من عجين وبرده بيحاكم "الثوار" محاكمه عسكريه متجاهلا كميه الانتقادات من التيارات والاحزاب المختلفه وكل المنظمات الحقوقيه اخذا بالمثل المصري الرائع " اضرب المربوط يخاف السايب "!! طيب مدام الحكايه كده يبقى احمد زي الحاج احمد ! مفرقتش كتير لان ده اللي كان بيحصل في عصر الجبروت السابق من قمع للحريات وقول ياحبيبي اللي انت عايزه واحنا حنعمل اللي احنا عايزينه !!. من الاخر احنا مش حنتعامل بالمنطق العجيب بتاع الجيش " ممنوع الاقتراب او التصوير ءءءءاقصد التدوين " لاننا اولا :- مش حنسمح بعد كده بخلق الديكتاتور اخذين  بالمثل القائل " اقتل الوحش وهو صغير" لان من حق اي شخص انتقاد اي مسئول مهما كان لانه "شغال عندنا " وفكره الرئيس الاب دي خلاص بح  خلاص كان في وخلصJ .ثانيا :- لان من الواضح حسب التاريخ البسيط لثورتنا ان مفيش شئ حدث الا بالضغط سواء ضغط اعلامي وتدويني اللي بينتج عنه ضغط مليونات واعتصامات اللي المجلس في بيانه رقم 68 يوم 17 يوليو 2011 نص فيه على حق التظاهر السلمى و حق الأعتصام السلمى ( على فكره في البيان اللي بعده رقم 69 اتهم 6 ابريل بانها مموله من الخارج والي الان ليس هناك اي دليل لان ببساطه الدليل هو "الولوا "!! ) ودلوقتي عامل احتلال من جنود الامن المركزي والشرطه العسكريه في الميدان علشان يمنع التظاهر والاعتصام !! وايضا نص البيان على الغاء المحاكم العسكريه واقتصارها على أعمال البلطجه وما شابه ذلك (دي طبعا كلمه مطاطه استخدمها في موقعه العباسيه حينما نادى "المواطنين الشرفاء " للتصدي الي البلطجيه بتوع الميدان بالقنابل المسيله للدموع والسنج وكانت مجزره نتج عنها مئات المصابين واستشهاد محمد محسن!!). معنى ذلك أن المجلس العسكرى نقض عهده معانا يعنى مالوش حق يمنع التظاهرات ويفض الأعتصام أول يوم رمضان والناس صايمه ويدخل مسجد عمر مكرم بالبياده ويشتم الناس ويقول افتحوا الباب ياولاد الوس.....!!فهو كده نقض عهده معانا ورجع يحاكم المدنيين عسكريا تانى. قال سبحانه: (يَا أَيُّهَا الَّذِينَ آمَنُوا أَوْفُوا بِالْعُقُودِ) وقال تعالى : (وَأَوْفُوا بِالْعَهْدِ إِنَّ الْعَهْدَ كَانَ مَسْؤُولاً) ها كان مَسْؤُولاً بضيقكك الكلمه دي طيب مَسْؤُولاً مَسْؤُولاً مَسْؤُولاً مش بس حتتسال من ربنا يوم القيامه لالالا حتتسال مننا احنا كمان لاننا معندناش منطق ممنوع الاقتراب او التدوين !!