يعتبر مولد السيده زينب من اكثر الموالد شهره – اكتر حتى من ابو حصيره - في بلدنا واثناء المولد ياتي الناس من كل انحاء البلاد ليحتفلوا بالمولد ويركبوا المراجيح ويضربوا نار وياكلوا حمص واثناء المولد تغلق كافه المحلات ويغلق الشارع ولا يمكن ان تسير السيارات اثناء المولد ثم ياتي اليوم التالي " وينفض المولد " وكل واحد يروح لحاله ثم يفتح اصحاب المحلات علشان يشوفوا اكل عشهم من محلات العطاره والصيدليات والجزاره الي غيرها من المحلات نفس الوضع في ثورتنا المصريه اللي كانت ومازالت شعارها " عيش حريه كرامه انسانيه " يعني احنا عملنا مولد كبيييير وكان صاحبه غايب بقاله كتييير وهو الشعب اللي ثار على الظلم والفساد وعرف انه له حقوق ولازم يستردها فخلعنا الرئيس وفي طريقنا الي سجنه وسجنا باقي رؤوس النظام وبكده خلاص "المولد انفض " ونسيب بقا العداله تاخذ مجراها لان القضاء المصري معروف "بالنزاهه والعداله " – مش عارف ليه كل لما تيجي سيره القضاء يتم ذكر انه عادل ونزيهه مع ان ده الطبيعي !! يعني يتم اقرار حقيقه معروفه زي كده عادل امام في مسرحيه "شاهد مشفش حاجه" لما قال رقاصه وبترقص!! نورت المحكمه ياسرحان !!- والان حانت ساعه العمل دقت ساعه العلم دقت ساعه الكفاح مش بالكلام لالالا بالافعال ومنكونش "كلامنجيه " زي ماقال نتنياهو " ان العرب ظاهره صوتيه " يعني خلاص "الثوره على الظلم" خلاص حققناها والان يجب ان نعمل "ثوره على الجهل " وثوره صناعيه وعلميه ونصرف شويه بقااا على البحث العلمي اللي نسبته حاجه كده تكسف دي اسرائيل بتصرف على البحث العلمي حوالي 3 % من الناتج القومي ونرجع ونقول هي قويه ليه كده !! يعني لازم نرجع امجاد الاجداد ونصنع امجاد لولادنا يعني عييييييب اااوي اننا عايشين على امجاد الماضي سواء من مصدر الدخل الاساسي لنا وهي السياحه اللي خير لينا كلنا !! ونكون فرجه للعالم كله بس! وياتي الينا من كل انحاء العالم ليروا الحضاره المصريه على مر العصور سواء الفرعونيه او القبطيه او الاسلاميه او عايشين من خلال بيع وخصخصه المصانع والشركات اللي تعب فيها ابويا وجدي!!طيب احنا بقا حنسيب لاولادنا ايه بالظبط ؟؟!! .
المولد انفض ومراجيح "محاكم التفتيش" اللي عملناها خلصت خلاص يعني مفيش داعي نقول ده مع وده ضد خلاص وياااريت اللي مش مقتنع بالثوره يقول ومش عايزين منافقين " وطبالين " يعني الى الان هناك من لايؤمن بثوره يوليو 1952 بعد مرور اكثر من نصف قرن عليها وبرده مفيش مشكله لان دي حريه راي وتعبير لان اكيد في ناس كانت مش من مصلحتها ان الثوره تنجح لانها كانت متربيه على الفساد ومستقره على كراسيها !! واكيد الناس المعارضه اللي عاملين نفسهم مقتنعين بالثوره لهم وجهه نظر في الاحداث ويمكن يورونا حاجات احنا مش شيفنها مش لازم كلنا نبقا على قبضه رجل واحد !!
المولد بقاااااا لازم ينفض على موضوع "كاميليا شحاته" واي موضوع من هذا القبيل يعني انا معتقدش ان باسلام كامليا شحاته او غيرها حنطلع القمر مثلا !! او باسلامها حنكون من دول العالم المتقدم بدل مااحنا في مزبله العالم كده وزي البليد كده في اااااااخر صفوف العالم!! وياسيدي لو هي مسلمه يبقى ياهناها ولو هي مسيحيه برده ياهناها وخلي بالك انا بقول "هناها هي" مش هنانا احنا وسعادتنا وبعدين انا مش عارف هو احنا ليه معتبرين اي حد كده ابونا واخونا واختنا وبن عمنا يعني مبارك ابونا !! وكاميليا اختنا طيب ماهو الشيخ بلال بتاع اسكندريه الله يرحمه واللي قتل من امن الدوله ظلم برده اخونا ليه بقا الاصوات دي مطلعتش !!؟؟ ولا ان غاب القط !! ياريت بقا فعلا نفوق ونحرر عقولنا شويه مما افسده النظام السابق ويبقا عندنا فقه الاولويات ونعرف بان مصلحه بلدنا فوق كل شئ وان لازم فعلا المولد ينفض .
حلوة جيداً ما شاء الله لازم فعلا نبص لقدام مش نفضل عالطول بنبص على امبارح , الناس كلها بتعمل ثورة تعبر عليها لطريق التقدم لكن احنا الشعب الوحيد الى عمل ثورة على وشك ان تعبر هى علينا و تدهس احلامنا , جميع البلاد المحيطة تحيدنا على ما فومنا بة و تحاول ان تفعل مثلا و لكن هل النجاح ان تفعل مثلنا فقط فى الاول و تقتضى بشعب أخر للتكملة للتقدم ام النجاح ان تفعل مثلنا فى الاول و فى الاخر و لكن نحن بهذة الخطوات التى نتحرك بة نزحف إلى ان نكون أول شعب فعل ثورة و عبرت علية حتى الهلاك , ربنا يحفظ مصر
ردحذف