لا اللـــــي فوق شـــــافوهم ولا اللي تحت سمـــــعوهم !

كونك انك مصري الجنسيه يعني امامك حلين ملهمش تالت علشان تعيش جوه بلدك -(اللي بتسعى دائما الي طردك من جواها حتى اوشكت على انك تخرّجها من جواك !)- اما انك تفضل فيها وتحارب الفساد "بشجاعه "وفي النهايه حتموت دون ان تنتصر بسبب "قوه الفساد وكتره اهله" اللي تغلب اجعص شجاعه ! ، واما انك تتأقلم وتحاول تعيش على فسادها زي المتعايش مع المجاري بشويه طوب يرصهم ليعبر بها طريقه ! ، وبما ان الحل التاني وهو التأقلم بقي فرض عين على كل مصري فده اللي اعطي الفرصه على طبق من ذهب لتتعالى نبره "ولا يوم من ايامك يامبارك"  .

الناس برغم انها كان طالع عين اللي جابوها - ومازالوا- الا انهم الان وعلى مدار سنتين من المقارنه بين ماكانوا عليه ومااصبحوا عليه بيترحموا على "نظام فاسد" بفضل فشل "نظام افسد" !-( فساد الذمم واحد وكل اللي تغير شكله من فساد مالي الي فساد ديني يستخدم للسيطره على عقول الناس تنفيذا لمقوله ماركس الدين افيون الشعوب !)- نظام افسد عليها عيشتها اللي كانت متأقلمه عليها وعلى الفساد اللي كانت بتعتبره واحد مننا ! ، كان عندها امل بعد قيام ثوره كبيره عريضه انها تجد حياه كريمه فوجدوا ان كريمه نفسها ماتت مع اختها سلميه ! ، كان عندها امل ان الفساد اللي كان مسبب لها الم نفسي وعصبي حيروح ويختفي ونصبح دوله تحترم الحقوق والقانون ويأخذ كل ذي حق حقه فرات ان رئيسها نفسه اول المخترقين للقانون وخارج عنه ! فاصبحوا كالراقصون على السلم لا اللي فوق شافوهم ولا اللي تحت سمعوهم ، لا طالوا بلح الشام ولا عنب اليمن ! لاهم فضلوا محافظين على تأقلمهم مع الفساد ولا هم عارفين يعيشوا بالقانون اللي مش واخد باله منهم بدستور غابت فيه "العيش والحريه والعداله الاجتماعيه "! .

ثم تتعالى ايضا نبره "على الاقل مبارك كان فاسد لكن كان ممشي البلد كويس بيأكل بس كان بيأكلنا"! الناس وصلت لدرجه انها بقت راضيه عن سرقه الحاكم وفساده في مقابل انها تعيش وتربي عيالها ، وده ان رجع فيرجع لان السلطه الان مهمومه بمشاغل اكتر واكبر وهي السيطره على مؤسسات الدوله لتتحول من "دوله" الي "قبيله" ! ، سلطه كل همها نفسها نفسها وبس كرد فعل لتعاليم الجماعه التي خرجت منها التي تعطي الولاء الاول لها دون غيرها ، سلطه بتلعب بعقول الناس بمنتهى الوقاحه والاستخفاف وده طبيعي نظرا لخفه عقلها والجماعه اللي وراها ونظرا لمدى الشيفونيه لديهم التي تجعلهم يعتقدون انهم هم فقط على حق وصواب والباقي كلة على ضلال وفسق وفجووووور ! ، سلطه تتوهم انها مع المواطن "المسحول" وهي ابعد ماتكون عنه ولاتعرف عنه اي شئ ويظهر هذا في كلام المسئولين عن المواطن الغلبان اللي يكفي له 3 ارغفه في اليوم ! حتى تحول المواطن الغلبان الي الكفر بالسلطه ورئيسها وقريبا حيكفر بربه ! ، سلطه تروج انها على صله بربها بحفظ كلماته دون ان تطبق تلك الكلمات والتعاليم متناسيه قول الامام  أحمد بن حنبل" ان الحاكم القوى الفاسق خير من  الحاكم الضعيف المؤمن لأن الأول فسقه لنفسه وقوته للمسلمين، أما الثانى فإيمانه  لنفسه وضعفه على المسلمين".

بعد سنتين من الثوره التي انشغلنا كلنا فيها "بالشرشحه" لبعضنا ونحاول وبكل قوه وعصبيه نثبت من كان مع النظام ومن كان ضده ، من كان بيلحس جزم ومن كان رافع راسه غير مدركين حقيقه ان من نريد ان نثبت عليهم النداله لايهتمون بما نريد اثباته كل اللي يهمهم السلطه والحكم وحلمهم القديييييم وكل اللي وصلنا له ان المعارضين ازدادوا كرها للسلطه ، والمحبين والمؤيدين ازدادوا حبا وفي الوسط ازداد المواطن افلاسا ! فلا تلوم الباكين على مبارك وفساده ونظامه القديم اللي لما المواطن المسحول والمطحون سابه تاه ! بل الحق الذي احق ان يتبع هو لوم انفسنا .!  .